ونەر • 14 قازان، 2021

جۇمەكەن جىرىن جاتتاعاندار

قوشالاق اتالاتىن قۇيقالى توپىراقتا كىندىك قانى تامىپ، قازاق پوەزياسىنا وزىندىك ۇنىمەن تانىلعان قالامگەردىڭ ءار ولەڭىنەن تۋعان ەلىنە، ۇلتىنا دەگەن كەرىمسال ساعىنىشى بايقالۋشى ەدى. جاقىندا جىرلارىمەن ەل جادىندا جاتتالعان ءانۇران اۆتورلارىنىڭ ءبىرى، بەلگىلى اقىن جۇمەكەن ناجىمەدەنوۆ اتىنداعى كوركەمسوز وقۋشىلاردىڭ رەسپۋبليكالىق بايقاۋى ءوتتى. بايقاۋ ەل تاۋەلسىزدىگىنىڭ 30 جىلدىعىنا ارنالدى.

جولداسبەك كوشەرباي ۇلى

– اتىراۋ وبلىسىندا بۇل بايقاۋ 2016 جىلدان بەرى ۇيىمداستىرىلىپ كەلەدى. بايقاۋدى وتكىزۋدەگى باستى ماقسات – جۇمەكەن ناجىمەدەنوۆتىڭ ادەبي مۇراسىن حالىق، اسىرەسە، جاستار اراسىندا ناسيحاتتاۋ، اقىننىڭ شىعارماشىلىعى ارقىلى جاس ۇرپاقتى ادامگەرشىلىككە، ۇلتتىق رۋحقا، وتانسۇيگىشتىككە تاربيەلەۋ. بيىلعى بايقاۋ «تاۋەلسىز ەلىمە – 30 جىل» دەپ اتالدى، – دەيدى وبلىس اكىمىنىڭ ورىنباسارى باقىتگۇل حامەنوۆا.

بەلگىلى جازۋشى مەرەكە قۇلكەنوۆ توراعالىق ەتكەن قازىلار القاسى ەلىمىزدىڭ ءار وڭىرىنەن قاتىسقان جاس كوركەمسوز وقۋشىلاردىڭ شەبەرلىگىن ساراپقا سالدى. اسىرەسە، كوركەم ءماتىندى تاڭداۋ تالعامى، وقۋ شەبەرلىگى، داۋىس مانەرى مەن ءتىل تازالىعىنا، ساحنادا ءوزىن ۇستاۋىنا باسا ءمان بەرىلدى. ءىس-شاراعا اقىننىڭ ۇلكەن قىزى ايكەن ناجىمەدەنوۆا دا قاتىسىپ، بىرەگەي قالامگەردىڭ جىرىن جاتتاعاندارعا ساتتىلىك تىلەدى.

قازىلار القاسىنىڭ ۇيعارۋىمەن ايگەرىم ساعاتوۆا (قىزىلوردا وبلىسى)، نۇرمۇحامەد سەرىكباەۆ (قوستاناي وبلىسى) پەن حۇسني عابساتتار (اقتوبە وبلىسى) ىنتالاندىرۋ جۇلدەسىنە يە بولدى. ءۇشىنشى جۇلدەنىڭ 100 مىڭ تەڭگەلىك سەرتيفيكاتى الماتىلىق مەرۋەرت اڭسات پەن جامبىلدىق باقتيار بەكنازاروۆقا بەرىلدى. ەكىنشى جۇلدەنى (200 مىڭ تەڭگە) اتىراۋلىق بۇلان نۇرعاليەۆ يەلەندى. ال 300 مىڭ تەڭگەسى بار ءبىرىنشى جۇلدەگە پاۆلودار وبلىسىنان قاتىسقان راسۋل تەمەش لايىق دەپ تانىلدى.

بايقاۋدىڭ باس جۇلدەسى – 400 مىڭ تەڭگەنى ورال قالاسىنداعى №42 «اق نيەت» مەكتەپ-گيمنازياسىندا قازاق ءتىلى مەن ادەبيەتى پانىنەن ءدارىس بەرەتىن مۇعالىم ابىلايحان قۋانىشەۆ جەڭىپ الدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز