جاتتىعۋعا ارنالعان جوبا
بۇل جوبا مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا كورسەتىلگەن مىندەتتەردى ىسكە اسىرۋ اياسىندا قولعا الىنعان بولاتىن. تىڭ قادام نۇر-سۇلتان قالاسى اكىمدىگىنىڭ قولداۋىمەن قالالىق دەنە شىنىقتىرۋ جانە سپورت باسقارماسىنىڭ باستاماسىمەن ىسكە اسىرىلۋدا. ەڭ باستىسى, جاتتىعۋ ساباقتارىن بىلىكتى جاتتىقتىرۋشىلار تەگىن وتكىزەدى. وسىلايشا, مۇنداي اشىق جاتتىعۋلار قالا تۇرعىندارى اراسىندا بىردەن تانىمال بولا باستادى. بالالاردان باستاپ, قارت ادامدارعا دەيىن جاتتىعۋ جاساۋعا قۇمارتىپ كەلەدى.
«قولجەتىمدى سپورت» جوباسى بار ەكەنىن ەستىپ, قۋانىپ قالدىم. قازىر مەنىڭ ۋاقىتىم دا, جاسىم دا دەنساۋلىعىما كوڭىل بولۋگە مۇمكىندىك بەرەدى. ءوز باسىم سكانديناۆيالىق سەرۋەندەۋمەن اينالىسامىن دەپ شەشتىم. مۇندا بالالاردىڭ اقى تولەمەي-اق اينالىسىپ جۇرگەنىنە كۋامىن. بالاسىن قىمبات سەكتسيالارعا جەتەلەپ, اقى تولەۋگە اركىمنىڭ مۇمكىندىگى بولا بەرمەيدى. ال مۇندا بارلىق جاعداي جاسالعان», دەيدى قالا تۇرعىنى نۇرباعيلا داۋىتباەۆا.
جىل بويى قالا تۇرعىندارىنىڭ, سونىڭ ىشىندە بالالاردىڭ دەمالىس ۋاقىتىن ءتيىمدى وتكىزۋ جانە سالاماتتى ءومىر سالتىن ناسيحاتتاۋ ماقساتىندا قولعا الىنعان جوبانىڭ ءمانى مەن ماڭىزى زور. جوبا جوسپارى بويىنشا جاز ايلارىندا جۇگىرۋ, يوگا, زۋمبا, ۆوركاۋت, سكانديناۆيالىق ءجۇرىس, تىنىس الۋ گيمناستيكاسى, ستريتبولدان تەگىن جاتتىعۋلار مەن ساباقتار ۇيىمداستىرىلسا, قىس مەزگىلىندە شاڭعى جانە كونكي تەبۋدەن تەگىن جاتتىعۋلار وتەدى. وسى جوبا اياسىندا بيىلعى اقپان-ناۋرىز ايلارىندا قالالىق دەنە شىنىقتىرۋ جانە سپورت باسقارماسى قالا تۇرعىندارى ءۇشىن كونكيمەن جانە شاڭعىمەن سىرعاناۋدان كاسىبي جاتتىقتىرۋشىلارمەن تەگىن جاتتىعۋلار ۇيىمداستىرعان بولاتىن. ناتيجەسىندە, ەلوردانىڭ 2 مىڭ تۇرعىنى (سونىڭ ىشىندە بالالار دا بار) كونكيمەن جانە شاڭعىمەن سىرعاناۋدى تەگىن ۇيرەندى. جوبا قالامىزدىڭ شەت ايماقتارىنىڭ تۇرعىندارىن دا قامتىدى.
سونىمەن قاتار جوبا اياسىندا جاز ايلارىندا فۋتبولدان Aula ligasy جانە ستريتبولدان Nursultan CUP تۋرنيرلەرى ۇيىمداستىرىلدى. 2 مىڭعا جۋىق بالانى قامتىعان جارىس اتا-انالار مەن بالالار تاراپىنان جوعارى باعاعا يە بولدى. Aula ligasy ءتۋرنيرىنىڭ سوڭعى كەزەڭ ويىندارى «استانا ارەنا» سپورت كەشەنىندە ءوتتى. بۇل ءوز كەزەگىندە بالالاردىڭ سپورتقا دەگەن قىزىعۋشىلىعىن وياتىپ, ىنتاسىن ارتتىردى. الداعى ۋاقىتتا مۇنداي شارالاردى ءداستۇرلى تۇردە وتكىزۋ جوسپارلانىپ وتىر.
