قاراعاندىداعى اۆتوشەرۋ سپورتشىلارىمىزدى قولداۋعا ارنالدى

قاراعاندى وبلىسىندا سوچي وليمپياداسىنا قاتىسىپ جاتقان قازاقستاندىق سپورتشىلاردى قولداۋعا ارنالعان اۆتوشەرۋ ءوتتى. بۇل تۋرالى «حابار» تەلەارناسى حابارلادى. ەلىمىزدىڭ كوك بايراعىن كوككە  كوتەرگەن 10-نان استام كولىك قالانىڭ ورتالىق كوشەلەرىمەن ءجۇرىپ ءوتتى. مۇز سارايىنان باستالعان شەرۋ «شاحتەر» ستاديونىندا اياقتالىپ, ەستافەتانى قاراعاندى قالاسىنىڭ  سپورتشىلارى قابىلداپ الدى. ولاردىڭ اراسىندا قىسقى سپورت ويىندارىندا  ۇزدىك ونەر كورسەتىپ جۇرگەن ساڭلاقتارىمىز دا بار. بارلىعى  ەل  ابىرويىن ارقالاعان سپورتشىلارىمىزدى وليمپ شىڭىنان كورۋگە تىلەكتەستىگىن ءبىلدىردى. سوچي XXII قىسقى وليمپياداسىنا ىرىكتەلىنگەن ەلىمىزدىڭ ۇلتتىق قۇراماسى اراسىندا قاراعاندى وبلىسىنان كونكيشى ەكاتەرينا ايدوۆانىڭ بار ەكەنىن بىلەمىز. ول ءدۇبىرلى دوداعا اتتانار الدىندا بۇقارالىق اقپارات قۇرالى وكىلىنە بەرگەن سۇحباتىندا ءتورت جىلدا ءبىر وتەتىن وليمپياداعا ءالسىز سپورتشىنىڭ قاتىسپايتىنىن ايتقان-دى... «ءبىز سالاۋاتتى ءومىر سالتىن قولدايمىز. بۇقارالىق سپورتتى دامىتۋعا از دا  بولسا ءوز ۇلەسىمىزدى قوسايىق دەگەن نيەتپەن اۆتوشەرۋگە شىقتىق. باستى ماقساتىمىز - قازاقستاننىڭ نامىسىن قورعايتىن جەرلەستەرىمىزگە قولداۋ ءبىلدىرۋ», - دەيدى اۆتوشەرۋگە قاتىسۋشى يۋري مالچۋشكين. ءامىرحان الماعانبەتوۆ. دەرەككوز: «حابار» تەلەارناسى. فوتو: «حابار» تەلەارناسى.