13 قازاندا كەشكە ساعات 20:27-دە پيچۋگين كوشەسىندەگى 5 قاباتتى تۇرعىن ۇيدەگى ءورت تۋرالى حابارلاما كەلىپ ءتۇستى. ءوتىنىش بەرۋشى ورتەنىپ جاتقان پاتەردە بالالار بولۋى مۇمكىن دەدى. شاقىرۋ ورنىنا جەدەل كەلگەن ءورت سوندىرۋشىلەر دەرەۋ ادامداردى قۇتقارۋعا كىرىستى.
«بارلاۋ جۇرگىزگەن كەزدە 3-قاباتتاعى پاتەردىڭ اسۇيىندە جالپى كولەمى 6 شارشى مەتر جەردىڭ جانعانى انىقتالدى. قاتتى ءتۇتىن سالدارىنان كىرەبەرىستەگى پاتەرلەردەن بىرنەشە تۇرعىن وزدىگىنەن شىعا الماي قالعان. ءورت سوندىرۋشىلەر قۇتقارۋ قالپاقتارىن قولدانا وتىرىپ, كىرەبەرىستەن 10 ادامدى, ونىڭ ىشىندە جانىپ جاتقان پاتەردىڭ ۇستىندەگى پاتەردە بولعان 2 بالانى الىپ شىقتى.
تەپلوۆيزوردىڭ كومەگىمەن بارلىق ىرگەلەس جانە جاقىن ورنالاسقان پاتەرلەر تەكسەرىلدى. قابىلدانعان شارالاردىڭ ارقاسىندا ءورت 21:05-تە ءسوندىرىلدى.
الدىن الا بولجام بويىنشا ءورت ەلەكتر سىمدارىنىڭ قىسقا تۇيىقتالۋىنان شىققان», دەپ مالىمدەدى قاراعاندى وبلىسى تجد ءباسپاسوز قىزمەتى.
وتكەن تاۋلىكتە قاراعاندى وبلىسى توتەنشە جاعدايلار دەپارتامەنتى بولىمشەلەرىنىڭ قىزمەتكەرلەرى 20 رەت شاقىرتۋعا شىققان, ونىڭ ىشىندە ءورت سوندىرۋگە 12 رەت, اۆاريالىق-قۇتقارۋ جانە ىزدەۋ جۇمىستارىنا 8 رەت باردى.
جالپى ەسەپتەگەندە 17 ادام قۇتقارىلدى. 5 ءورت ەلەكتر سىمدارىنىڭ قىسقا تۇيىقتالۋىنان بولعانى انىقتالدى. بۇل رەتتە پەشتەر مەن ءتۇتىن مۇرجالارىن ورناتۋ كەزىندە ءورت قاۋىپسىزدىگى ەرەجەلەرىنىڭ بۇزىلۋى وتتىڭ تۇتانۋىنا سەبەپ بولعان.