سونداي-اق اۋلالاردا تەگىن جاتتىعۋ جۇمىستارىن ۇيىمداستىرۋ ماقساتىندا رەسپۋبليكالىق Aula fit جوباسى قولعا الىندى. نۇر-سۇلتان قالاسىنداعى 6 اۋلادا فۋتبول, شاحمات, ستريت ۆوركاۋت, باسكەتبول, بالالار فيتنەسى بويىنشا ءار اۋلاعا جاتتىقتىرۋشى-نۇسقاۋشىلار بەكىتىلىپ, ءار توقسان سايىن تەگىن جاتتىعۋلار ءوتتى. قالا شەتىندەگى بىرنەشە ورتا مەكتەپتەر مەن سپورت نىساندارىندا (№68 ورتا مەكتەپ, №49 ورتا مەكتەپ, سونداي-اق «نۋرال», «اسپان» سپورت كەشەندەرى مەن «اسىلحان», «پروفيت», «قورعالجىن» سپورت كلۋبى مەن «كۇيگەنجار» تۇرعىن ءۇي الابىندا) جەكپە-جەك سپورت تۇرلەرىنەن ۇيىرمەلەر اشىلىپ, بالالار سپورتپەن تەگىن شۇعىلدانۋدا. ال قالانىڭ 91 جالپى ءبىلىم بەرەتىن مەكتەبىندەگى 52 سپورت سەكتسياسىندا 30 مىڭعا جۋىق بالا سپورتپەن شۇعىلدانادى. سونداي-اق ۇلتتىق سپورت تۇرلەرىن دامىتۋ ماقساتىندا «ارقا Alan» ۇلتتىق سپورت تۇرلەرى ورتالىعى اشىلدى. اتالعان ورتالىقتا قازىرگى تاڭدا 600-دەن اسا بالا شۇعىلدانادى.
قازىرگى تاڭدا قالادا 33 اۋلا كلۋبى جۇمىس ىستەيدى. اتالعان كلۋبتاردا از قامتىلعان وتباسىلاردان شىققان 3 مىڭنان اسا بالا سپورتپەن تەگىن شۇعىلدانادى. قالالىق ءماسليحات دەپۋتاتتارىنىڭ ۇسىنىسىمەن جاستار ساياساتى باسقارماسىنا قاراستى اۋلا كلۋبتارىنىڭ سپورتتىق باعىتتارىن دەنە شىنىقتىرۋ جانە سپورت باسقارماسىنىڭ قۇزىرەتىنە الىپ, دامىتۋ قولعا الىنۋدا.
بيىلعى ءبىرىنشى جارتىجىلدىقتىڭ قورىتىندىسىنا سۇيەنسەك, نۇر-سۇلتان قالاسىندا 378 835 ادام سپورتپەن تۇراقتى تۇردە اينالىسادى. بۇل جالپى قالا حالقىنىڭ 31,5 پايىزىن قۇرايدى. وسى كورسەتكىشتى جىلدىڭ سوڭىنا دەيىن 35 پايىزعا جەتكىزۋ جوسپارلانىپ وتىر. سونداي-اق ۇلكەن تەننيستى بارلىق بالاعا قولجەتىمدى ەتۋ ماقساتىندا جالپى ءبىلىم بەرەتىن مەكتەپ اۋلالارىنداعى جانە ساياباقتارداعى تەننيس كورتتارىن, قالا بويىنشا يگەرىلمەي جاتقان 14 الاڭدى قايتا قالپىنا كەلتىرىپ, پايدالانۋ بويىنشا جۇمىستار جۇرگىزىلۋدە. جوبا اياسىندا ەرەكشە قاجەتتىلىكتەرى بار جانە الەۋمەتتىك از قامتىلعاندار ساناتىنا جاتاتىن بالالار تەننيسپەن تەگىن اينالىسا الادى. قالاداعى مىڭنان استام بالا تەننيسپەن اينالىسسا, جوبا ىسكە اسقاننان كەيىن تەننيسپەن 10 مىڭعا جۋىق بالا اينالىسادى دەپ كۇتىلۋدە.
