ونەر • 20 قازان، 2021

ەلوردا – وركەن جايعان ونەر ءتورى

78 رەت كورسەتىلدى

كوزىقاراقتى كورەرمەننىڭ تالعامىن تارازىلاپ، رۋحاني كوكجيەگىن كەڭەيتەتىن بىردەن-ءبىر ونەر ورداسى – تەاتر. الايدا «جامان تۇماۋ» جاعادان العان ساتتەن بەرى جالعىز تەاتر عانا ەمەس، كوپتەگەن كوپشىلىك ورىننىڭ ەسىگى تارس جابىلعان ەدى.

ىندەتتى ەل بولىپ ەڭسەرىپ، ۇجىمدىق يممۋنيتەت قالىپتاسا باستاعان سوڭ ونەرگە دەگەن وشپەس ىنتىزارىمىز دا قايتا ويانا باستادى. ماسەلەن، ەلوردادا تاۋەلسىزدىكتىڭ 30 جىلدىعىنا وراي نۇر-سۇلتان قالاسى اكىمدىگىنىڭ ۇيىتقى بولۋىمەن 28 قازان مەن 1 قاراشا ارالىعىندا تەاتر ALL Nur-Sultan theatre week اتتى تەاتر فەستيۆالى قانات جايادى.

ەل ەگەمەندىگىنىڭ 30 جىلى ىشىندە ەل­وردانىڭ مادەني ءومىرى اۋىز تولتىرىپ ايتارلىقتاي وزگەردى. وسى جىلدار ارا­لى­عىندا باس قالادا 10-نان استام تەاتر اشىلدى. بۇل قادام ەڭ الدىمەن جاستاردىڭ جان سۇلۋلىعىن قالىپتاستىرىپ، ونسىز دا دۇبىرگە تولى دۇنيەدە ءبىر ساتكە بولسىن قالا تۇرعىندارىنىڭ وي-ءورىسىن ورگە سۇي­رەۋگە ارنالعانى انىق.

سونىمەن تەاتر ALL Nur-Sultan theatre week دەپ اتالعان تەاتر فەستيۆالى نە فەستيۆال؟ وعان قانداي ۇجىمدار قاتىسادى؟ قويىلىمدار قاشان، قايدا قويىلادى؟ ونى دا ايتايىق. بىلۋىمىزشە، اتالعان تەاتر اپتالىعىندا ەلوردانىڭ جانە شەتەلدىڭ 11 ۇجىمى ونەر كورسەتەدى. بەس كۇندە باس قالانىڭ تۇرعىندارى باس-اياعى 20-دان استام قويىلىمدى تاماشالايدى. ماسەلەن، كورەرمەن «استانا وپەرا» تەاترى مەن ق.قۋانىشباەۆ اتىن­داعى مەملەكەتتىك اكادەميالىق قازاق مۋزىكالىق دراما تەاترىنىڭ ۇكىلەگەن ۇزدىك قويىلىمدارىن كورىپ، كوزايىم بولا الادى. سونداي-اق ءا.مامبەتوۆ اتىن­­داعى مەملەكەتتىك دراما جانە كومە­ديا تەاترى، م.گوركي اتىنداعى مەم­لەكەتتىك اكادەميالىق ورىس دراما تەاترى، مەملەكەتتىك «قۋىرشاق» تەاترى، جاس كو­رەرمەندەردىڭ مۋزىكالىق تەاترى، «جاس­تار»، «ناز»، Astana Musical تەاترى دا ءوز ونەرلەرىن ورتاعا سالدى.

فەستيۆالدىڭ قۇرمەتتى قوناقتارى رەتىندە ەلورداعا رەسەيدىڭ بىرنەشە ونەر ۇجىمى دا ات باسىن بۇرادى. ولاردىڭ قا­تارىندا س.وبرازتسوۆ اتىنداعى مەملە­كەتتىك اكادەميالىق ورتالىق قۋىرشاق تەاترى مەن كىشى برونناياداعى ماسكەۋ دراما تەاترىنىڭ شىعارماشىلىق ۇجىمدا­رى بار. كورەرمەندەر تەاترعا تەك Ashyq قوسىمشاسى ارقىلى كىرە الادى. سونداي-اق بەتپەردە تاعۋ رەجىمى مەن الەۋمەتتىك قاشىقتىق مىندەتتى تۇردە ساقتالۋى ءتيىس.

