ۇكىمەت • 15 قازان، 2021

اۋىل تۇرعىندارىن باسپانامەن قامتاماسىز ەتۋگە جەكە باعدارلاما قابىلدانۋى مۇمكىن

78 رەت كورسەتىلدى

 

سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى تۇركىستان وبلىسىندا كوشپەلى وتىرىس وتكىزدى، دەپ حابارلايدى Egemen.kz.

كوميتەتتىڭ كوشپەلى وتىرىسىنىڭ جۇمىسىنا تۇركىستان وبلىسىنىڭ اكىمى ومىرزاق شوكەەۆ، يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى قايىربەك وسكەنباەۆ، «وتباسى بانك» اق باسقارما توراعاسى ءلاززات يبراگيموۆا جانە باسقا دا سالالىق مەكەمەلەردىڭ باسشىلارى قاتىستى.

تۇرعىن ءۇي قۇرىلىسى سالاسىنداعى زاڭنامانى جەتىلدىرۋ جانە مەملەكەتتىك باعدارلامالاردى ىسكە اسىرۋ، سونداي-اق ازاماتتاردى تۇرعىن ۇيمەن قامتاماسىز ەتۋ جونىندەگى بىرىڭعاي ۇلتتىق باعدارلاما ازىرلەۋ – تالقىلاۋدىڭ باستى تاقىرىبى بولدى.

كوميتەت توراعاسى داۋرەن ادىلبەكوۆ قازاقستاندىقتاردى قولجەتىمدى باسپانامەن قامتاماسىز ەتۋ مەملەكەتتىڭ نەگىزگى الەۋمەتتىك مىندەتتەرىنىڭ ءبىرى ەكەنىن اتاپ ءوتىپ، وتىرىس تۇرعىن ءۇي ساياساتى سالاسىنداعى پروبلەمالىق ماسەلەلەردى انىقتاۋعا ارنالعانىن ايتتى.

سەناتور ءالىمجان قۇرتاەۆ اۋىل تۇرعىندارىن تۇرعىن ۇيمەن قامتاماسىز ەتۋدە جەكە باعدارلاما ازىرلەۋ قاجەت دەپ ەسەپتەيدى. بۇل اۋىلدا تۇرۋ جاعدايىن جاقسارتۋعا مۇمكىندىك بەرەدى، سونداي-اق جاستاردىڭ قالالارعا جاپپاي كەتۋىن قىسقارتۋى ىقتيمال.

«قولدانىستاعى مەملەكەتتىك باعدارلامالاردى اۋىلدىق جەرلەردە ىسكە اسىرۋ مۇمكىن ەمەس. وسىعان بايلانىستى قازاقستاندا تۇرعىن ءۇي قۇرىلىسى پروتسەسىن ودان ءارى جەتىلدىرۋ ماقساتىندا تۇرعىن ءۇي ساياساتىن رەفورمالاۋ ماسەلەلەرى بويىنشا زاڭ جوباسى ازىرلەندى. قازىرگى ۋاقىتتا ول ۇكىمەتتىڭ قاراۋىندا جاتىر»، دەدى سەناتور ءوز سوزىندە.

وڭىرگە ساپار بارىسىندا پارلامەنتشىلەر جاڭا شاعىن اۋداننىڭ قۇرىلىس بارىسىمەن تانىستى، قۇرىلىس الاڭدارىندا، ترانسفورماتورلىق جابدىقتار شىعاراتىن زاۋىتتا، سونداي-اق كولىك-لوگيستيكا ورتالىعىندا بولدى.

سوڭعى جاڭالىقتار

ۇقساس جاڭالىقتار