11 سپورت مەكتەبى بار
ء«تانى ساۋدىڭ – جانى ساۋ» دەيدى دانا حالقىمىز. ەگەمەن ەلدىڭ ەرتەڭى – بۇگىنگى بالاقايلار بولعان سوڭ, دەنى ساۋ ۇرپاق تاربيەلەۋ ماسەلەسى قاشاندا ماڭىزدى. بۇل رەتتە, جاس ۇرپاقتىڭ قاناتىن قاتايتىپ, بۋىنىن بەكىتۋگە بارىنشا كوڭىل ءبولىنىپ كەلەدى. ماسەلەن, بۇگىندە بالالار مەن جاسوسپىرىمدەرگە ارنالعان 11 سپورت مەكتەبى جۇمىس ىستەپ تۇر. 73 بولىمشەدە 8 032 سپورتشى سپورتپەن تەگىن شۇعىلدانادى. ەلوردالىق جاستار دەن قويعان سپورتتىڭ 57 ءتۇرى – وليمپيادالىق سپورت ءتۇرى سانالادى. سونىمەن قاتار ۇلتتىق جانە مۇمكىندىگى شەكتەۋلى جاندارعا ارنالعان سپورت تۇرلەرى دە بار. سپورت مەكتەپتەرىنە شاكىرتتەر جىل سايىن قىركۇيەك-قازان ايلارىندا قابىلدانادى. اتا-انالار بالالارى باراتىن سپورت مەكتەبى مەن اينالىساتىن سپورت ءتۇرىن تاڭداپ, ءوتىنىش جازادى. دارىگەرلىك تەكسەرۋدەن ءوتىپ, بالا دەنساۋلىعىندا سپورتپەن اينالىسۋعا ەش كەدەرگى جوقتىعىن راستايتىن انىقتاما الادى. ءتيىستى قۇجاتتاردى تاپسىرعان سوڭ, بالالار ىرىكتەۋگە شاقىرىلادى. ىرىكتەۋ سىنىندا بالالاردىڭ ءار سپورت ءتۇرى بويىنشا بەلگىلەنگەن نورماتيۆتەردى ورىنداي الۋ قابىلەتى سىنالادى.
بىلتىر قالالىق دەنە شىنىقتىرۋ جانە سپورت باسقارماسىنا باعىنىستى ەكى مەكەمەنىڭ جۇمىس جۇيەسى وزگەردى. «تولاعاي» جوعارى سپورت مەكتەبى» – «سپورتتى وليمپيادا سپورت تۇرلەرى بويىنشا دامىتۋ ديرەكتسياسى» بولىپ تۇرلەندى. ال «جىگەر» سپورتتىق كلۋبى» – «سپورتتى وليمپيادالىق ەمەس تۇرلەرى بويىنشا دامىتۋ ديرەكتسياسى» بولىپ قايتا قۇرىلدى. الداعى ۋاقىتتا باسقارما تاراپىنان ىسساپارعا بولىنەتىن قاراجات تىكەلەي ەكى مەكەمەگە بولىنەدى. سونداي-اق قاراجات ءار سپورت ءتۇرىنىڭ جىلدىق جوسپارى بويىنشا الدىن الا بەكىتىلەدى. وسى وزگەرتۋلەردىڭ ناتيجەسىندە, وليمپيادالىق جانە وليمپيادالىق ەمەس سپورت تۇرلەرىن دامىتۋ ديرەكتسيالارىنىڭ قۇزىرەتى ارتىپ, نۇر-سۇلتان قالاسىنىڭ قۇراما كوماندالارىنىڭ سپورتتىق ءىس-شارالارعا, حالىقارالىق دودالارعا دايىندىق جۇمىستارى ءتيىستى دەڭگەيدە جۇزەگە اسۋدا. سونداي-اق بىلتىردان باستاپ ەلوردالىق سپورتشىلاردىڭ ىسساپارعا بولىنەتىن قاراجات تىكەلەي قوناقۇيلەر مەن سپورتشىلاردىڭ جەكە ەسەپشوتىنا اۋدارىلىپ كەلەدى. بۇل قادام سپورتشىلارعا قولايلى جاعداي جاساپ قانا قويماي, سپورتتاعى سىبايلاس جەمقورلىقتىڭ دا الدىن الاتىنى انىق.
