پارلامەنت • 28 قازان، 2021

مەملەكەتتىك باسقارۋ دەڭگەيلەرى اراسىندا قۇزىرەتتەر قايتا بولىنەدى

41 رەت كورسەتىلدى

سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باسقارۋ دەڭگەيلەرى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى Egemen.kz.

زاڭ جوباسىن قابىلداۋ ماقساتى – ول مەملەكەتتىك باسقارۋ دەڭگەيلەرى اراسىندا قۇزىرەتتەردى ودان ءارى قايتا ءبولىپ، ونىڭ ازىرلەۋى الدىڭعى اكىمشىلىك رەفورمالاردىڭ جالعاسى بولادى.

جوبا، مەملەكەت باسشىسىنىڭ تاپسىرمالارىن، ستراتەگيالىق قۇجاتتاردا جانە ساراپشىلاردىڭ ۇسىنىمدارىندا ايقىندالعان باسىمدىقتاردى ەسكەرە وتىرىپ دايىندالدى. «ونى ازىرلەۋ كەزىندە ورتالىق جانە جەرگىلىكتى دەڭگەيلەردەگى مەملەكەتتىك فۋنكتسيالاردى تالداۋ بويىنشا اۋقىمدى جۇمىس جۇرگىزىلدى. زاڭ جوباسىندا 46 زاڭنامالىق اكتىگە، ونىڭ ىشىندە 2 كودەكس پەن 44 زاڭعا تۇزەتۋلەر كوزدەلىپ وتىر. زاڭ جوباسى شەڭبەرىندە 68 فۋنكتسيا قايتا بولىنەدى، ونىڭ ىشىندە ۇكىمەتتەن مينيسترلىكتەرگە 63 فۋنكتسيا بەرىلەدى، جەرگىلىكتى اتقارۋشى ورگاندارعا 5 فۋنكتسيا بەرىلەدى.

سونىمەن قاتار، 4 مەملەكەتتىك ورگانعا (ەگترم، ءىىم، ءتسدياوم، قورعانىسمينى) قوسىمشا وكىلەتتىكتەر بەرىلەدى»، - دەدى قر ۇلتتىق ەكونوميكا ءمينيسترى اسەت ەرعاليەۆ. ونىڭ ايتيۋىنشا، جالپى، زاڭ جوباسىن قابىلداۋ مەملەكەتتىك باسقارۋدىڭ ءتيىمدى جۇيەسىن قالىپتاستىرۋدا كەزەكتى قادام بولادى جانە ونىڭ دەربەستىگىن ودان ءارى ارتتىرۋعا ىقپال ەتەدى.

«زاڭ جوباسى باسقارۋ دەڭگەيلەرى اراسىنداعى ناقتى قۇزىرەتتەرىن اجىراتۋ بويىنشا جۇرگىزىلىپ جاتقان ساياساتتىڭ ساباقتاستىعىن قامتاماسىز ەتۋگە باعىتتالعان. جوبانى ىسكە اسىرۋ مەملەكەتتىك بيۋدجەتتەن قوسىمشا قارجى شىعىندارىن تالاپ ەتپەيدى جانە تەرىس الەۋمەتتىك-ەكونوميكالىق جانە قۇقىقتىق سالدارعا اكەپ سوقپايدى»، دەدى مينيستر.

ءوز كەزەگىندە سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مۇشەسى، دەپۋتات ءلاززات رىسبەكوۆا زاڭ جوباسىمەن قازاقستان رەسپۋبليكاسىنىڭ 46 زاڭنامالىق اكتىگە، سونىڭ ىشىندە بيۋدجەتتىك جانە قىلمىستىق اتقارۋ كودەكستەرىنە وزگەرىستەر مەن تولىقتىرۋلار ەنگىزۋ كوزدەلگەنىن ايتتى.

بۇدان بولەك، زاڭ جوباسىمەن جەرگىلىكتى اتقارۋشى ورگانداردىڭ دەڭگەيىنە ءبىلىم جانە عىلىم، يندۋستريا جانە ينفراقۇرىلىمدىق دامۋ، اۋىل شارۋاشىلىعى مينيسترلىكتەرىنىڭ كەيبىر فۋنكتسيالارىن بەرۋ قاراستىرىلعان.

«سونداي-اق، ەكولوگيا، گەولوگيا جانە تابيعي رەسۋرستار، قورعانىس، ىشكى ىستەر، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرىنىڭ كەيىبىر ماسەلەلەردە وكىلەتتىكتەرىن كۇشەيتۋ ماقساتىندا بىرقاتار قوسىمشا فۋنتسيالار بەرىلەدى»، دەدى ل. رىسبەكوۆا.

سوڭعى جاڭالىقتار

ۇقساس جاڭالىقتار