ەكونوميكا • 26 قازان، 2021

بازالىق مولشەرلەمە ينفلياتسيانى تەجەي مە؟

174 رەت كورسەتىلدى

ۇلتتىق بانك اقشا-نەسيە ساياساتى 25 قازان كۇنگى قابىلداعان شەشىمىندە قازىر 9،5 بولىپ تۇرعان بازالىق پايىزدىق مولشەرلەمەنى 9،75-كە دەيىن كوتەردى. وسىلايشا، بازالىق ستاۆكا ءبىر جارىم جىلعا سوزىلعان ۇزىلىستەن سوڭ قاتارىنان ءۇش رەت جوعارىلاپ وتىر.  

ينفلياتسيا داۋىلى قاشان سايابىرلايدى؟

ساراپشىلار بازالىق مولشەرلەمەنىڭ جوعارىلايتىنىن تاياۋدا عانا بىلدىرگەن بولجامدارىندا ايتقان بولاتىن. ويت­كەنى قىركۇيەكتە جىلدىق ماندەگى ينفليا­تسيانىڭ 8،9 پايىزعا دەيىن كوتەرىلۋى وسىعان سەبەپ. الايدا بازالىق ستاۆكا­نىڭ وسىنىڭ الدىندا 9،25-تەن 9،5-كە كوتەرىلگەنى باعا وسىمىنە تەجەۋ سالا العان جوق.

وتىمدىلىكتى ۇسىنۋ جونىندەگى تۇراق­تى قولجەتىمدى وپەراتسيالار بو­يىن­شا مول­شەرلەمە 10،75، ال وتىمدىلىكتى الۋ جونىن­دەگى تۇراقتى قولجەتىمدى وپەراتسيالار بو­يىنشا مولشەرلەمە 8،75 پايىز بولا­دى. شەشىم ەكونوميكادا ساقتالىپ وتىر­عان ينفلياتسياعا قارسى قىسىم اياسىندا قابىلداندى. سونىڭ ناتيجەسىندە ينفلياتسيا 2021 جىلى 7،5-8،5 پايىز بولجامدى اۋقىمنان، الەمدىك نارىقتارداعى باعالاردىڭ وسۋىنەن، ساۋدا ارىپتەس ەلدەردەگى ينفلياتسيانىڭ جەدەلدەۋىنەن جانە ەل ىشىندەگى جوعارى ينفلياتسيالىق كۇتۋلەردەن جوعارى قالىپتاسادى دە­لىنگەن ۇلتتىق بانك مالىمدەمەسىندە.

بۇل ورايدا ۇلتتىق بانك بازالىق ستاۆ­كانى كوتەرۋگە سەبەپ بولعان بىرنەشە فاكتوردى تىزبەلەيدى. العاشقىسى – سىرتقى ينفلياتسيالىق احۋال. بۇل الەمدەگى ازىق-ت ۇلىك باعاسىنىڭ جوعارى بولۋىنا، جەتكىزىلىم قاتارىنىڭ ۇزىلىستەرىنە، تاسىمالداۋ، شيكىزات پەن ەنەرگيا تاسىمالداۋشىلار قۇنىنىڭ وسۋىنە، سونداي-اق ىشكى سۇرانىستىڭ قالپىنا كەلۋىنە بايلانىستى. ەكىنشىسى – نەگىزگى ساۋدا ارىپتەس ەلدەردەگى جوعارى ينفلياتسيا. قىتايدا كومىر مەن ەنەرگيانى كوپ قاجەت ەتەتىن سالالار ونىمىنە باعانىڭ جوعارىلاۋى سالدارىنان وندىرۋشىلەر باعاسىنىڭ يندەكسى 10،7 پايىزعا دەيىن وسكەن. قىركۇيەكتە ەو-دا جىلدىق ينفلياتسيانىڭ 3،6، رەسەيدە 7،4 پايىزعا دەيىن جىلدامداۋى ءبىزدىڭ نارىققا اسەر ەتپەي قويمايدى. ەلىمىزدە دە قىركۇيەك ايىندا جىلدىق ينفلياتسيانىڭ 8،9 پايىز بولۋى جىلدىق ينفلياتسيانىڭ قولتىعىنا سۋ بۇركىپ تۇر.

«ازىق-ت ۇلىك ينفلياتسياسى جە­مىس-كوكونىس ونىمدەرى باعاسىنىڭ ماۋسىمدىق تومەندەۋىنە قاراماستان 2021 جىلعى قىركۇيەكتە جىلدامداۋىن جالعاستىرىپ، جىلدىق ماندە 11،5 پايىز بولدى. جەمشوپ داقىلدارى، ديزەل وتىنى، ەلەكتر ەنەرگياسى جانە بيداي باعاسىنىڭ كوتەرىلۋى كەزىندە وندىرۋشىلەردىڭ وزىندىك قۇنىنىڭ ءوسۋى ناتيجەسىندە ەت (10،3 پا­يىز)، نان-توقاش (8،7 پايىز) جانە ءسۇت ونىمدەرى (8 پايىز) باعاسىنىڭ جىل­دىق ءوسۋى ازىق-ت ۇلىك ينفلياتسياسىنىڭ جەدەل­دەۋىنە نەگىزگى سەرپىن بولدى. قىر­كۇيەك قورىتىندىسى بويىنشا ازىق-ت ۇلىككە جاتپايتىن ينفلياتسيا جىل­دىق ماندە 7،5 پايىز بولدى. وسى جىل­دامداۋعا ءۇي تۇرمىسىنداعى زاتتار، كيىم-كەشەك پەن اياق كيىم، ججم مەن قات­تى وتىن باعاسىنىڭ جىلدىق ءوسۋى نە­گىزگى ۇلەس قوسادى. كيىم-كەشەك پەن اياق كيىم باعاسى يمپورتتىق تاۋار­لار باعاسىنىڭ جوعارىلاۋىنا، تۇتى­نۋ­­شىلىق سۇرانىستىڭ قالپىنا كەلۋى­نە جانە حالىقتىڭ ناقتى اقشالاي تابىسىنىڭ وسۋىنە بايلانىستى ارتۋدا. ءوز كەزەگىندە، وزىندىك قۇننىڭ وسۋىنە جانە ەكونوميكالىق بەلسەندىلىكتىڭ قالپىنا كەلۋىنە بايلانىستى جانار-جاعارماي مەن قاتتى وتىن باعاسى ارتتى» دەلىنەدى باس بانكتىڭ حابارلاماسىندا.

