وكىنىشكە قاراي, وبلىس باسشىلىعى بۇعان دەيىن رەسمي تۇردە ارنايى الەۋمەتتىك قىزمەت كورسەتۋ ورتالىعى دەپ اتالىپ كەلگەن مەكەمەنى جويىپ, 1938 جىلى سالىنعان ەسكى عيماراتتى بۇزۋ تۋرالى شەشىم قابىلدادى.
ناتيجەسىندە 49 ادام تۇراقتى جۇمىسىنان ايىرىلىپ وتىر. وسىعان وراي, وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلنار ابەنوۆا باستاعان جۇمىس توبى قارابالىق اۋدانىنا بارىپ, مەديتسينالىق-الەۋمەتتىك مەكەمەنىڭ ۇجىمىمەن كەزدەستى. جيىنعا اۋدان اكىمى رۋسلان حالىقوۆ تا قاتىستى.
جۇمىسسىز قالعانداردىڭ ىشىندە سانيتارلار مەن مەدبيكەلەر, ازپازدار, ارنايى الەۋمەتتىك قىزمەت كورسەتۋ ورتالىعىنىڭ وزگە دە ماماندارى بار. جيىن بارىسىندا اۋدان باسشىسى ولاردىڭ ارقايسىسىنىڭ ەڭبەكپەن قامتىلۋىن تىكەلەي باقىلاۋىنا الاتىنىن جەتكىزدى. اۋداندىق جۇمىسپەن قامتۋ ورتالىعىنىڭ مالىمەتىنشە, قازىر قارابالىقتا 72 جۇمىس ورنى بوس تۇر. كەزدەسۋگە قاتىسقان جەرگىلىكتى مەكەمەلەر مەن كاسىپورىنداردىڭ باسشىلارى دا ءبىرىنشى كەزەكتە زەينەت جاسىنا از قالعان قىزمەتكەرلەرگە جۇمىس ۇسىندى.
باسقارما باسشىلارىنىڭ ايتۋىنشا, اتالعان ينتەرنات ءۇيىن قالپىنا كەلتىرۋ جانە بۇدان ءارى قاراي ۇستاپ وتىرۋ ءتيىمسىز. ورتتەن كەيىن مەديتسينالىق-الەۋمەتتىك مەكەمەدە تۇرىپ جاتقان 51 ادام كورشىلەس اۋداندارعا كوشىرىلگەن. مەملەكەت قامقورلىعىنداعى قارتتاردىڭ كوبى فەدوروۆ, رۋدنىي جانە قاراسۋ اۋداندارىنداعى الەۋمەتتىك مەكەمەلەرگە ورنالاستىرىلدى. ال قارابالىقتاعى اۋداندىق اۋرۋحانادا جاتقان ينتەرنات ءۇيىنىڭ بۇرىنعى تۇرعىندارى ەمدەۋ مەكەمەسىنەن شىققاننان كەيىن, رۋدنىي قالاسىنداعى №1 ارنايى الەۋمەتتىك قىزمەت كورسەتۋ ورتالىعىنا ورنالاستىرىلادى.
قوستاناي وبلىسى