سپورتشىلار قارجىدان قاعىلمايدى
سانانى تۇرمىس بيلەمەي تۇرمايدى. بىلتىردان بەرى جەتىستىككە جەتكەن نۇر-سۇلتان قالاسىنىڭ سپورتشىلارىنا اي سايىنعى تولەماقىنىڭ دا مولشەرى ۇلعايىپ, ونى الاتىن سپورتشىلار سانى 84-تەن 170-كە دەيىن ارتتى. جاڭا قاۋلىعا سايكەس, وليمپيادا ويىندارىنىڭ ەلوردالىق جەڭىمپازدارى 97 334 تەڭگەنىڭ ورنىنان 694 500 تەڭگە الادى. سول سەكىلدى الەم چەمپيوناتىنىڭ ۇزدىكتەرىنە تولەنەتىن اي سايىنعى تولەماقىنىڭ كولەمى دە 93 794 تەڭگەدەن 277 800 تەڭگەگە دەيىن ءوستى. ازيا چەمپيوناتىنىڭ جەڭىمپازدارى اي سايىن 83 176 تەڭگەنىڭ ورنىنا 222 240 تەڭگە, ال قازاقستان چەمپيوناتىنىڭ جەڭىمپازدارى 79 637 تەڭگەنىڭ ورنىنا 166 680 تەڭگە تولەماقى الادى. سونىمەن قاتار 2024 جىلعا دەيىن جاتتىقتىرۋشىلار مەن سپورتتاعى وقىتۋشىلاردىڭ جالاقىسى 100 پايىزعا وسەدى.
50 سپورتشىعا ءبىلىم گرانتتارى بەرىلدى
بيىل ەلوردالىق سپورتشىلارعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دەنە شىنىقتىرۋ جانە سپورت ماماندىقتارىنا قالا اكىمىنىڭ 50 ءبىلىم گرانتى بەرىلدى. «نەبىر مىقتى سپورتشىلار, ەل نامىسىن حالىقارالىق ارەنالاردا قورعاپ جۇرگەن ساڭلاقتار مەملەكەتتىك گرانتقا ىلىنبەگەن جاعدايدا قۇجاتىن قولجەتىمدى ماماندىقتارعا تاپسىرۋعا ءماجبۇر بولادى. سونىڭ سالدارىنان ءبىز مىقتى ماماندار شىعادى دەگەن سپورتشىلارىمىزدان ايىرىلىپ قالىپ جاتامىز. سوعان بايلانىستى, قالا اكىمى التاي كولگىنوۆكە ۇسىنىس جاسالىپ, ەلوردالىق 50 سپورتشىعا قالا اكىمىنىڭ گرانتىن بەرۋ تۋرالى شەشىم قابىلداندى. جوعارى وقۋ ورىندارىن اياقتاعان سوڭ ماماندار جاتتىقتىرۋشى, نۇسقاۋشى رەتىندە قالالىق سپورت ۇيىمدارىنا جۇمىسقا قابىلدانادى. ءوز كادرلارىمىزدى وسىلاي دايىندايمىز», دەيدى دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ.
سونداي-اق بيىل بالالار مەن جاسوسپىرىمدەرگە ارنالعان سپورت سەكتسيالارىن جان باسىنا شاققانداعى نورماتيۆتىك قارجىلاندىرۋ باعدارلاماسى جۇزەگە اسىرىلۋدا. اتالعان باعدارلاما اياسىندا مەملەكەت تاراپىنان 400 ملن تەڭگە قاراجات ءبولىنىپ, قازىرگى تاڭدا 9 682 بالاعا ۆاۋچەر بەرىلدى.
سپورتتىق ينفراقۇرىلىم دامىپ كەلەدى
بۇگىندە قالادا 4 دەنە شىنىقتىرۋ جانە ساۋىقتىرۋ كەشەنى سالىنۋدا. الەمدىك ارەنادا ەلدىڭ اتىن شىعارىپ, مەرەيىن ۇستەم ەتەر سپورت سالاسىن دامىتۋدىڭ العاشقى قادامى قالا تۇرعىندارى مەن قوناقتارىنىڭ سپورت نىساندارىنا قولجەتىمدىلىگىن ارتتىرۋدان باستالادى. جىل سوڭىنا دەيىن قالا ماڭىنداعى «كوكتال-2», ء«وندىرىس», «تەمىرجولشىلار», «ۇركەر» تۇرعىن الاپتارىندا دەنە شىنىقتىرۋ-ساۋىقتىرۋ كەشەندەرى پايدالانۋعا بەرىلمەك. سارىارقا, بايقوڭىر, ەسىل, الماتى اۋداندارىندا اشىلاتىن سپورت كەشەندەرى بالالار مەن جاسوسپىرىمدەردى عانا ەمەس, اتالعان اۋدان تۇرعىندارىنىڭ دا سپورتپەن شۇعىلدانۋىنا جاعداي جاسايدى.
قالا اكىمى التاي كولگىنوۆتىڭ قولداۋىمەن «استانا ارەنا» سپورت كەشەنىنىڭ جانىنان «جاۋىنگەرلىك ونەر ورتالىعى» مەن «بوكس ورتالىعى» اشىلدى. جيرەنتاەۆ كوشەسىندە وڭ جاعالاۋ تۇرعىندارى ءۇشىن جەكپە-جەك ورتالىعى, تاۋەلسىزدىك سارايىندا كوركەم گيمناستيكا ورتالىعى مەن «سارىارقا» ۆەلوترەگى جانىنان دزيۋدو ورتالىعى ءوز قىزمەتىنە كىرىستى. بىرقاتار سپورتتىق نىسانعا اعىمداعى جانە كۇردەلى جوندەۋ جۇمىستارى جۇرگىزىلىپ جاتىر. اتالعان ورتالىقتار زاماناۋي قۇرال-جابدىقتارمەن جابدىقتالىپ, قازىرگى تاڭدا بالالار تەگىن جاتتىعۋ جۇمىستارىن جۇرگىزۋدە.
بيىل مەملەكەت-جەكە سەرىكتەستىك اياسىندا «قازاقستان» سپورت سارايىنا كۇردەلى جوندەۋ جۇمىستارىن جۇرگىزۋ ماقساتىندا سلوۆاكيالىق قۇرىلىس كومپانياسىمەن كەلىسىمشارت جاسالدى. ق.مۇڭايتپاسوۆ اتىنداعى ورتالىق ستاديونعا دا كۇردەلى جوندەۋ جۇمىستارى جۇرگىزىلەدى. «جۇمىسپەن قامتۋ-2020» جول كارتاسى باعدارلاماسى اياسىندا قالاداعى «تولقىن», «جەڭىس», «بارىس» سپورت كەشەندەرىندە كۇردەلى جوندەۋ جۇمىستارى قولعا الىندى. سونىمەن قاتار مەملەكەتتىك باعدارلاما اياسىندا «ۇرمەلى فۋتبول مانەجى» دە اۋىستىرىلدى. «استانا ارەنا» ستاديونىنىڭ فۋتبول الاڭى دا اۋىستىرىلىپ, نىسان قازىر حالىقارالىق فۋتبول قاۋىمداستىعىنىڭ (FIFA) تالاپتارىنا ساي كەلەدى.
بىلتىر قاراشادا جەڭىل اتلەتيكالىق سپورت مانەجى پايدالانۋعا بەرىلدى. زاماناۋي ۇلگىدە جوعارى تەحنولوگيامەن جابدىقتالعان كەشەندە جەڭىل اتلەتيكانىڭ بارلىق ءتۇرىن دامىتۋعا جاعداي جاسالعان. سونىمەن قاتار مانەجدە سپورتشىلار قازاقستان جانە الەم چەمپيوناتتارىنا, وليمپيادا ويىندارىنا الاڭسىز دايىندالۋى ءۇشىن بارلىق مۇمكىندىك قاراستىرىلعان. قازىرگى تاڭدا قالالىق جەڭىل اتلەتيكا فەدەراتسياسىنىڭ جۇمىسى جاندانىپ, جەڭىل اتلەتيكاداعى 48 باعىتتىڭ 22 باعىتى قارقىندى دامۋدا. سونداي-اق بيىل قالادا سپورت كوليزەيى اشىلدى. ترياتلون پاركى, ەۇۋ عيماراتى جانىنداعى كوپىر استىندا ارنايى سپورت الاڭدارى جاساقتالدى. قالاداعى بارلىق ساياباقتا Street Workout الاڭدارى مەن جاتتىعۋعا ارنالعان قۇرال-جابدىقتار بار.
