قوعام • 21 قازان، 2021

تۇركىستان وبلىسىندا دوستىق ءۇيى سالىنادى

31 رەت كورسەتىلدى

قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىنا قر پرەزيدەنتى قاسىم-جومارت توقاەۆ تۇركىستان وبلىسىندا دوستىق ءۇيىن سالۋدى تاپسىردى، دەپ حابارلايدى Egemen.kz.

پرەزيدەنتتىڭ توراعالىق ەتۋىمەن ءوتىپ جاتقان وتىرىستا ءبىرىنشى بولىپ تۇركىستان وبلىسىندا ەتنوسارالىق احۋال تالقىعا ءتۇستى.

«ستاتيستيكا بويىنشا، تۇركىستان وبلىسىندا ءتۇرلى تۇرمىستىق جانجالدار از ەمەس. ءوزىڭىز دە مىسال رەتىندە شورناق، قارابۇلاق ەلدى مەكەندەرىندە بولعان وقيعالار تۋرالى ايتتىڭىز. تۇرمىستىق دەڭگەيدە بولسا دا، ءدال وسىنداي جاعدايلارعا باسا ءمان بەرۋ كەرەك. ەڭ الدىمەن مۇنداي وقيعالار ۇلتتىق سيپاتقا ۇلاسپاۋى قاجەت. بۇل – ءبىرىنشى ماسەلە. ەكىنشى ماسەلە، تۇركىستان وبلىسىندا دوستىق ءۇيىن اشۋ كەرەك. مۇنداي ۇيلەر وڭىرلەردىڭ بارىندە بار. مۇنداي ۇيلەر سالتاناتتى ماجىلىستەردىڭ زالىنا اينالماۋى كەرەك. مەن بۇل تۋرالى كەيىن كەڭىرەك ايتام. دوستىق ۇيلەرى ساراپشىلاردى شاقىرىپ، تۋىندايتىن پروبلەمالاردى پراكتيكالىق تۇرعىدا تالقىلاي الاتىن حالىق وكىلدەرىن قابىلداۋى كەرەك. وسىعان قاتىستى قانداي جوسپارلارىڭىز بار»، دەپ سۇرادى مەملەكەت باسشىسى تۇركىستان وبلىسىنىڭ اكىمىنەن.

وبلىس اكىمى ومىرزاق شوكەەۆ وڭىردە ەتنوسارالىق احۋالدىڭ تامىرىن باسىپ وتىراتىن مونيتورينگ ورتالىق جەمىستى جۇمىس ىستەپ تۇرعانىن اتادى.

«شىن مانىندە جاڭاعى شورناقتا، قارابۇلاقتا وقيعا ورىن الدى. ولاردىڭ الدىن الۋ ءۇشىن بىزدە 2019 جىلدان باستاپ ەتنوسارالىق شيەلەنىستەردى تىكەلەي زەرتتەيتىن مونيتورينگتىك ورتالىق اشىلدى. وندا تەك قانا الىمەتتەردى تەك بيلىك ورىندارىنان ەمەس، جۇيەلى الەۋمەتتىك جەلىدەن، ازاماتتاردىڭ بەرگەن وتىنىشتەرىنەن، شۇعىل مالىمەت جينايتىن قوعامدىق ورىنداردان جيناپ، سونى ساراپتاۋعا كوشتى.

سونىڭ ارقاسىندا 2019 جىلى شورناق ەلدى مەكەنىندە وسىنداي تاۋەكەل بار ەكەنىنە كوزىمىز جەتتى. سول جەردە ءتيىستى شارالار قولدانىپ، ەكى جاقتى قاريالارىن جيناپ، ولارمەن ءماسليحات وتكىزىپ، سول جەردەگى قۇقىق قورعاۋ ورگاندارىنىڭ جۇمىسىن نىعايتىپ، ارەكەت جاسادىق. سونىڭ ارقاسىندا 2020 جىلعى كيكىلجىڭ دە قانتوگىس تە بولماي، ماسەلە بىرنەشە ساعاتتىڭ ىشىندە رەتتەلگەن بولاتىن»، دەدى ايماق باسشىسى.

سونداي-اق، ول پرەزيدەنتتىڭ ەسكەرتپەسى بويىنشا تۇركىستان وڭىرىندە جاڭا دوستىق ءۇيى سالىناتىنىن ايتتى.

ء«بىزدىڭ اسسامبلەيانىڭ دوستىق ءۇيى بولعان. بىراق ول شىمكەنت قالاسىندا ورنالاسقان ەدى. ونى شىمكەنت قالاسىنىڭ سۇراۋىمەن قالا اكىمدىگىنىڭ بالانسىنا بەردىك. قازىر اسسامبلەيا باسقارمالار ۇيىندە ورنالاسقان. ءسىزدىڭ ايتقان ەسكەرتپەلەرىڭىزدى ەسكەرە وتىرىپ، جاڭا ۇلگىدەگى دوستىق ءۇيىن سالامىز دەپ ويلايمىن»، دەدى ومىرزاق شوكەەۆ.

سوڭعى جاڭالىقتار

دوللار قىمباتتاپ بارادى

قارجى • بۇگىن، 11:20

لوماچەنكودان قازىردەن قاشىپ وتىر

كاسىپقوي بوكس • بۇگىن، 10:35

«ۇزدىكتەردىڭ ۇزدىگى» انىقتالدى

ۇلتتىق سپورت • بۇگىن، 10:12

ۇقساس جاڭالىقتار