ايماقتار • 15 قازان، 2021

اتىراۋدا كولىكتەن 2 ميلليون تەڭگەنى ۇرلاعاندار ۇستالدى

619 رەت كورسەتىلدى

اتىراۋدا وزگە قالالاردان كەلگەن ءۇش جىگىت كولىك تەرەزەسىن سىندىرىپ، 2 ميلليون تەڭگەنى ۇرلاپ كەتكەن، دەپ حابارلايدى Egemen.kz.

وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتىنا قاراعاندا، ۇرلىق 12 قازاندا ساعات 13:31 شاماسىندا بولعان.

«اتىراۋ قالالىق پوليتسيا باسقارماسىنىڭ 102 وپەراتورىنا 35 جاستاعى تۇرعىن شاعىم تۇسىرگەن. ارىزدانۋشىنىڭ ايتۋىنشا، 12 قازاندا ساعات 12:50-13:25 ارالىعىندا بەلگىسىز ادام Kia Sportage ماركالى اۆتوكولىگىنىڭ جۇرگىزۋشى جاق تەرەزەسىن سىندىرىپ، سالوننان 2 ميلليون تەڭگە اقشاسىن ۇرلاپ كەتكەن. پوليتسيا قىزمەتكەرلەرى اتالعان دەرەككە قاتىستى جەدەل ىزدەستىرۋ جۇمىستارىن جۇرگىزدى. سول كەزدە اتىراۋ قالاسىنىڭ اۋماعىندا ورنالاسقان بەينەباقىلاۋ كامەرالارى ارقىلى جابىرلەنۋشى كولىگىنىڭ ارتىنان ۆاز-2114 ماركالى كولىگىنىڭ ەرىپ جۇرگەنى انىقتالدى. الايدا، اتالعان كۇدىككە ىلىنگەن اۆتوكولىكتىڭ قالا اۋماعىنان شىعىپ كەتكەن. سول سەبەپتەن، اۋداندارعا باعىتتاما بەرىلدى»، دەپ حابارلادى دەپارتامەنتتىڭ ءباسپاسوز قىزمەتى.

پوليتسيا قىزمەتكەرلەرى كۇدىكتى اۆتوكولىكتى «اتىراۋ-ورال» باعىتىنداعى جولدىڭ 132-شاقىرىمىندا توقتاتقان.

«كولىكتى 1977 جىلعى جۇرگىزۋشى باسقارعان. ونىمەن بىرگە بولعان 1974 جانە 1981 جىلعى  جولاۋشىلاردىڭ جەكە زاتتارى تەكسەرىلدى. ۆاز-2114 اۆتوكولىگىنىڭ ىشىنەن پاكەتكە ورالعان 2 ميلليون تەڭگە تابىلدى. وزگە كولىكتەن ۇرلانعان قارجى ايعاق زات رەتىندە تاركىلەندى. ۇرلىققا قاتىسى بار كۇدىكتىلەر ورال، اقتوبە جانە شىمكەنت قالاسىنىڭ تۇرعىندارى ەكەنى بەلگىلى بولدى»، دەپ ءمالىم ەتتى ءباسپاسوز قىزمەتىنەن.

قازىر ۇستالعان كۇدىكتىلەرگە قاتىستى قر قىلمىستىق كودەكسىنىڭ 188-بابىنىڭ 3-بولىگىمەن (ۇرلىق) قىلمىستىق ءىس قوزعالدى. كۇدىكتىلەر ۋاقىتشا ۇستاۋ يزولياتورىنا قاماۋعا الىندى. ولاردىڭ وزگە قىلمىستارعا قاتىسى تەكسەرىلىپ جاتىر.

سوڭعى جاڭالىقتار

ۇقساس جاڭالىقتار