الەم • 28 قازان، 2021

«تاليبان» كورشى ەلدەردىڭ ءسىم باسشىلارىمەن بىرلەسكەن مالىمدەمە جاسادى

35 رەت كورسەتىلدى

اۋعانستانمەن كورشىلەس پاكىستان، تاجىكستان، تۇركىمەنستان، وزبەكستان، قىتاي جانە رەسەي سىرتقى ىستەر مينيسترلەرى بىرلەسكەن مالىمدەمە جاسادى، دەپ حابارلايدى Egemen.kz.

بۇل تۋرالى يران يسلام رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى ءمالىم ەتتى.

ەلدەردىڭ ديپلوماتتارى اۋعانستانداعى جاعداي تۇبەگەيلى وزگەردى دەپ مالىمدەپ، بۇدان بىلاي اۋعانستاننىڭ ىشكى ىستەرىنە ارالاسپاۋ قاعيداتىن، اتاپ ايتقاندا، اۋعان حالقىنىڭ بەرىك بەيبىتشىلىك ورناتۋعا دەگەن ۇمتىلىسىن قۇرمەتتەپ، حالىق ءوز بولاشاعىن ءوز بەتتەرىنشە انىقتاۋى كەرەك دەپ مالىمدەدى. ەلدە تۇراقتىلىق ورنايتىنىنا ءۇمىت ءبىلدىردى.

ديپلوماتتار اۋعانستانداعى پروبلەمانى شەشۋ ءۇشىن بارلىق ەتنوستاردىڭ قاتىسۋىمەن كەشەندى ساياسي قۇرىلىم قۇرۋ كەرەك ەكەنىن ايتتى.

قىتاي سىرتقى ىستەر ءمينيسترى ۆان ي «تاليبان» قوزعالىسى الەمنىڭ باسقا ەلدەرىمەن ديالوگ ورناتۋعا ۇمتىلىپ جاتقانىن جانە حالىقارالىق قاۋىمداستىق اۋعانستانعا، ەلدىڭ دامۋىنا كومەكتەسۋى كەرەك ەكەنىن ايتتى. ۆان ي يراندا وتكەن كونفەرەنتسيادا ۆيدەو ارقىلى سويلەگەن سوزىندە بەيجىڭ اۋعانستان تۋرالى كەلىسسوزدەر ارقاشان جۇرگىزۋگە دايىن ەكەنىن ايتتى.

«تاليبان» الەممەن ديالوگ ورناتۋعا دايىن. قىتاي اۋعانستان كورشىلەرىنىڭ ءۇشىنشى كەزدەسۋىن قولايلى ۋاقىتتا وتكىزەدى»، دەدى مينيستر.

سونداي-اق ديپلوماتتار حالىقارالىق قاۋىمداستىق اۋعان بوسقىندارىن قابىلدايتىن ەلدەرگە، اتاپ ايتقاندا، يران مەن پاكىستانعا جانە باسقا كورشى مەملەكەتتەرگە قارجىلىق قولداۋ كورسەتۋى كەرەك دەپ شەشتى.

سوڭعى جاڭالىقتار

ۇقساس جاڭالىقتار