بەس كۇن بويى ەلوردانىڭ تەاتر ساحنا­لارىندا فەستيۆال قاتىسۋشىلارى وزدەرىنىڭ جەتەكشى سپەكتاكلدەرىمەن ونەر كورسەتەدى. سونداي-اق شەبەرلىك سىنىپتارى، زاماناۋي جانە بەينەلەۋ ونەرىنىڭ كورمەلەرى ۇيىمداستىرىلادى. فەستيۆال باعدارلاماسىندا «قىز جىبەك» وپەراسى، «اباي-توعجان» مۋزىكالىق دراماسى، «قۇنانباي»، «جارقانات»، «رومەو مەن دجۋلەتتا»، «جىبەك» سپەكتاكلدەرى، «جيزەل» بالەتى جانە تاعى باسقا قويى­لىمدار بار.

– بۇل مادەني ءىس-شارانىڭ ماقساتى مادە­نيەت قايراتكەرلەرىن قولداۋ، كورەر­مەندەر ءۇشىن دە، فەستيۆال قاتىسۋشىلا­رى ءۇشىن دە مەرەكەلىك كوڭىل كۇي قالىپتاستى­رۋ بولىپ سانالادى. وسى فەستيۆالدى وتكىزۋگە العاش رەت قالانىڭ بارلىق ينفراقۇرىلىمى، سونىڭ ىشىندە شاعىن جانە ورتا بيزنەس تارتىلادى. تەاتر اپ­تا­لىعى كەزىندە كورمەلەر، تەاتر ساحناسىنىڭ جەتەكشى تەاترلارى مەن مەترلەرىنىڭ ءتۇرلى شەبەرلىك سىنىپتارى ۇيىمداستىرىلادى، سونداي-اق قالا تۇرعىندارى اراسىندا سپەكتاكلدەردىڭ قىزىقتى پرەمەرالىق قويىلىمدارىنا بيلەتتەر ويناتىلادى. تەاتر اپتالىعىن ۇيىمداستىرۋعا قاتىستى بارلىق اقپارات www.visitnursultan.kz سايتىندا ورنالاس­تىرىلادى، دەيدى نۇر-سۇلتان قالاسىنىڭ اكىمى التاي كولگىنوۆ.

سونىمەن 29 قازاندا مەلپومەننىڭ ەلوردالىق قىزمەتشىلەرى كورەرمەنگە التى ءتۇرلى قويىلىم ۇسىنادى.

كۇندىز ساعات 11:30-دا «ناز» مەملە­كەتتىك بي تەاترى اباي قۇنانباەۆتىڭ اياق­­­تال­ماعان ء«ازىم اڭگىمەسى» اتتى حورەو­گرا­فيا­لىق سپەكتاكلىن كورسەتەدى. قويىلىم ادام­داردىڭ بايلىق ءۇشىن قانداي ايلا-امالدار مەن ارسىز ارەكەتتەرگە بارا التىن­دىعىن باياندايدى. قويۋشى-حورەوگراف­تار – س.دۇزباەۆ، ا.بەگلوۆا، ۋ.يزەناەۆ، م.بايبولوۆا. مۋزىكانىڭ اۆتورى جانە رەداكتورى – ك.ەران.

ەلوردالىق «قۋىرشاق» تەاترى كىش­كەنتاي كورەرمەندەرگە ارناپ گ.ان­دەر­سەننىڭ «ديۋيموۆوچكا» ەرتە­گىسىن دايىندادى. قويىلىم الەمدەگى ەڭ كىشكەنتاي قىز بەن ونىڭ دوستارىنىڭ شىتىرمان وقيعالارى تۋرالى باياندايدى. باستالۋى ساعات 14:00-دە. قويۋشى-سۋرەتشىلەر – ە.سار­سەنباەۆ، ا.سىرباەۆا.

Astana musical تەاترى كورەرمەن­دەر­دى Qazaqstan ورتالىق كونتسەرت زالىندا اعىلشىن دراماتۋرگى رەي كۋنيدىڭ «№13» كومەدياسىن كورۋگە شاقىرادى. وقيعا جەلىسى 13-ءشى ءنومىرلى قوناقۇي بول­مەسىندە ءوربيدى. سيۋجەتكە سايكەس، نومىر­دە ىقپالدى ساياساتكەر ءوزىنىڭ حاتشىسىمەن جانە قاراقشىلارمەن كەزدەسەدى. توناۋشىلاردىڭ كەسىرىنەن كەيىپكەردىڭ بىرەۋى كوز جۇمادى. قالعان كەيىپكەرلەر وسى وقيعا تۋرالى پوليتسياعا حابارلاي الماي ابىگەرگە تۇسەدى. سەبەبى ەسىمى ەلگە بەلگىلى شەنەۋنىككە جاعىمسىز سۇراقتار قويىلاتىن ەدى. سونىمەن 13-نومىردە وقيعا قالاي ءوربيتىنىن كورەرمەندەر 29 قازاندا ساعات 19:00-دە كورە الادى. قويىلىم رەجيسسەرى – Astana musical تەاترىنىڭ كوركەمدىك جەتەكشىسى ەسليام نۇرتازين.