شاھارداعى ۆەلوجولدار مەن جۇگىرۋ جولدارىنىڭ دا كولەمى جىل ساناپ ۇلعايىپ كەلەدى. قازىرگى تاڭدا قالا اۋماعىندا ۆەلوسيپەد جولىنىڭ ۇزىندىعى 70 شاقىرىمدى قۇرايدى. الداعى ۋاقىتتا ۇزىندىعى 123 شاقىرىم بولاتىن ۆەلوجول توسەلمەك. سونىمەن قاتار مۇمكىندىگى شەكتەۋلى جاندارعا ارنالعان پاراليمپيادالىق جاتتىعۋ ورتالىعى جۇمىس ىستەيدى. حالىقارالىق دەڭگەيدەگى مامانداندىرىلعان ورتالىقتا 17 سپورت ءتۇرى بويىنشا تەگىن جاتتىعۋ وتكىزىلەدى. بۇگىندە ورتالىق ايىنا 3 400-دەن اسا ادامدى قابىلدايدى.
تاعى ءبىر ماڭىزدى قادام رەتىندە قالالىق دەنە شىنىقتىرۋ جانە سپورت باسقارماسىنىڭ تاپسىرماسى نەگىزىندە «بالالار-جاسوسپىرىمدەر سپورت مەكتەبى, مۇگەدەك سپورتشىلارعا ارنالعان سپورت مەكتەبى» كمم-دە اشىلعان سلەدج حوككەيدى ايتۋعا بولادى. بۇل سپورت تۇرىنەن العاشقى 3 دايارلاۋ توبى بار. جالپى, سپورتشىلار سانى – 15 ادام. جاتتىعۋلار «تارلان» مۇز ايدىنىندا وتەدى. سونداي-اق بيىل ەلوردادا شايبالى حوككەيدەن ەلىمىزدەگى تۇڭعىش ايەلدەر اكادەمياسى اشىلدى. اقش-تاعى حوككەي كلۋبىنىڭ جاتتىقتىرۋشىسى بولعان بۇلبۇل قارتانبايدىڭ باستاماسىمەن اشىلعان اكادەمياعا قالالىق اكىمدىك جان-جاقتى قولداۋ كورسەتۋدە. اتالعان اكادەميادا بالالار تەگىن جاتتىعا الادى.
تسيفرلاندىرۋ – جەڭىستىڭ باستاۋى
مەملەكەت باسشىسىنىڭ تسيفرلاندىرۋ تۋرالى تاپسىرماسىن ورىنداۋ ماقساتىندا جوسپار جاسالۋدا. وسىعان وراي E-sport بىرىڭعاي تسيفرلى پلاتفورماسى ىسكە قوسىلدى. اتالعان پلاتفورما قۇراما سپورتشىلارى مەن جاتتىقتىرۋشىلارى تىزىمىنەن باستاپ, جارىس قورىتىندىلارىنىڭ حاتتامالارىن, وقۋ-جاتتىعۋ پروتسەسىن جانە سپورت نىساندارىنىڭ جۇمىسىن قاداعالاۋعا مۇمكىندىك بەرەدى. سونداي-اق الداعى ۋاقىتتا قالا تۇرعىندارى ءۇشىن Nur-Sultan Sport-City قوسىمشاسى جاسالۋدا. اتالعان قوسىمشا ارقىلى قالا تۇرعىندارىنا سپورت نىساندارى مەن سپورت ۇيىرمەلەرى, قالاداعى سپورتتىق ءىس-شارالار تۋرالى اقپاراتتار قولجەتىمدى بولادى.
مۇمكىندىگى شەكتەۋلى بالالارعا ات سپورتى مانەجى اشىلادى
جىل سوڭىنا دەيىن ەرەكشە قاجەتتىلىگى بار بالالاردى يپپوتەراپيا ادىسىمەن ەمدەيتىن ات سپورتى كەشەنىن اشۋ جوسپارلانۋدا. ورتالىق مۇمكىندىگى شەكتەۋلى بالالاردى وڭالتۋ جۇمىستارىن جۇرگىزبەك. سونداي-اق ات سپورتى مانەجى ۇلتتىق سپورت تۇرلەرىن دامىتىپ, رەسپۋبليكالىق جانە حالىقارالىق دەڭگەيدەگى جارىستار وتكىزۋگە مۇمكىندىك بەرەدى. بۇعان قوسا, مانەج جانىنان ۇزىندىعى 13,2 شاقىرىمدى قۇرايتىن اتپەن جۇرۋگە ارنالعان جول توسەلدى.
