«سارىارقااۆتوپروم» سەرىكتەستىگى بيىلعى 9 اي ىشىندە 38 مىڭنان استام اۆتوموبيل شىعارىپ, ءوندىرىس كولەمىن وتكەن جىلدىڭ وسى كەزەڭىمەن سالىستىرعاندا, 147%-عا ەسەلەپ وتىر. كاسىپورىن پاندەميا قىسپاعىنا قاراماستان, جىل سوڭىنا دەيىن 60 مىڭ اۆتوكولىك شىعارۋدى جوسپارلاۋدا. قوستاناي زاۋىتى بۇدان وزگە JAC, Chevrolet, Kia, Renault, Lada, SAZ اۆتوكولىكتەرىن دە شىعارادى. اۆتوزاۋىت بيىل رەسەي, قىرعىزستان, وزبەكستان, ازەربايجان جانە بەلارۋس مەملەكەتتەرىنە 5 مىڭنان استام اۆتوموبيل ەكسپورتتاپ وتىر. سىرتقى ساۋداعا كەتەتىن كولىك سانى جىل سوڭىنا دەيىن ءالى دە ەسەلەنە تۇسپەك.
– كاسىپورىننىڭ بۇگىنگى تولايىم تابىسى زاۋىت ينجەنەرلەرى مەن قاراپايىم جۇمىسشىلاردىڭ كاسىبي شەبەرلىگىنىڭ, قاجىرلى ەڭبەگىنىڭ جەمىسى ەكەنى داۋسىز. بۇگىندە قوستاناي زاۋىتىندا 1800-دەن استام ادام تۇراقتى جۇمىس ىستەيدى. جۇمىسشىلاردىڭ ءبارى SAP University ورتالىعىندا جۇيەلى تۇردە ءبىلىمىن جەتىلدىرىپ, كاسىبي بىلىكتىلىگىن ارتتىرىپ وتىرادى, – دەدى اۆتوزاۋىتتىڭ ءباسپاسوز حاتشىسى سايات ءجۇسىپوۆ.
قوستاناي وبلىسى
