رۋحانيات • 26 قازان، 2021

«كۇي اناسىنىڭ» 160 جىلدىعىنا وراي 160 وقۋشىعا دومبىرا سىيلاندى

258 رەت كورسەتىلدى

داريعا نازارباەۆا 160 وقۋشىعا دومبىرا تارتۋ ەتتى. بۇل ءىسشارا دينا نۇرپەيىسوۆانىڭ 160 جىلدىعىنا وراي ۇيىمداستىرىلىپ وتىر، دەپ حابارلايدى Egemen.kz

«دەگدار» گۋمانيتارلىق قورىنىڭ جاڭا قايىرىمدىلىق جوباسى كۇيشى دينا نۇرپەيىسوۆانىڭ 160 جىلدىعى اياسىندا ۇيىمداستىرىلدى. جوبانىڭ گۋمانيتارلىق ماقساتى – دومبىرا ساتىپ الۋعا مۇمكىندىگى جوق تالانتتى بالالارعا قازاقتىڭ كيەلى مۋزىكالىق اسپابىن تابىستاۋ. ارنايى جاسالعان 160 دومبىرا اتا-انا قامقورلىعىنسىز قالعان بالالار مەن از قامتىلعان وتباسىلاردان شىققان بۇلدىرشىندەرگە ۇلەستىرىلدى. سونىمەن قاتار بۇل جوبا «كۇي اناسى» اتانعان دينا نۇرپەيىسوۆانىڭ باي مۇراسىن دارىپتەۋدى، ۇلتتىق ونەردىڭ ناسيحاتتالۋىنا ۇلەس قوسۋدى كوزدەيدى.

«دەگدار» گۋمانيتارلىق قورى قامقورلىق كەڭەسىنىڭ توراعاسى داريعا نازارباەۆا اتاپ وتكەندەي، دومبىرا ەجەلدەن بەرى مۋزىكالىق مادەنيەتىمىزدىڭ باستى سيمۆولى بولىپ كەلەدى.

«دەگدار» گۋمانيتارلىق قورى مەكتەپتەر مەن بالالار انسامبلدەرىنە  مۋزىكالىق اسپاپتار سىيلايدى، سونىڭ ارقاسىندا دومبىرا تارتىپ ۇيرەنسەم دەگەن تالاي بالانىڭ تىلەگى ورىندالادى. بۇل سىيلىعىمىز ايگىلى كۇيشى دينا نۇرپەيىسوۆانىڭ 160 جىلدىعىمەن ورايلاس كەلىپ وتىر. ول ءوزىنىڭ تالانتى، مۋزىكاعا دەگەن ماحابباتى مەن تۋعان جەرگە دەگەن سۇيىسپەنشىلىگىنىڭ ارقاسىندا «كۇي اناسى»، تۇڭعىش ايەل-كومپوزيتور اتاندى. ونىڭ كۇيلەرىندە  دالانىڭ  تىلسىم داۋسى مەن بۇلبۇل قۇستىڭ اسەم ءۇنى بار.

بار بولعانى ەكى شەكتى كونە اسپاپتا تۋعان جەرىمىزدىڭ سۇلۋلىعى مەن سىرلى سەزىم تۇنىپ تۇر. قازىرگى مۋزىكا الەمى وتە باي، الۋان ءتۇرلى. ال ءداستۇرلى ونەردى تاڭداعان سىزدەردىڭ شاكىرتتەرىڭىز  ءۇشىن زاماناۋي كومپيۋتەرلىك تەحنولوگيا  دومبىرانىڭ عاجاپ داۋسىنا كولەڭكە تۇسىرە الماپتى.  مەن بۇعان وتە  قۋانىشتىمىن. ۇلتتىق مۋزىكاعا قۇشتار بالالار كوپ بولعان سايىن،  ۇلتىمىزدىڭ بولاشاعى  جارقىن، رۋحى جوعارى بولاتىنىنا سەنەمىز.         

قۇرمەتتى مەكتەپ باسشىلارى جانە ۇستازدار! مەن سىزدەرگە وسى اسپاپتاردى سىيعا تارتا وتىرىپ، جاس ۇرپاقتى تاربيەلەۋ ىسىندە ساتتىلىك پەن توزىمدىلىك، ىزگىلىك پەن مەيىرىم تىلەيمىن! ال تالانتتى جاستارعا شىعارماشىلىق تابىس تىلەگىم كەلەدى. ءبىز سىزدەردى ەلىمىزدىڭ ەڭ ۇلكەن ساحنالارىنان كورەتىن بولايىق، دەدى داريعا نازارباەۆا ءوز سوزىندە.

