قىرىمبەك كوشەرباەۆ تۇرسىن جۇرتبايدىڭ جازۋشىلىق, شىعارماشىلىق جولىنا توقتالىپ, ونىڭ عالىم رەتىندە اتقارعان اۋقىمدى جۇمىسىن اتاپ ءوتتى. مەملەكەتتىك حاتشى عالىمنىڭ ەكى تومدىق «دۋلىعا» تاريحي-تانىمدىق كىتابىنىڭ بەرەر تاعىلىمى مول ەكەنىن, ۇلى اباي, دانىشپان مۇحتار تۋرالى زەرتتەۋلەرىندەگى ويلارىنىڭ ومىرشەڭدىگىن ايتىپ, «بەيۋاق», «بەسىگىڭدى تۇزە!..», «تالقى», «مۋحتار ومارحانوۆيچ اۋەزوۆ», «قۇنانباي», «سۇرە ءسوز» ەڭبەكتەرىنىڭ عىلىمي قۇندىلىعى اسا جوعارى دەپ باعا بەردى.
ال 1922-1937 جىلدار ارالىعىنداعى, 50-جىلدارداعى ۇلت زيالىلارىن قۋدالاۋ, قۋعىن-سۇرگىنگە ۇشىراتۋ تۋرالى, «الاش» پارتياسى مەن الاشوردا ۇكىمەتى باسشىلارى مەن مۇشەلەرىنىڭ ۇستىنەن جۇرگىزىلگەن تەرگەۋ ىستەرىنىڭ نەگىزىندە «ۇرانىم – الاش!..» اتتى ءۇش تومدىق زەردەلى زەرتتەۋىنىڭ شىعۋى رۋحاني دۇنيەمىزگە ۇلكەن سەرپىلىس اكەلدى.
حالىقارالىق عىلىمي-تاجىريبەلىك كونفەرەنتسيادا مەملەكەتتىك حاتشى تاريحقا قاتىستى بىرقاتار ويىن ورتاعا سالىپ, ۇسىنىستارىمەن ءبولىستى. سونىڭ نەگىزىندە تاريحي ءىلىم-ءبىلىمنىڭ بىرجاقتى كوزقاراستارىنان ارىلا وتىرىپ, وتكەن تاريحىمىزدىڭ شىنايى بەينەسىن جاساۋدى, ەجەلگى جانە ورتا عاسىرلار تاريحىنا باسا نازار اۋدارۋدى ۇسىندى. بۇدان بولەك كەڭەس داۋىرىندەگى قازاقستان تاريحىن قايتا پايىمداۋدىڭ, ەلىمىزدىڭ وسى زامانعى تاريحىنىڭ تولعاقتى ماسەلەلەرىن زەرتتەۋدى كۇشەيتۋدىڭ, قازاق دياسپورالارىنىڭ تاريحىن زەردەلەۋدىڭ ماڭىزدى ەكەنىنە توقتالدى.
كونفەرەنتسياعا قر پرەزيدەنتىنىڭ كەڭەسشىسى باۋىرجان وماروۆ, قر پرەزيدەنتىنىڭ ءباسپاسوز-حاتشىسى بەرىك ءۋالي, ءبىلىم جانە عىلىم ءمينيسترى اسحات ايماعامبەتوۆ, نۇر-سۇلتان قالاسىنىڭ اكىمى التاي كولگىنوۆ جانە ەلىمىزدىڭ بەلگىلى عالىمدارى قاتىستى.