سول ۋاقىتتا ق.قۋانىشباەۆ اتىن­دا­عى مەملەكەتتىك اكادەميالىق قازاق مۋزىكالىق دراما تەاترىنىڭ ساحناسىندا. ت.اسەمقۇلوۆتىڭ «قۇنانباي» دراماسى ۇسىنىلادى. سپەكتاكل-كورىنىس كورەرمەندەردى قازاق حالقى ءۇشىن كۇردەلى تاريحي كەزەڭگە جەتەلەيدى. قويۋشى رەجيس­سەرى – بولات ۇزاقوۆ، قويۋشى سۋرەتشىسى – قانات ماقسۇتوۆ.

جاس كورەرمەننىڭ مۋزىكالىق تەاترى ۇلى ابايدىڭ جاستىق شاعىنداعى وقيعا­لارعا نەگىزدەلگەن مۇحتار اۋەزوۆتىڭ «اباي-توعجان» مۋزىكالىق دراماسىن تا­­ما­شا­لاۋعا شاقىرادى. قويىلىمدا اقىن­­نىڭ توعجانعا دەگەن ماحابباتى، ونىڭ باس­تان كەشكەندەرى مەن ىشكى دۇنيە­تا­­نى­­مى باياندالادى. قويۋشى رەجيسسەرى – قا­زاق­­ستاننىڭ ەڭبەك سىڭىرگەن قايراتكەرى اس­­حات ماەميروۆ. باستالۋى – ساعات 16:00-دە.

سول كۇنى كەشكە كورەرمەن «جاستار» تەاترى­نىڭ ارتىستەرى ساحنالايتىن ۋ.شەكس­­پيردىڭ «اساۋعا تۇساۋ» كومەديا­سىن تاما­شالاي الادى. كورەرمەندى كەيىپ­كەر­لەردىڭ ديالوگى مەن مىنەز-قۇلقى، تاپ بول­عان ازىلگە تولى جاعدايلارى قىزىق­تى­­رادى دەپ سەنەمىز. كومەديانىڭ رەجيس­سەر­لەرى – نۇرقانات جاقىپباي، بەكبولات قۇر­مان­عوجاەۆ جانە داۋرەن سەرعازين. سپەكتاكل 29 قازان كۇنى ساعات 19:00-دە وتەدى.

باعدارلاما اياسىندا 30 قازان كۇنى كەشكى ساعات 19:00-دە جاس كورەرمەننىڭ مۋ­­زىكالىق تەاترى ن.ءموشيننىڭ «دۇنيە-عاپىل» مەتافيزيكالىق دراماسىن كورۋ­گە شاقىرادى. قويىلىم اۆتورلارى ءومىر­دىڭ ءمانى مەن ماڭىزىن، ادامنىڭ جان دۇنيەسىن كورسەتە وتىرىپ، ادامزات بالاسى ءۇشىن ورتاق تاقىرىپقا جۇگىنەدى. قويۋ­شى-رەجيسسەر جانە ستسەنوگراف – اسحات ماەميروۆ.

كۇندىز ساعات 17:00-دە تەاتر ارتىستەرى ف.دوستوەۆسكيدىڭ «اعايىندى كارامازوۆ­تار» رومانىنىڭ جەلىسى بويىنشا «ۇلدار» دراماسىن كورسەتەدى. سپەكتاكل جاسوسپى­رىمدەردىڭ ءومىرى تۋرالى باياندايدى. بالا تاربيەلەۋدىڭ، بالالارمەن ءوزارا قارىم-قاتىناس جاساۋدىڭ وزەكتى ماسەلەلەرىن كوتەرەدى. قويۋشى رەجيسسەرى – ەرنازار جاڭاتىلەك، اۋدارماسىن ا.وماش جۇرگىزدى.

31 قازان كۇنى ساعات 19:00-دە «جاستار» تەاترىنىڭ ساحناسىندا ت.احمەتجاننىڭ «تاپتىم. عاشىق بولدىم. جوعالتتىم» ميۋزيكلى ساحنالانادى. سيۋجەت جەلىسىندە ءتۇرلى كەدەرگىلەر مەن قىم-قيعاش وقيعا­نى، درامانى باستان كەشىرەتىن قوس عاشىق­تىڭ ماحاببات تاريحى جاتىر. مۇڭدى اۋەنمەن ارلەنىپ، ساعىنىشپەن ورىلگەن بۇل ماحاببات تاريحى كورەرمەندى بەي-جاي قال­دىرمايتىنى انىق. قويۋشى رە­جيس­سەرى – نۇرقانات جاقىپباي، قويۋشى سۋرەتشىسى – قابىل حالىقوۆ، حورمەيستەر – انەل سىرگەباەۆا، بالەتمەيستەر – گيۋزەل مۇحامەدجانوۆا.

سول كۇنى «ناز» مەملەكەتتىك بي تەات­رى «تۇعىرعىندار» حورەوگرافيالىق سپەك­­تاكلىن ۇسىنادى. قويىلىمدا قا­زاق حان­­­دىعى قۇرىلعانعا دەيىنگى ەجەل­­گى تا­ري­حىمىز، VI-XI عاسىرلار ارا­­لى­عىن­­­دا ۇلى دالانى مەكەن ەتكەن ساق، عۇن، قاڭ­لى كەزەڭدەرى تۋرالى بايان­­دا­لا­دى. كورەر­مەندەر تۇرىك قا­عا­نا­تى­نىڭ قالاي قۇرىلعانىن جانە قالىپ­تاس­قانىن تاما­شالايدى. قويۋشى حورەوگراف­تار – ە.اعىم­باەۆ، ك.اعىمباەۆا، م.ايت­ماعامبەتوۆا. باستالۋى – ساعات 17:00-دە.

Astana musical مەملەكەتتىك تەاترى كو­رەرمەندەردى 31 قازان كۇنى ساعات 18:00-دە COVID-19 بي-پەرفورمانسىن تاما­شالاۋ ءۇشىن Qazaqstan كامەرالىق زالىنا شاقىرادى. حورەوگرافيالىق سپەك­تاكل كارانتين كەزىندەگى ادامنىڭ ماڭ­گى­لىك قۇندىلىقتارى، ىشكى جاعدايى، سانا­سىن­داعى وزگەرىستەر، حالىقتىڭ ابسۋرد­تىق ارە­كەتتەرى مەن سەنىمدەرى، جاقىندارى مەن تۋىس­تارىنان ايىرىلعان كەزدەگى ازا­بى تۋرالى باياندايدى. سپەكتاكلدىڭ رەجيس­سەرى – انەل مىرزاعۇلوۆا، مۋزىكالىق شى­عار­مالاردىڭ اۆتورى – اقجول ومىرزاقوۆ.

سول كۇنى ساعات 11:30-دا قۋىرشاق تەاترىندا قازاق حالىق ەپوسىنىڭ جەلىسى بويىنشا قويىلعان «ەر توستىك» سپەكتاكلى كورسەتىلەدى. قويىلىمدا قازاقتىڭ سالت-داستۇرلەرى، ادەت-عۇرپى، اتا-انا مەن اعا ۇرپاققا دەگەن قارىم-قاتىناسى كورىنىس تابادى. سپەكتاكلدە باتىرلاردىڭ ەرلىگى، تۋعان جەرگە دەگەن ماحابباتى تۋرالى باياندالادى. رەجيسسەرى – قۇرالاي ەشمۇراتوۆا.

فەستيۆالدىڭ سوڭعى كۇنى، ياعني 1 قا­را­شادا «جاستار» تەاترىنىڭ ساحناسىندا «قاناتتىلار» مۋزىكالىق-پوەتيكالىق قو­يىلىم ۇسىنىلادى. بۇل تۋىندىنى تا­ماشالاعان كورەرمەن جالپىادامزاتتىق قۇندىلىقتار، ءومىردىڭ ءمانى، جازمىش پەن تاعدىر تۋرالى وي تولعاناتىنى انىق. سپەك­تاكل ينكليۋزيۆتى «قاناتتىلار» تەاترى ءۇشىن پرەمەرالىق قويىلىم سانالادى. اۆتورى – گ.سالىقباي، رەجيس­سەرى – ن.ۆاحيتوۆ.

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

ۇقساس جاڭالىقتار