ءىس-شاراعا قاتىسقان مادەنيەت جانە سپورت ءمينيسترى اقتوتى رايىمقۇلوۆا ءوز كەزەگىندە پەداگوگتەرگە جانە بالالار مۋزىكا مەكتەپتەرىنىڭ، انسامبلدەردىڭ جەتەكشىلەرىنە العىسىن ءبىلدىردى: 

دينا نۇرپەيىسوۆانىڭ 160 جىلدىعى اياسىندا وتكىزىلىپ جاتقان كوپتەگەن ءىس-شارالاردىڭ اراسىندا «دەگدار» گۋمانيتارلىق قورى ۇيىمداستىرعان جوبانىڭ ورنى بولەك ەكەنىن كۇيشىنىڭ شوبەرەسى تولەگەن قۋانىشەۆ اتاپ ءوتتى.

15

ءىسشارا اياسىندا قاتىسۋشىلار كۇيشى دينا مەن قۇرمانعازىنىڭ تۋىندىلارى ورىندالعان كونتسەرتتىك باعدارلامانى تاماشادى. ساحنادا «بايجۇما»، «سارانجاپ»، «بالاميشكا»، «بالبىراۋىن»، «اداي»، «ناۋىسقى» ت.ب. كۇيلەر ورىندالدى. قازاقتىڭ كۇي تارتىس ونەرىن  سامۆەل ازنوۆاريان، موزەس زيبوركەدە، سابير گۋسەينوۆ، ميحايل ابۋوۆ شەبەر كورسەتە ءبىلدى. ءتۇرلى ۇلتتىق مۋزىكالىق اسپاپتاردىڭ ءۇنىن جاڭعىرتقان «استانا سازى» ءانسامبلىنىڭ ونەرى دە كوپكە ۇنادى. بەلگىلى ارتىستەرمەن بىرگە ساحنادا ء«ۇمىت»، «شابىت» جانە «بۋراباي» اتتى بالالار انسامبلدەرى ونەر كورسەتىپ، جاڭا مۋزىكالىق چەللەندج باستادى. ۇيىمداستىرۋشىلار اتاپ وتكەندەي، چەللەندج اياسىندا ءاربىر ۆيدەو Instagram الەۋمەتتىك جەلىسىندە #دينانۋرپەيسوۆافونددەگدار حەشتەگىمەن جاريالانىپ، دومبىرادا ويناۋدىڭ ونلاين جارىسى رەتىندە ۇسىنىلادى. چەللەندج وسكەلەڭ ۇرپاقتىڭ بويىنا رۋحاني قۇندىلىقتاردى ءسىڭىرىپ، ۇلتتىق ونەردىڭ ساقتالۋى مەن ناسيحاتتالۋىن ارتتىرۋعا باعىتتالعان.  جاڭا مۋزىكالىق چەللەندج Instagram الەۋمەتتىك جەلىسىندە 2021 جىلعى 31 جەلتوقسانعا دەيىن وتەدى.

جوبا اياسىندا ەلىمىزدىڭ ءتۇرلى ايماقتارىندا ورنالاسقان وقۋ ورىندارى قامتىلدى. ولاردىڭ قاتارىندا:

1) ە.اسقاروۆ اتىنداعى جاس اقىندار مەكتەبى، پەتروپاۆلوۆسك قالاسى;

2) «وتباسى ۇلگىسىندەگى بالالار اۋىلى» كمم، وسكەمەن قالاسى;

3) ك.شاكەەۆ اتىنداعى اقىندار مەكتەبى، كوكشەتاۋ قالاسى;

4) «مادەني-ساۋىق ورتالىعى» كمقك، قوستاناي قالاسى;

5) «SOS بالالار اۋىلى»، نۇر-سۇلتان قالاسى;

6) «ەر ەدىگە» جىر مەكتەبى، اكتوبە قالاسى;

7) «ماقات» ونەر مەكتەبى جانىنداعى بالالار وركەسترى، اتىراۋ وبلىسى;

8) «اينالايىن» بالالار ءۇيىنىڭ دومبىراشىلار ءانسامبلى، تالدىقورعان قالاسى;

9) ن.تىلەنديەۆ اتىنداعى كوپ بالالى جانە از قامتىلعان بالالارعا ارنالعان مەكتەپ-ينتەرناتىنىڭ «نۇر-اتا» فولكلورلىق-ەتنوگرافيالىق مەكتەپ وركەسترى، تاراز قالاسى;

10) «وبلىستىق كورۋ قابىلەتى بۇزىلعان بالالارعا ارنالعان ارناۋلى مەكتەپ-ينتەرناتى» كمم، باتىس قازاقستان وبلىسى بار.

 

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار