ماراپاتتاۋ راسىمىندە ءسوز العان كسرو حالىق ءارتىسى, مەملەكەتتىك سىيلىقتىڭ لاۋرەاتى, بايقاۋدىڭ قازىلار القاسىنىڭ توراعاسى بيبىگۇل تولەگەنوۆا ايتۋلى ءىس-شارانىڭ مازمۇندى وتكەندىگىن ايتا كەلىپ: «بىزگە ۇزدىكتەردى تاڭداۋ وڭاي بولعان جوق, دەگەنمەن ەڭ مىقتى ورىنداۋشى جەڭىسكە جەتتى. ەندى جاڭا جۇلدىزدار الەمنىڭ وزىق ساحنالارىندا ەلىمىزدىڭ اتىن شىعارادى دەپ سەنەمىن. بايقاۋدىڭ قالىپتاسۋىنا ەلباسىنىڭ وراسان زور قولداۋى بولدى. بۇگىندە وعان جوعارعى دەڭگەيدە كوڭىل بولىنۋدە. مەملەكەت باسشىسى قاسىم-جومارت توقاەۆ ءوز حاتىندا بايقاۋ قاتىسۋشىلارىنا جۇرەكجاردى تىلەگىن ارنادى. مەنىڭشە, بۇل بارشامىزدى ودان سايىن شابىتتاندىرا تۇسەدى. مادەنيەت جانە سپورت مينيسترلىگىنە دە ريزاشىلىعىمدى بىلدىرەمىن!» دەدى حالقىمىزدىڭ كۇمىس كومەي ءانشىسى.
ايتا كەتەيىك, ەكى كەزەڭنەن تۇرعان حالىقارالىق بايقاۋعا قاتىسۋعا ەلۋدەن استام ۇمىتكەر ءوتىنىم بەرسە, ولاردىڭ باسىم بولىگى قازاقستان, رەسەي, قىرعىزستان, باشقۇرتستان جانە وزبەكستاننان كەلىپ تۇسكەن.
ءبىرىنشى سىيلىقتى – رەسەيدەن كەلگەن گابريەل دە-رەل مەن وزبەكستاندىق اتابەك نازيروۆ جانە جەرلەسىمىز ءاليحان زەينوللا السا, ەكىنشى سىيلىقتى – قازاقستاندىق ۇلپان اۋباكىروۆا, اسەم اۋباكىروۆا جانە وزبەك ەلىنەن كەلگەن ازيزا مۋحامەدوۆا يەلەندى.
سونداي-اق «استانا وپەرا» تەاترى دىنمۇحامەد كوشكىنباەۆ پەن اسەم اۋباكىروۆاعا Astana Opera حالىقارالىق وپەرا اكادەمياسىندا اي سايىنعى ستيپەنديامەن وقۋعا ارنالعان سەرتيفيكاتىن تابىس ەتتى.
