قازىر ساتباەۆ اللەياسىندا جەراستى فونتانى ورناتىلىپ جاتىر. ول جەردىڭ ۇستىنە ەمەس, استىنا ورناتىلاتىندىقتان, مۇنى جەرگىلىكتى تۇرعىندار قۇرعاق فونتان دەپ اتايدى ەكەن. تەرەڭگە قوندىرىلعان قۇبىردىڭ تۇتىكشەلەرىنەن اتقىلاعان سۋدىڭ بۇلكىلىن ۇستىندە كەلە جاتقان ادام تابانىمەن سەزىپ, جەردىڭ استىنان قۇددى ءبىر بۇلاق كوزى ۇرىپ جاتقانداي اسەردە قالادى.
ساۋلەت جانە قالا قۇرىلىسى ءبولىمىنىڭ باستىعى نادەجدا پاتريكەەۆانىڭ ايتۋىنشا, جەراستى فونتاندارىن ورناتۋعا «قازتسينك» سەرىكتەستىگى 14,6 ملن تەڭگە قارجى ءبولىپ وتىر. سۋبۇرقاقتار ون التى تۇتىكشە ارقىلى جۇمىس ىستەيدى, سونداي-اق جارىقتاندىرۋ جۇيەسىمەن دە قامتىلعان.
– فونتان سۋى جەرگە توسەلگەن تاستىڭ استىنان ۇرىپ تۇرادى. قازىر نەگىزگى جۇمىستاردىڭ بارلىعى اياقتالدى. مەردىگەر الماتىدان كەلەتىن ارنايى قۇرىلعىنى كۇتىپ وتىر, ءسال كەشىگىپ جاتىر. بۇل سۋبۇرقاقتىڭ ماڭايى قالا تۇرعىندارى ءجيى كەلەتىن ەرەكشە ورىنعا اينالادى دەپ ۇمىتتەنەمىز. فونتاندى ورنالاستىرۋ, كومۋ, بەتىنە تاس توسەۋ جۇمىستارىن بيىل اياقتايمىز. ءبارىن تەكسەرىپ بولعان سوڭ, قىسقى سىناقتان وتكىزەمىز. ال مامىر ايىنداعى مەرەكەلىك كۇندەردىڭ بىرىندە باسقا فونتاندارمەن بىرگە ىسكە قوسۋدى جوسپارلاپ وتىرمىز, – دەدى ن.پاتريكەەۆا.
