ەربول قازاق ءتىلى كابينەتى مەكتەپتەگى اباي كىتاپحاناسى, الاش تاريح كابينەتى, مۇحتار ءماجىلىس زالى, ماعجان ءدارىسحاناسى, شوقىر سپورت زالى, قايىم مۇراجايىنان كەيىنگى تۇلعا اتىمەن اتالاتىن كەزەكتى كابينەت. اتالعان كابينەتتەردىڭ ءبارى «ۇرپاقتار ساباقتاستىعى» دەپ اتالاتىن ۇلكەن جوبانىڭ قۇرامداس بولىگى. اباي-الاش-مۇحتار-قايىم-ەربول تىزبەگى – بۋىندار جالعاستىعىمەن ۇزىلمەي كەلە جاتقان ۇلتتىق يدەيانىڭ, الاش رۋحىنىڭ ساباقتاستىعىن ايقىندايدى. مەكتەپ ءوز ميسسياسىنا «ۇلتتىق تاربيە, ءتول تانىم, قازاقى قۇندىلىق» ۇستانىمىن ۇستىن ەتە وتىرىپ, الاش زيالىلارىنان قالعان اسىل مۇرانى جاڭعىرتۋدى كوزدەيدى. ماعجان, جۇسىپبەكتەردەن جەتكەن ۇلتتىق پەداگوگيكانى تۇعىر رەتىندە ۇستانادى.
اتالعان قازاق ءتىلى كابينەتى بەلگىلى قوعام قايراتكەرى, ۇلاعاتتى ۇستاز, بىلىكتى باسشى, ابايتانۋشى, قايىمتانۋشى عالىم, «قر ءبىلىم بەرۋ ءىسىنىڭ قۇرمەتتى قىزمەتكەرى», «ەرەن ەڭبەگى ءۇشىن» مەدالىنىڭ, «قر تاۋەلسىزدىگىنىڭ 20 جىلدىعى», ء«تىل جاناشىرى» توسبەلگىلەرىنىڭ يەگەرى جانە «حالىق سۇيىكتىسى» رەسپۋبليكالىق بايقاۋىنىڭ جەڭىمپازى ەربول ءىسلام ۇلى ىرگەبايدىڭ اتىنا بەرىلىپ وتىر.
«ەربول ءىسلام ۇلى – سانالى عۇمىرىن ۇرپاق تاربيەسىنە ارناعان ۇستاز. ول سونداي-اق استاناداعى وقۋ ءىسىن ۇيىمداستىرۋدا دا ەلەۋلى ۇلەس قوسقان قايراتكەر. اتاپ ايتقاندا, الكەي مارعۇلان اتىنداعى №40 مەكتەپ, ءال-فارابي اتىنداعى وقۋشىلار سارايى, قايىم مۇحامەدحانوۆ اتىنداعى №90 گيمنازيا قاتارلى وقۋ ورىندارى مەن ارناۋلى مەكەمەلەردە باسشىلىق قىزمەت اتقارىپ, وسى مەكەمەلەردىڭ قازىرگى اتالىپ وتىرعان تۇلعالارىنىڭ ەسىمىن الۋىنا تىكەلەي ىقپال ەتتى. بالا تاربيەسىنىڭ باعبانى 2021 جىلى سوڭعى جۇمىس ورنى №90 گيمنازيانى باسقارىپ تۇرعان مەزگىلدە دۇنيەدەن قايتتى», دەيدى ۇيىمداستىرۋشىلار.
شاراعا نۇر-سۇلتان قالاسى ءبىلىم باسقارماسىنىڭ باسشىلارى, استاناداعى ورتا وقۋ ورىندارىنىڭ ديرەكتورلارى جانە عالىمدار مەن قوعام قايراتكەرلەرى, ە.ىرگەبايدىڭ جارى قىمبات مۇقانقىزى مەن وزگە دە تۋعان-تۋىستارى قاتىستى. سونىمەن بىرگە ە.ىرگەباي ءومىرى مەن ونەگەسىن ارقاۋ ەتكەن دەرەكتى فيلم كورسەتىلدى.
