ەكولوگيا • 28 قازان، 2021

اقمولادا 273 قاراعاي قازىپ العان براكونەرلەر ۇستالدى

35 رەت كورسەتىلدى

اقمولا وبلىسىندا براكونەرلەر 273 جاس قاراعاي قازىپ العان، دەپ حابارلايدى Egemen.kz Polisia.kz-كە سىلتەمە جاساپ.

وقيعا 25 قازاندا بولعان. ساعات 18:35-تە زەرەندى اۋداندىق پوليتسيا ءبولىمىنىڭ كەزەكشى بولىمىنە باراتاي اۋىلىنداعى ورمان القابىندا بەلگىسىز ادامدار جاس قاراعاي تۇپتەرىن قازىپ الىپ جاتقانى تۋرالى تەلەفون حابارلاماسى كەلىپ ءتۇستى.

وقيعا ورنىنا جەتكەن پوليتسيا قىزمەتكەرلەرى قاسكۇنەمدەردىڭ جەكە باسىن انىقتادى. ولار بۇرىن سوتتالماعان سەمەي قالاسىنىڭ 55 جاستاعى تۇرعىنى مەن DAF جۇك كولىگىنە اعاش تيەگەن نۇر-سۇلتان قالاسىنىڭ 43 جاستاعى تۇرعىنى بولىپ شىقتى. براكونەرلەر 273 قاراعاي قازىپ الىپ ۇلگەردى. اتالعان فاكتى بويىنشا قر قك 340-بابى 1-بولىگى «اعاشتار مەن بۇتالاردى زاڭسىز كەسۋ، جويۋ نەمەسە ءبۇلدىرۋ» بويىنشا سوتقا دەيىنگى تەرگەۋ امالدارى باستالدى.

ەسكە سالا كەتسەك، اقمولا وبلىسىنىڭ اۋماعىندا تابيعاتتى قورعاۋ زاڭناماسىن بۇزۋشىلىقتاردى، بيولوگيالىق رەسۋرستار وبەكتىلەرىنىڭ زاڭسىز اينالىمىن انىقتاۋ جانە جولىن كەسۋ ماقساتىندا 20 قازان مەن 19 قاراشا ارالىعىندا «براكونەر» جەدەل-الدىن الۋ ءىسشاراسى وتكىزىلەدى.

سوڭعى جاڭالىقتار

ۇقساس جاڭالىقتار