شىعىس قازاقستان وبلىسى توتەنشە جاعدايلار دەپارتامەنتى مالىمەتىنشە, ازاماتتىق قورعاۋ اعا سەرجانتى بەرىك قالىقوۆ سەمەي قالاسىندا قىزمەت ەتەدى. ءورت ءسوندىرۋ بولىمىندە جۇرگىزۋشى بولىپ جۇمىس ىستەيدى.
«26 جاستاعى ءورت ءسوندىرۋشى مەكتەپ قابىرعاسىنان سپورتپەن, كيكبوكسينگپەن بەلسەندى اينالىسادى. ول جارىستىڭ ماڭىزدىلىعىن, دەڭگەيىن ءتۇسىنىپ, الەم چەمپيوناتىنا تىڭعىلىقتى دايىندالدى. 65 ەلدەن 1600 سپورتشى چەمپيوناتقا قاتىستى. بەرىك قالىقوۆ تاماشا ناتيجەمەن, قازاقستان قۇراماسىنىڭ ساپىندا ونەر كورسەتىپ, قولا جۇلدەگەر اتاندى», دەدى شقو تجد ءباسپاسوز قىزمەتى وكىلدەرى.
باسقارما مالىمەتىنشە, بارلىق ارىپتەسى بەرىككە جانكۇيەر بولعان. ول 2016 جىلدان باستاپ توتەنشە جاعدايلار جۇيەسىندە قىزمەت ەتەدى. جاستىعىنا قاراماستان 13 رەت ءورت وشاعىنا بارىپ, 20 ادامدى قۇتقارعان.
