حاتتامانىڭ ماقساتى - كاسپي تەڭىزىنىڭ بيولوگيالىق ارتۇرلىلىگىن, ەكوجۇيەسىن ساقتاۋ جانە بيولوگيالىق رەسۋرستاردى تۇراقتى پايدالانۋدى قامتاماسىز ەتۋ.
وسىعان بايلانىستى, كاسپي ماڭى مەملەكەتتەرىمەن مىناداي شارالاردى قابىلداۋ قاراستىرىلعان:
1. قورعالاتىن تۇرلەر مەن ولاردىڭ مەكەندەۋ ورىندارىنا تەرىس اسەرىن تيگىزەتىن قىزمەتتى رەتتەۋ;
2. فلورا مەن فاۋنانىڭ قورعالاتىن تۇرلەرىن, ولاردىڭ بولشەكتەرىن, سونداي-اق دەريۆاتتاردى كوممەرتسيالىق ماقساتتا ادەيى, كەزدەيسوق اۋلاۋدى جانە قاجەت بولۋىنا قاراي ولارعا تىيىم سالۋدى باقىلاۋ.
ءاربىر تاراپ باسقا تاراپتار قارسى بولماعان جاعدايدا وسى حاتتامانىڭ ماقساتتارىن قورعاۋ ماقساتىندا تەڭىز ورتاسىندا جانە جاعالاۋ اۋماعىندا قورعالاتىن اۋدانداردى بولە الادى.
«اۋدانداردى قورعاۋ جانە ولاردى باسقارۋ ماقساتىندا تاراپتار قاجەتتى تابيعات قورعاۋ شارالارىن كوزدەيدى. ونىڭ ىشىندە ەكوجۇيەنىڭ تۇتاستىعىنا تىكەلەي نەمەسە جاناما زيان كەلتىرۋى مۇمكىن قالدىقتار مەن وزگە دە زاتتاردى كومۋگە نەمەسە ورنالاستىرۋعا تىيىم سالۋدى ەنگىزۋ, وسى اۋدانعا ينترودۋكتسيانى جانە رەينترودۋكتسيانى رەتتەۋ, قۇرىلىس نەمەسە ىزدەستىرۋ جۇمىستارىنا بايلانىستى كەز كەلگەن قىزمەتتى رەتتەۋ, بالىق اۋلاۋدى, اڭشىلىقتى, جانۋارلاردى اۋلاۋدى, وسىمدىكتەر جيناۋدى نەمەسە ولاردى جويۋدى رەتتەۋ ەسكەرىلگەن.
حاتتاماعا قوسىلۋ قازاقستاننىڭ بيولوگيالىق ارتۇرلىلىگىن ساقتاۋعا, تەڭىز كەمەلەرىنەن جانە انتروپوگەندىك كوزدەردەن قورشاعان ورتانىڭ لاستانۋىن جول بەرمەۋگە, بيولوگيالىق رەسۋرستاردى ورنىقتى پايدالانۋدى قامتاماسىز ەتۋگە, سونداي-اق كاسپي تەڭىزىنىڭ تەڭىز ورتاسىن قورعاۋ جونىندەگى جەدەل جانە ءتيىمدى شارالاردى ىسكە اسىرۋ جونىندەگى مەملەكەتتەردىڭ كوپجاقتى ىنتىماقتاستىعىنا جاردەمدەسۋگە قاتىسۋ قاجەتتىلىگىمەن ايقىندالادى», دەدى قر ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ.
ونىڭ ايتۋىنشا, حاتتاما مۇددەلى مەملەكەتتىك ورگاندارمەن ەسكەرتۋلەرسىز كەلىسىلدى جانە تەرىس الەۋمەتتىك-ەكونوميكالىق سالدارعا اكەپ سوقتىرمايدى.
