ونەر • 18 قازان، 2021

تەاتر فەستيۆالىنىڭ جەڭىمپازدارى انىقتالدى

95 رەت كورسەتىلدى

قاراعاندىدا وتكەن اشىربەك سىعاي اتىنداعى العاشقى رەسپۋبليكالىق تەاتر فەستيۆالىنىڭ جەڭىمپازدارى انىقتالدى، دەپ حابارلايدى Egemen.kz.

باس جۇلدە ەكى بىردەي ونەر ۇجىمىنا بۇيىردى. الماتىداعى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى اشىربەك سىعاي اتىنداعى سىيلىقتى، ال قاراعاندىداعى ساكەن سەيفۋللين اتىنداعى وبلىستىق قازاق دراما تەاترى تاۋەلسىزدىكتىڭ 30 جىلدىعىنا ارنالعان باس جۇلدەنى جەڭىپ الدى. بۇدان بولەك تالانتىمەن ءتانتى ەتكەن ونەرپازدار «ۇزدىك رەجيسسۋرا»، «ۇزدىك اكتەر»، «ۇزدىك ستسەنوگرافيا» سەكىلدى 9 اتالىم بويىنشا ماراپاتتالدى. ال شىمكەنتتەگى جۇمات شانين اتىنداعى تەاتر اشىربەك سىعايدىڭ شاكىرتتەرى تاعايىنداعان ارنايى جۇلدەگە يە بولدى.

ايتا كەتۋ كەرەك، ەلىمىزدىڭ بارلىق وڭىرىنەن جينالعان 15 تەاتر 6 كۇن بويى ارقا جۇرتىنا رۋحاني ءلاززات سىيلاپ، بارلىق قويىلىم انشلاگپەن ءوتتى. ەندى بۇل فەستيۆال ءاربىر ەكى جىل سايىن ءداستۇرلى تۇردە وتكىزىلىپ تۇرماق. كەلەشەكتە حالىقارالىق دەڭگەيگە شىعارۋ دا جوسپاردا بار.  

«قازىر ءتۇرلى جانرلار دامىدى. جاڭا دراما، پەرفومانس، ۆەرباتيم. وسى جاڭا جانرلاردى قالىپتاستىرۋدىڭ وكىلدەرى - ەلىمىزدىڭ جاس رەجيسسەرلەرى كوپ قاتىستى. ءارتۇرلى جانرلاردا سپەكتاكلدەر بولدى. فەستيۆال جوعارى دەڭگەيدە ءوتتى. سىن دا ايتىلدى. فەستيۆال دەگەن كەز كەلگەن تەاترعا كوڭىلى قالماسىن دەپ توقپان جىلىك تاراتىپ بەرۋ ەمەس. ءبىر تەاترعا بىرنەشە نوميناتسيا بەردىك، نوميناتسيا الماعان دا تەاترلار بار. ويتكەنى ونەر – بايگە»، دەدى تەاتر سىنشىسى ميراس ءابىل.

سوڭعى جاڭالىقتار

ۇقساس جاڭالىقتار