ەلوردانىڭ سپورت سالاسىنداعى ەڭ باستى جاڭالىعى رەتىندە سپورتشىلارعا ارنالعان العاشقى مەديتسينالىق ورتالىقتىڭ اشىلۋىن ايتۋعا بولادى. بيىل پايدالانۋعا بەرىلەتىن بۇل ورتالىقتا سپورتشىلار ارنايى دارىگەرلىك تەكسەرۋدەن ءوتىپ, سپورت دارىگەرلەرى, پسيحولوگتەر مەن سپورتتىق ماسساج جاساۋشىلار, سپورتشىلاردىڭ تاماقتانۋىن قاداعالايتىن ارنايى مامانداردىڭ كومەگىنە جۇگىنە الادى. سونىمەن قاتار ديسپانسەردە سپورتشىلاردىڭ ەم الۋىن بىلىكتى سپورت دارىگەرلەرى باقىلاۋدا ۇستايدى. بۇعان دەيىن سپورتشىلارعا №5 قالالىق ەمحانا مەديتسينالىق قىزمەت ۇسىنىپ كەلگەن ەدى. مۇنداي مەديتسينالىق كومەككە جۇگىنۋ قولايسىزدىق تۋعىزىپ, ولاردىڭ دايىندىعى مەن ساۋىقتىرۋ پروتسەسىنە كەرى اسەرىن تيگىزگەن سوڭ بۇل ماسەلەنى سپورتشىلار قالا اكىمىمەن كەزدەسۋدە كوتەردى. سپورتشىلار شاھار باسشىسىنان جەكە مەديتسينالىق مەكەمە ءبولۋدى سۇرادى. ەلوردالىق سپورتشىلاردىڭ بۇل ۇسىنىسى قالا اكىمى التاي كولگىنوۆتىڭ تاراپىنان قولداۋ تاپتى.
ءىرى سپورتتىق ءىس-شارالار ورتالىعى
بۇگىندە ەلوردادا سپورتتىڭ ءار تۇرىنەن ءىرى رەسپۋبليكالىق, حالىقارالىق شارالار وتكىزىلىپ كەلەدى. بۇل قادام تۇرعىنداردىڭ سپورتقا دەگەن قىزىعۋشىلىعىن ارتتىرىپ, قالاداعى سپورتتىق ينفراقۇرلىمنىڭ دامۋىنا جاعداي جاسايدى. جىل باسىنان بەرى قالا اكىمدىگىنىڭ قولداۋىمەن گرەك-ريم كۇرەسىنەن حالىقارالىق تۋرنير, جەڭىل اتلەتيكادان قالا چەمپيوناتى, جۇزۋدەن قالانىڭ اشىق چەمپيوناتى سىندى ءىرى ءىس-شارالار ءوتتى. سونىمەن قاتار جىل سايىن قازاق كۇرەسىنەن «قازاقستان بارىسى», بايگە تۇرلەرىنەن «ەلباسى كۋبوگى», كوكپار, تەڭگە ءىلۋ, اۋدارىسپاق سەكىلدى ءىرى دودالار ۇيىمداستىرىلۋدا. مۇنىڭ ءبارى ەلوردادا ۇلتتىق سپورت تۇرلەرىنىڭ قارقىندى دامىپ كەلە جاتقانىنىڭ كورىنىسى.
سونداي-اق بۇقارالىق سپورتتى دامىتۋعا نەگىزدەلگەن استانا مارافون, استانا دۋاتلون, قىسقى ترياتلون, ۆەلوشەرۋ, «بۇرقاسىن» قىسقى فەستيۆالى سەكىلدى ءىرى دودالار ەلوردالىقتاردىڭ اسىعا كۇتەتىن ءىس-شارالارىنا اينالدى. ەلدەگى پاندەميا كەزىندە قالا تۇرعىندارى اراسىندا ونلاين جۇگىرۋ,ونلاين ۆەلوشەرۋ سىندى ونلاين جارىستار دا تۇراقتى تۇردە وتكىزىلىپ كەلەدى.
