كەزدەسۋ بارىسىندا پرەزيدەنتكە ەۋرازيالىق دامۋ بانكىنىڭ جۇمىس ناتيجەلەرى مەن ورتا مەرزىمدى جوسپارلارى, سونداي-اق الداعى كەزەڭگە ارنالعان ماكروەكونوميكالىق بولجامدار تۋرالى اقپارات بەرىلدى.
بانك ساراپشىلارىنىڭ باعالاۋى بويىنشا قازاقستاندا ەاەو ەلدەرى اراسىندا ەكونوميكالىق ءوسۋدىڭ ەڭ جوعارى سەرپىنى كۇتىلۋدە.
قاسىم-جومارت توقاەۆ ەۋرازيالىق دامۋ بانكىنىڭ 2022-2026 جىلدارعا ارنالعان ستراتەگياسىنىڭ نەگىزگى باعىتتارىمەن تانىستى. اتاپ ايتقاندا, نيكولاي پودگۋزوۆ پرەزيدەنتكە قازاقستاننىڭ جانە ەاەو-نىڭ باسقا دا مەملەكەتتەرىنىڭ الەۋمەتتىك-ەكونوميكالىق دامۋىنا جاردەمدەسۋگە باعىتتالعان نەگىزگى مەگاجوبالار تۋرالى ايتىپ بەردى.
بانك «سولتۇستىك-وڭتۇستىك», «ەۋروپا-باتىس قىتاي» كولىك دالىزدەرىن قالىپتاستىرۋعا, بىرىڭعاي تاۋار وتكىزۋ جەلىسىن قۇرۋعا جانە ورتالىق ازيانىڭ سۋ-ەنەرگەتيكالىق كەشەنىن جاڭعىرتۋعا باعىتتالعان جوبالاردى ىسكە اسىرۋعا جاردەمدەسۋگە نيەتتى. وسى جوبالارعا ەادب ينۆەستيتسيالارىنىڭ جيىنتىق كولەمى 1,2 ملرد دوللار دەڭگەيىندە جوسپارلانىپ وتىر. جالپى بانك 2026 جىلعا دەيىن قازاقستان ەكونوميكاسىنا كەمىندە 3,8 ملرد دوللار ينۆەستيتسيا سالۋعا نيەتتى.
مەملەكەت باسشىسى ەۋرازيالىق دامۋ بانكىنىڭ ينتەگراتسيالىق پروتسەستەردى دامىتۋداعى بەلسەندى ءرولىن اتاپ ءوتىپ, قازاقستان مەن بۇكىل ەاەو ءۇشىن بەلگىلەنگەن جوبالاردى ىسكە اسىرۋدىڭ ماڭىزدىلىعىن نازارعا الدى.
