سوعان سايكەس الداعى پالاتا وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باسقارۋ دەڭگەيلەرى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» تۋرالى زاڭ جوباسىن قارايدى.
اتالعان قۇجات مەملەكەتتىك باسقارۋ جۇيەسىن ودان ءارى جەتىلدىرۋدى جانە مەملەكەتتىك ورگانداردىڭ دەربەستىگى مەن جاۋاپكەرشىلىگىن ارتتىرۋدى كوزدەيدى. ۇكىمەتتىڭ بىرقاتار قىزمەتىن ورتالىق مەملەكەتتىك ورگاندارعا, ال ورتالىق ورگانداردىڭ كەيبىر قىزمەتتەرىن جەرگىلىكتى اتقارۋشى ورگاندارعا بەرۋ ۇسىنىلىپ وتىر.
سونىمەن قاتار بيۋرو وتىرىسىندا ماجىلىستەن كەلىپ تۇسكەن «2022 – 2024 جىلدارعا ارنالعان رەسپۋبليكالىق بيۋدجەت تۋرالى» جانە «قازاقستان رەسپۋبليكاسىنىڭ ۇلتتىق قورىنان 2022 – 2024 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوبالارى جۇمىس ءۇشىن قارجى جانە بيۋدجەت كوميتەتىنە بەرىلدى.
«وتكەن اپتادا باس كوميتەت بۇل زاڭ جوبالارىن تانىستىردى. سول كەزدە بىرقاتار ماسەلەلەرگە نازار اۋدارىلدى. سوندىقتان, دەپۋتاتتار جۇمىس توبىنىڭ وتىرىستارىنا بەلسەندى قاتىسىپ, قۇجاتتى ءوز سالالارى بويىنشا جان-جاقتى تالقىلاۋى قاجەت. بۇل پرەزيدەنت جولداۋىن جانە وزەكتى الەۋمەتتىك-ەكونوميكالىق ماسەلەلەردى شەشۋگە قاتىستى مەملەكەت باسشىسى بەرگەن تاپسىرمالاردى ۋاقتىلى ورىنداۋ ءۇشىن ماڭىزدى», دەدى ماۋلەن اشىمباەۆ.
