ۇكىمەت • 26 قازان، 2021

قازاقستان تالىپتەرمەن ساياسي كەلىسسوز جۇرگىزە مە؟ ءسىم جاۋابى

74 رەت كورسەتىلدى

پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى قازاقستاننىڭ «تاليبان» قوزعالىسىمەن قارىم-قاتىناسى تۋرالى ايتتى، دەپ حابارلايدى Egemen.kz.

ۇكىمەت وتىرىسىنان كەيىن جۋرناليستەر سۇراعىنا جاۋاپ بەرگەن تىلەۋبەردى اۋعانستاننىڭ جاڭا باسشىلىعىن حالىقارالىق قاۋىمداستىق ءالى مويىنداماعانىن، ويتكەنى «تاليبان» قوزعالىسى بۇۇ-نىڭ لاڭكەستىك ۇيىمدار تىزىمىنە ەنگىزىلگەنىن باسا ايتتى.

«مويىنداۋ ءۇشىن بۇۇ قاۋىپسىزدىك كەڭەسى ارنايى قارار قابىلداۋى كەرەك»، دەدى ول.

پرەمەر-مينيستر ورىنباسارىنان الەۋمەتتىك جەلىلەردە تاراعان سىرتقى ىستەر مينيسترلىگى وكىلىنىڭ تالىپتەرمەن تۇسكەن سۋرەتى نەنى بىلدىرەتىنى دە سۇرالدى.
 
«ول پرەزيدەنتتىڭ حالىقارالىق ىستەر جونىندەگى ارنايى وكىلى باستاعان قازاقستاندىق دەلەگاتسيا قۇرامىندا بولدى. دەلەگاتسيا اۋعانستانعا گۋمانيتارلىق كومەك كورسەتۋ بويىنشا ارنايى ميسسيادا باردى. حالىقارالىق قوعامداستىقتا ەكونوميكالىق كۇيرەۋگە، اۋعانستانداعى گۋمانيتارلىق داعدارىسقا جول بەرمەۋ تۋرالى ورتاق تۇسىنىك بار. بۇل بەلگىلى ءبىر قاۋىپتەردى تۋدىرادى. ەڭ الدىمەن، بۇل ەسىرتكى تاسمالىنىڭ، ءدىني ەكسترەميزمنىڭ كوبەيۋى جانە بوسقىندار اعىنىن تۋدىرۋى مۇمكىن»، دەپ جاۋاپ بەردى تىلەۋبەردى.

ونىڭ ايتۋىنشا، قازاقستاننىڭ اۋعانستانمەن قارىم-قاتىناسى گۋمانيتارلىق كومەك كورسەتۋ جانە «اۋعانستان ەكونوميكاسىنىڭ قۇلدىراۋىنا جول بەرمەۋ ءۇشىن» جاڭا ەكونوميكالىق بايلانىستار ورناتۋدان تۇرادى.

ء«بارى ەكونوميكالىق داعدارىس بولۋى مۇمكىن ەكەنىن تۇسىنەدى، ويتكەنى اۋعانستان ۇكىمەتىنىڭ حالىقارالىق ەسەپ-شوتتارى جابىلعان. ەگەر ەكونوميكالىق كۇيرەۋ بولسا، ول ەڭ الدىمەن ءدىني ەكسترەميزم كوتەرىلىسىنە بايلانىستى بەلگىلى ءبىر قاۋىپ-قاتەر توندىرەتىن گۋمانيتارلىق داعدارىسقا، ەسىرتكى تاسىمالى مەن بوسقىندار اعىنىنىڭ كوبەيۋىنە اكەلەدى. ونىڭ الدىن الۋ ءۇشىن بۇكىل حالىقارالىق قاۋىمداستىق قازىر اۋعان حالقىنا گۋمانيتارلىق كومەك كورسەتۋگە شاقىرىپ جاتىر»، دەپ قوستى مۇحتار تىلەۋبەردى.

سىرتقى ىستەر ءمينيسترى قازاقستان اۋعانستان حالقىنا گۋمانيتارلىق كومەك رەتىندە 5 مىڭ توننا ۇن جىبەرۋ تۋرالى شەشىم قابىلداعانىن ايتتى.

«باسقا دا كومەك كورسەتۋ تۋرالى ماسەلە جوق. ءبىر عانا ماسەلە، اۋعانستان ەلى قازاقستاندىق QazVaq ۆاكتسيناسىن جەتكىزۋ تۇرىندە گۋمانيتارلىق كومەك سۇرادى. بۇل قاراستىرىلىپ جاتىر، شەشىمدى ۇكىمەت قابىلدايدى. ارينە، بۇل ەلمەن ساۋدا-ەكونوميكالىق بايلانىستاردى قالپىنا كەلتىرۋ قاجەت. ساياسي كەلىسسوز جۇرگىزۋ تۋرالى ويىمىز جوق. اڭگىمە اۋعان حالقىنا كومەكتەسۋ تۋرالى بولىپ وتىر»، دەپ قوستى پرەمەر-ءمينيستردىڭ ورىنباسارى.

سوڭعى جاڭالىقتار

ۇقساس جاڭالىقتار