ايماقتار • 18 قازان، 2021

بايزاق اۋدانىندا 24 ءۇي قايتا جاڭعىرتىلىپ، پايدالانۋعا بەرىلدى

140 رەت كورسەتىلدى

بايزاق اۋدانىندا اسكەري قويماداعى جارىلىستان كەيىن زارداپ شەككەن 35 ءۇيدىڭ 24-ءى تولىعىمەن قالپىنا كەلتىرىلىپ، پايدالانۋعا بەرىلدى، دەپ حابارلايدى Egemen.kz.

ونىڭ ىشىندە 4-ەۋى - ۇشبۇلاق اۋىلىندا، 12-ءسى - جىبەك جولى اۋىلىندا، 8-ءى - قايناردا. قالعان 11 ءۇيدىڭ جۇمىسى قاراشا ايىندا اياقتالادى.

وبلىس اكىمى بەردىبەك ساپارباەۆ قاينار اۋىلىنداعى جۇمىس بارىسىمەن تانىسىپ، جەرگىلىكتى تۇرعىندارمەن اڭگىمەلەستى.

بىرلىك كوشەسىنىڭ تۇرعىنى ەرجان ايدارقۇلوۆ جوندەۋدەن وتكەن ءۇيدىڭ ودان دا جاقسارا تۇسكەنىن اتاپ ءوتتى.

«سول كۇنى ءبىزدىڭ ءۇيىمىز قاتتى زارداپ شەكتى. جارىلىستان كەيىنگى ءۇشىنشى كۇنى قۇرىلىسشىلار كەلىپ، تۇرعىن ءۇيىمىزدى قالپىنا كەلتىرۋ جۇمىستارىن باستادى. بۇگىن ءبىز قايتادان ۇيىمىزگە ورالامىز. قۋانىشتا شەك جوق. ۇيگە تازا اۋىزسۋ تارتىلدى. بۇرىن بىزدە گازبەن جابدىقتاۋعا قوسىلۋعا قارجىلىق مۇمكىندىك بولمادى. قازىر ءبىزدىڭ ۇيدە كوگىلدىر وتىن بار. ءبىزدىڭ شارۋاشىلىق قۇرىلىستارىمىزدى، قورشاۋىمىزدى قالپىنا كەلتىردى. ءبىز تۇرعىندارعا، ەل مەن ءوڭىر باسشىلىعىنا قيىن ساتتەردە كورسەتكەن قولداۋى ءۇشىن العىسىمىزدى بىلدىرەمىز»، دەدى ايدارقۇلوۆ.

امانگەلدى نادىربەكوۆ پەن اسحات مامبەتوۆ تە ۇيلەرىنىڭ جاڭا كەلبەتى ءۇشىن العىستارىن ءبىلدىردى.

زارداپ شەككەن 12 كاسىپكەرلىك نىساننىڭ 3-ءى قالپىنا كەلتىرىلىپ، ءوز جۇمىسىن قايتا باستادى. تاعى 9 نىساندا قۇرىلىس جۇمىستارى قارقىندى جۇرگىزىلۋدە.

بارلىق قالپىنا كەلتىرىلگەن ۇيلەردىڭ بىرىڭعاي ساۋلەتتىك ءستيلى بار. ىرگەتاسى مەن توبەسى قىزىل تۇسكە بويالعان، نەگىزگى كورپۋسى قىزعىلت-سارى.

قاينار اۋىلىنىڭ كوشەلەرى جارىقتاندىرىلدى. ەگەر بۇرىن تەك ورتالىق جول اسفالتتالعان بولسا، قازىر اۋىلدىڭ بارلىق كوشەلەرى اسفالتتالعان.

«وبلىس اكىمىنە حالىقتى بارىنشا الەۋمەتتىك قولداۋمەن قامتاماسىز ەتۋ تاپسىرىلدى. بۇل تۇرعىدا الەۋمەتتىك وسال وتباسىلاردىڭ ۇيلەرىن گازداندىرۋ بويىنشا جۇمىستار جۇرگىزىلۋدە، ورتالىقتاندىرىلعان سۋمەن جابدىقتاۋ ماسەلەسى تولىق شەشىلدى. سونىمەن قاتار، زارداپ شەككەن ءاربىر وتباسىعا ءبىزدىڭ تاراپىمىزدان 300 مىڭ تەڭگە، كاسىپكەرلەر تاراپىنان – 200 مىڭ تەڭگەدەن، ءاربىر وقۋشىعا – 50 مىڭ تەڭگەدەن كومەك كورسەتىلدى. «سەنىم بايزاق» قورىنا تۇسكەن قاراجات ەسەبىنەن اۋىل تۇرعىندارىنىڭ شارۋاشىلىق قۇرىلىستارى قالپىنا كەلتىرىلۋدە»، دەدى بايزاق اۋدانى اكىمىنىڭ ورىنباسارى قايرات يسمايل.

قۇرىلىس جۇمىستارىنا 12 مەردىگەرلىك كومپانيا، 200 جۇمىسشى مەن 22 تەحنيكا جۇمىلدىرىلدى.

وبلىس اكىمى قاراشاعا دەيىن قالعان 11 تۇرعىن ءۇيدى قالپىنا كەلتىرۋ جۇمىستارىن اياقتاۋدى تاپسىردى.

سونىمەن قاتار، بەردىبەك ساپارباەۆ جىبەك جولى اۋىلىنا بارىپ، 150 ورىندىق مەكتەپتىڭ قۇرىلىسىمەن تانىستى. جۇمىسشىلار ەكى قاباتتى عيماراتتىڭ ىرگەتاسىن سالىپ، ءبىرىنشى قاباتتىڭ قابىرعالارىن سالۋعا كىرىستى. 

سوڭعى جاڭالىقتار

ۇقساس جاڭالىقتار