فورۋم سەسسيالارىنىڭ تاقىرىپتارى كوروناۆيرۋس پاندەمياسى كەزىندە بۇكىل الەمدە بولىپ جاتقان جەدەلدەتىلگەن تسيفرلى ترانسفورماتسيا باعىتىنا ارنالدى.
وزەكتى ماسەلەلەردى تالقىلاۋعا ەل ۇكىمەتى, كورپوراتيۆتىك سەكتور, ساراپشىلار قاۋىمداستىعى وكىلدەرى, تسيفرلى قىزمەتتەردى شەتەلدىك ازىرلەۋشىلەر, IT-كومپانيالاردىڭ باسشىلارى جانە ت.ب. تۇلعالار قاتىستى.
فورۋم سەسسيالارى بارىسىندا «اشىق يننوۆاتسيالار مەن جاڭا تسيفرلىق شىندىقتىڭ مىندەتتەرى», «تسيفرلاندىرۋ جانە قۇقىق: جاڭا سىناقتار», «قازاقستاندىق ستارتاپتار سىرتقى نارىققا قالاي شىعادى؟», «اۋتسورسينگ. قازاقستان», «قازاقستاندىق ۋنيۆەرسيتەتتەر قالاي جاڭا تەحنولوگيالىق جوبالاردىڭ پايدا بولۋ الاڭىنا اينالۋى مۇمكىن؟» دەگەن تاقىرىپتار تالقىلاندى.
فورۋم كەزىندە نۇرسۇلتان نازارباەۆ قورى ۇيىمداستىرعان KazRoboProject-2021 روبوتتەحنيكا بايقاۋىندا جانە Smart Zholy حاكاتونىندا جەڭىمپاز بولعانداردىڭ ەسىمى انىقتالدى. بۇل فورۋمنىڭ ماڭىزدى ءبولىمى بولدى. جىل سايىن روبوتتەحنيكا بويىنشا چەمپيونات (10 جاستان 21 جاسقا دەيىنگى جاستار اراسىندا وتكىزىلەدى) ەلىمىزدىڭ بارلىق ايماقتارىنان ونداعان جاس ونەرتاپقىشتاردى انىقتايدى. Smart Zholy باعدارلاماسى پەرسپەكتيۆالى IT-ستارتاپتاردى قولداۋعا, ولاردىڭ ۇزدىكتەرىن حالىقارالىق دەڭگەيگە شىعارۋعا باعىتتالعان. باعدارلاما جەڭىمپازدارى بىرنەشە جىلدان بەرى سينگاپۋردەگى وڭتۇستىك-شىعىس ازياداعى ەڭ ءىرى ستارتاپ الاڭىندا ءوز جوبالارىن ۇسىنىپ كەلەدى.
KazRoboProject-2021 بايقاۋىنىڭ «كونتسەپت» نوميناتسياسى بويىنشا 10 جاستان 15 جاسقا دەيىن – Trashbot جوباسى بار Jylyoi tehnik كومانداسى ۇزدىك دەپ تانىلدى. بۇل سۋداعى قوقىستى جيناۋعا ارنالعان قۇرىلعى. ول ءجۇزىپ ءجۇرىپ كونتەينەردە پلاستماسسانى جانە باسقا قالقىمالى قوقىستاردى جينايدى. بۇل مودەلدە پروتسەستى اۆتوماتتاندىرۋ ەلەمەنتتەرى, داتچيكتەر مەن اقپاراتتى بەرۋ قۇرىلعىلارى بار. ال 16 مەن 21 جاس ارالىعىندا – Eco-Robot جوباسى بويىنشا Team Atom كومانداسى تاڭدالدى. بۇل روبوت قالا كوشەلەرىندەگى قوقىستى وفلاين رەجىمدە جانە كامەرا مەن ينتەرنەتتى قولدانا وتىرىپ باسقارۋ ارقىلى جويادى. «پروتوتيپ» نوميناتسياسى بويىنشا 10-15 جاس ارالىعىندا – «اقىلدى Terminal» جوباسىن دايىنداعان Smart-TOP كومانداسى جەڭىسكە جەتتى. ولار مەكەمەنىڭ كىرە بەرىسىنە ورنالاستىرۋعا بولاتىن, دەنە تەمپەراتۋراسىن ولشەيتىن, انتيسەپتيكالىق زاتتار شاشاتىن جانە كەلۋشىلەرگە ماسكا تاراتاتىن تەرمينال ويلاپ تاپتى. 16 مەن 21 جاس ارالىعىندا «كۆانتوريۋم» كومانداسى جەڭىمپاز رەتىندە تانىلدى. بۇل كوماندا 18 650 اككۋمۋلياتوردى اۆتوماتتى تۇردە زاريادتاۋعا ارنالعان ستانسا ويلاپ تاپتى. پاۆلودار كوللەدجىنىڭ جوعارى كۋرس ستۋدەنتتەرى باتارەيالاردى ۇلكەن كولەمدە ۇزدىكسىز زاريادتاۋعا ارنالعان تولىق اۆتوماتتاندىرىلعان كەشەن ازىرلەدى. باتارەيالار قۇرىلعىعا كونتەينەردەن جەتكىزىلەدى. باتارەيانىڭ زاريادتاۋعا جارامدىلىعى مەن پوليارلىعى تەكسەرىلەدى.
Smart Zholy حاكاتونىنا قاتىسۋشىلارعا قازاقستان رەسپۋبليكاسى پرەزيدەنتى ءىس باسقارماسىندا ىشكى پروتسەستەردىڭ تيىمدىلىگىن ارتتىرۋ ءۇشىن جاڭا تسيفرلى شەشىمدەردى قۇرۋ تاپسىرماسى جۇكتەلگەن بولاتىن. اتاپ ايتقاندا, بۇل ءموبيلدى قوسىمشالار, زاماناۋي تەحنولوگيالار ارقىلى قولداناتىن باعدارلامالىق شەشىمدەر بولۋى مۇمكىن ەدى.
حاكاتونعا 35-تەن استام قاتىسۋشى ءوتىنىم جىبەردى. ولاردىڭ اراسىنان 5 كوماندا شەشۋشى كەزەڭگە ءوتتى. Smart Zholy بايقاۋىنىڭ ناتيجەسىندە «Automatico كومانداسى» جەڭىمپاز اتاندى. كوماندا ترانسپورت سالاسى ءۇشىن پروتسەستەردى اۆتوماتتاندىرۋ مەن الماستىرۋدىڭ ءتيىمدى شەشىمىن قۇردى.
