وسىدان ءبىر جىل بۇرىن «SCAT» اۋە كومپانياسىنا قاراستى ۇشاق اپاتقا ۇشىراعاندا قازا تاپقان 21 ادامنىڭ ءبىرى – قىزىلجار ءوڭىرىنىڭ تۋماسى قايسار مالگاجداروۆ ەدى. ول كەدەن سالاسىنداعى ەڭبەك جولىن ينسپەكتورلىقتان باستاپ, پولكوۆنيك شەنىن الدى. دەپارتامەنت باسشىسى دارەجەسىنە دەيىن كوتەرىلدى. ءومىرىنىڭ سوڭعى جىلدارىندا الماتى قالاسى بويىنشا كەدەندىك باقىلاۋ دەپارتامەنتى «الماتى» كەدەن بەكەتىنە جەتەكشىلىك ەتتى. كوپ جىلعى ەسەلى ەڭبەگى «قۇرمەت» وردەنىمەن اتالدى. سالاماتتى ءومىر سالتىن نىق ۇستاپ, كۇرەستەن سپورت شەبەرى اتاندى. «كوزدەن كەتسە دە كوڭىلدەن كەتپەيدى» دەمەكشى, ابزال ازاماتتى جەرلەستەرى ۇمىتپاق ەمەس.
سونىڭ ءبىر ايعاعىنداي, «ەسىل» مەيرامحاناسىندا 44 جاسىندا قاپيادا كوز جۇمعان قايسار مالگاجداروۆتى ەسكە الۋ كەشى ءوتتى. جيىن الدىندا مارقۇمنىڭ ءومىر, ەڭبەك جولىنا ارنالعان كورمە ۇيىمداستىرىلىپ, بەينەفيلم كورسەتىلدى. شارادا سويلەۋشىلەر قايساردىڭ ادامگەرشىلىك, جولداستىققا بەرىك, دوسقا ادال قاسيەتتەرى جايلى سىر شەرتىپ, ەستەلىكتەر ايتتى. ودان كەيىن ونىڭ اتىنداعى قايىرىمدىلىق قورىنىڭ تۇساۋكەسەرى ءوتىپ, الەمدىك, رەسپۋبليكالىق جارىستاردا توپ جارىپ جۇرگەن ءبىر توپ بالعىن سپورتشىعا 50 مىڭ تەڭگەنىڭ سەرتيفيكاتى مەن قايساردىڭ وتباسى جايلى جازىلعان «التىن بەسىك – مويا سەميا» اتتى عۇمىرنامالىق كىتاپ تارتۋ ەتىلدى.
جيىن سوڭىندا مارقۇمنىڭ اپاسى, وبلىستىق ءماسليحاتتىڭ دەپۋتاتى باقىتجان ساميەۆا جينالعاندارعا ريزاشىلىق ءبىلدىرىپ, قور ماقساتى ءوڭىر سپورتشىلارىنا جۇيەلى قارجىلىق قولداۋ كورسەتۋدى كوزدەيتىنىن جەتكىزدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
