بۇگىنگى تاڭدا «ۇات» اق-دا اقپاراتتىق قاۋىپسىزدىكتى قامتاماسىز ەتۋدىڭ ءتۇرلى زاماناۋي قۇرالدارى ەنگىزىلدى جانە قولدانىلادى. ونىڭ ىشىندە 24/7 رەجىمىندە كيبەرشابۋىلداردان سەنىمدى قورعاۋدى قامتاماسىز ەتەتىن اقپاراتتىق قاۋىپسىزدىكتىڭ جەدەل ورتالىعى جۇمىس ىستەيدى. اقپاراتتىق تەحنولوگيالار سالاسىنداعى قىلمىستار سانىنىڭ ءوسۋى ۇيىمداردىڭ اقپاراتتىق جۇيەلەرىنىڭ قورعالۋى مەن تۇراقتىلىعىنا قويىلاتىن تالاپتاردىڭ ارتۋىمەن قاتار جۇرەدى.
وسىعان بايلانىستى «ۇات» اق سەرۆيستەر مەن قوسىمشالاردىڭ قاۋىپسىزدىگىن قامتاماسىز ەتۋدىڭ ۇلتتىق باعدارلاماسى – Bug Bounty باعدارلاماسىنا قوسىلدى. بۇل جۇيە ەلەكتروندى ۇكىمەت رەسۋرستارىنىڭ كيبەرقاۋىپسىزدىگىن قورعاۋدىڭ نەعۇرلىم جوعارى دەڭگەيىن قامتاماسىز ەتۋگە مۇمكىندىك بەرەدى.
«كۇن سايىن مىڭداعان اقپاراتتىق جۇيەلەر, سونىڭ ىشىندە مەملەكەتتىك ورگاندار حاكەرلەردىڭ شابۋىلىنا ۇشىرايدى. ءبىز ءۇشىن ەلەكتروندى ۇكىمەت دەرەكتەرىن قاۋىپسىز ساقتاۋ جانە قورعاۋدى قامتاماسىز ەتۋ ماڭىزدى. ىنتىماقتاستىقتىڭ ناتيجەسىندە ءبىز جۇيەلەرىمىزدىڭ قاۋىپسىزدىك دەڭگەيىن جوعارىلاتىپ قانا قويماي, ءوز رەسۋرستارىمىزدى ۇنەمدەيمىز», دەپ اتاپ ءوتتى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
بىلتىر جەلتوقسان ايىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين مەملەكەتتىك ورگاندارعا ارنالعان Bug Bounty باعدارلاماسىنىڭ ىسكە قوسىلعانىن حابارلاعان بولاتىن. سول كەزدە جابىق تەستىلەۋ اياسىندا زەرتتەۋشىلەردەن عالامتوردىڭ قازاقستاندىق سەگمەنتتىڭ باسىم بولىگىنە اسەر ەتۋى مۇمكىن ماڭىزدى وسال تۇستار انىقتالدى.
«دۇنيەجۇزىلىك تاجىريبە كورسەتكەندەي, ءىرى IT-كومپانيالاردىڭ Bug Bounty باعدارلامالارىنا قوسىلۋى كومپانيانىڭ كيبەرقاۋىپسىزدىككە ءمان بەرىپ, ونى ءوز تۇتىنۋشىلارى ءۇشىن اشىق ەكەندىگىن كورسەتەدى. «ۇات» اق مەملەكەتتىك سەكتوردان ءبىرىنشى بولىپ ۇلتتىق Bug Bounty باعدارلاماسىنا قوسىلدى. ءبىز بۇل شەشىمدى قولدايمىز, ويتكەنى بۇل اقپاراتتىق جۇيەلەردى قورعاۋعا دەگەن كوزقاراستىڭ جەتىلگەنىن كورسەتەدى», دەدى «كيبەرشابۋىلداردى تالداۋ جانە تەرگەۋ ورتالىعى» زتب پرەزيدەنتى ولجاس ساتيەۆ.
ايتا كەتەلىك, Bug Bounty – كومپانيا سىياقى الۋ ءۇشىن باعدارلامالىق جاساقتامانى وسالدىقتاردى تەكسەرۋ ماقساتىندا ءۇشىنشى تاراپ كيبەرقاۋىپسىزدىك ساراپشىلارىن تارتاتىن ارنايى باعدارلاما. بۇل باعدارلامانى Google, Facebook جانە Mozilla سياقتى كومپانيالار پايدالاندى جانە قوسىمشا قاۋىپسىزدىك ماماندارىن جالداۋ قۇنىن ۇنەمدەي وتىرىپ, ولاردىڭ جۇيەلەرىن سەنىمدىرەك ەتتى. ۇلتتىق Bug Bounty پلاتفورماسىنىڭ وپەراتورى ورتالىق ازياداعى كيبەرقاۋىپسىزدىك قىزمەتتەرىنىڭ كوشباسشىسى – TSARKA.
