اقمولا وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى كوكشەتاۋ قالاسىنىڭ تەمىرجولشىلار پاركى اۋدانىندا ەسىرتكى قويىپ كەتۋمەن اينالىسقان 24 جاستاعى ەر ادامدى جانە ونىڭ 22 جاستاعى سۇيىكتىسىن ۇستادى.
قىز بەن جىگىت ەسىرتكىنىڭ كەزەكتى پارتياسىن جاسىرۋ ورنىن ۇيىمداستىرۋ كەزىندە ۇستالدى. ەر ادامدى جەكە ءتىنتۋ كەزىندە بەلگىسىز زات سالىنعان 27 پاكەت تابىلدى جانە تاركىلەندى (بولجام بويىنشا «ا-PVP» پيروۆالەرونىنىڭ قۇرىلىمدىق انالوگى سينتەتيكالىق ەسىرتكىسى). قىزدان ەسىرتكى سالىنعان ورىندى سۋرەتكە ءتۇسىرۋ جانە گەولوكاتسيا تۇرىندە ورنالاسۋ ورنىن جىبەرۋ كەزىندە قولدانىلاتىن تەلەفون تاركىلەندى.
سونداي-اق ساياباق اۋماعىن تەكسەرۋ بارىسىندا ۇستالعاندار وزدەرى ەسىرتكى قويىپ ۇلگەرگەن جاسىرىن ورىنداردى كورسەتتى, وسىعان ۇقساس 3 تۇيىنشەك تاركىلەندى.
«ۇستالعاندار كورشى وبلىستان كەلىپ, جاقىندا ەسىرتكى جاسىرۋشى بولىپ جۇمىسقا ورنالاسقانىن, ينتەرنەت ارقىلى حابار الىسقان بەلگىسىز ادامنان ەسىرتكى العانىن ايتتى. ولار بار بولعانى 10 كۇن جۇمىس ىستەپ, قۇقىق قورعاۋ ورگاندارىنىڭ قولىنا ءتۇستى», دەدى اقمولا وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مەيرام جاپباسوۆ.
ۇستالعاندارعا قاتىستى قر قك 296-بابى 2-بولىگى بويىنشا سوتقا دەيىنگى تەرگەۋ باستالدى.