ۇلتتىق بانكتىڭ حابارلاۋىنشا، 2022 جىلدىڭ ورتاسىنان كەيىن عانا دامىعان ەلدەردە ينفلياتسيا قارقىنى باياۋلاماق. ناقتىراق ايتقاندا، پاندەمياعا دەيىنگى كورسەتكىشكە ورالادى.

«دامۋشى ەلدەردە ۆاليۋتا باعام­دارى­نىڭ السىرەۋى سالدارىنان ازىق-ت ۇلىك، مۇناي جانە يمپورتتىق تاۋارلار باعاسىنىڭ وسۋىنە بايلانىستى ينفلياتسيالىق قىسىم ساقتالادى. جوعارى سىرتقى جانە ىشكى ينفلياتسيالىق احۋال جاعدايىندا ۇلتتىق بانك 2022 جىلى 4-6 پايىز دالىزىنە كىرۋ ماقساتىندا اقشا-كرەديت ساياساتىن قالىپقا كەلتىرۋدى جالعاستىرۋدا» دەلىنەدى ۇلتتىق بانك مالىمدەمەسىندە.

بازالىق مولشەرلەمە وسكەنگە دەيىنگى وي

DAMU Capital Management باس ديرەكتورى مۇرات قاستاەۆتىڭ ايتۋىنشا، باعانىڭ بەلسەندى ءوسىمى – الەمدە بولىپ جاتقان ءۇردىس.

«الەمدىك ەكونوميكانىڭ كەنەتتەن قالپىنا كەلۋىنە بايلانىستى كومپانيالار تاۋار سۇرانىسىن وتەپ ۇلگەرە الماي جاتىر. ارينە، ينفلياتسيا وسىمىنە سەبەپ بولاتىن ىشكى فاكتورلار دا بار. بۇل – جوعارعى بيۋدجەتتىك شىعىندار جانە وتىن باعاسىنىڭ ءوسۋى» دەيدى ساراپشى.

بۇعان دەيىن «فريدوم فينانس» اق ساراپشىسى دانيار ورازباەۆ مولشەرلەمە 25 بازالىق تارماققا دەيىن كوتەرىلەدى دەگەن بولجام ايتقان ەدى. ول كۇزدە جەمىس-جيدەك پەن كوكونىس باعاسى وسەدى ءارى ديزەلدى وتىن باعاسى دا قىمباتتايدى، ونداي جاعدايدا ينفليتسيانىڭ تومەندەۋىن كۇتە المايمىز دەگەن بولاتىن.

ال «رەنەسسانس كاپيتال» ينۆەستي­تسيا­لىق كومپانياسىنىڭ رەسەي جانە تمد بويىنشا ەكونوميسى اندرەي مەلا­ششەنكو ءبىر قىزىعى، بازالىق ستاۆكا 9،5 پايىز كۇيىندە ساقتالادى دەگەن پىكىر ايتىپ، وعان ءوز دالەلدەرىن دە كەلتىرگەن. «اپتالىق كورسەتكىشتەر الەۋمەتتىك ماڭىزدى ونىمدەر باعاسىنىڭ وسكەنىن ايتىپ تۇرسا دا ءبىزدىڭ باعالاۋىمىزشا، ينفلياتسيا ءوزىنىڭ ەڭ جوعارعى مانىندە تۇر جانە جىل سوڭىنا تامان تومەندەۋى ءتيىس. قاداعالاۋشى شەشىمىنە اسەر ەتۋى مۇمكىن پروينفلياتسيالىق فاكتورلار قاتارىندا – رەالدى جالاقىنىڭ بەرىك ءوسىمى (II توقساندا 9،8 پايىز)، تۇتىنۋشىلىق نەسيەنىڭ كۇرت ءوسىمى (تامىزدا 33،8 پايىز) بار» دەگەن ەدى.

تەلەگرامداعى Tengenomika كانالى­نىڭ جازۋىنشا، 4-6 پايىز دالىزىنە كىرۋ ءۇشىن ۇكىمەت پەن جەرگىلىكتى اتقارۋشى ورگانداردىڭ ءتيىمدى شارالار قابىلداي الۋى دا وتە ماڭىزدى.

ەسكە سالساق، رەسەي بانكى دە بىرنەشە كۇن بۇرىن عانا بازالىق ستاۆكانى 6،75 پايىزدان 7،5 پايىزعا دەيىن جوعارىلاتتى. وسىلايشا، رەسەي ورتالىق بانكى بازالىق ستاۆكانى التىنشى رەت قاتارىنان ءوسىرىپ وتىر.

ۇلتتىق بانكتىڭ اقشا-نەسيە ساياساتى جونىندەگى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2021 جىلعى 6 جەلتوقساندا نۇر-سۇلتان قالاسىنىڭ ۋاقىتى بويىنشا 15:00-دە جاريالانادى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار