تايۆان تاراپى سي ءتسزينپيننىڭ ارەكەتىن ايىپتاپ, بەيجىڭدى ماجبۇرلەۋ جوسپارىنان باس تارتۋعا شاقىردى. سونداي-اق ەل بولاشاعىن تەك تايۆان حالقى شەشە الاتىنىن تاعى دا اشىق ايتتى.
دەموكراتيالىق جولمەن جۇرەتىن ءتايۆاننىڭ ەگەمەندىگىن بەيجىڭ بيلىگى مويىنداعان ەمەس. بىراق تايپەي ءوز بوستاندىعىن قورعاۋعا ۋادە بەردى.
تايۆاندا پرەزيدەنت كەڭسەسى وزدەرىنىڭ قىتاي حالىق رەسپۋبليكاسىنىڭ قۇرامىنا كىرمەيتىن, ەگەمەن, تاۋەلسىز ەل ەكەنىن مالىمدەدى. سونداي-اق قىتايدىڭ ء«بىر ەل, ەكى جۇيە» تۋرالى جوسپارىن قابىلدامايتىنىن تاعى دا قايتالاپ ايتتى. «ۇلتتىڭ بولاشاعى – تايۆان حالقىنىڭ قولىندا», دەلىنگەن پرەزيدەنت اكىمشىلىگى جاريالاعان حابارلامادا.
اقش مەملەكەتتىك دەپارتامەنتىنىڭ وكىلى ۆاشينگتوننىڭ تايۆانعا قاتىستى ۇستانىمى وزگەرىسسىز قالاتىنىن قايتالاپ, امەريكالىقتار تايۆان حالقىنىڭ تىلەكتەرى مەن مۇددەلەرىن ەسكەرىپ, وڭىردەگى ماسەلەلەردى بەيبىت جولمەن شەشۋدى قولدايتىنىن جەتكىزگەن.
ء«بىز بەيجىڭنىڭ تايۆانعا قارسى اسكەري, ديپلوماتيالىق جانە ەكونوميكالىق قىسىمىن توقتاتىپ, تايۆانمەن ماڭىزدى ديالوگ جۇرگىزۋگە شاقىرامىز», دەدى ءباسپاسوز حاتشىسى.
اقپارات قۇرالدارىنىڭ حابارلاۋىنشا, قىتاي اۋە كۇشتەرى 1 قازاننان باستاپ تايۆاننىڭ اۋە كەڭىستىگىن بۇزىپ كىرگەن. وعان 150 -گە جۋىق ۇشاق قاتىسقان, الايدا بۇل زاڭسىزدىق اياقتالدى.
