بۇل تۋرالى ۇلتتىق قاۋىپسىزدىك قىزمەتىنىڭ ءباسپاسوز قىزمەتى مالىمدەدى.
تاجىكستان رەسپۋبليكاسى پرەزيدەنتىنىڭ 2021 جىلعى 30 قىركۇيەكتەگى № 252 جارلىعىمەن رەسپۋبليكا تاۋەلسىزدىگىنىڭ 30 جىلدىعىنا جانە قىزمەتتىك بورىشىن ورىنداۋ كەزىندە تانىتقان ەرلىگى مەن جانقيارلىعى ءۇشىن كىشى سەرجانت رادجان ارميا ۇلى باتىرقانوۆ 1-ءشى دارەجەلى «سپيتامەن» وردەنىمەن ناگرادتالدى (قايتىس بولعاننان كەيىن).
تاجىكستاننىڭ باۋىرلاس حالقى 1993-2001 جىلدار ارالىعىندا تاجىك-اۋعان شەكاراسىندا اسكەري بورىشىن وتەگەن جەكە قۇراما اتقىشتار باتالونىنىڭ اسكەري قىزمەتشىلەرى كورسەتكەن ەرلىگىن ەسكە الىپ, قۇرمەت تۇتادى.
ايتا كەتەيىك, رادجان ارميا ۇلى (1975-1994) - جاۋىنگەر-ينتەرناتسيوناليست, باتىر-شەكاراشى. جەكە قازاقستاندىق قۇراما باتالونى كۇرشىم ۆزۆودىنىڭ قۇرامىندا قىزمەت اتقاردى.
1994 جىلى 28 قىركۇيەكتە حوروگ شەكارا جاساعىنىڭ ۋچاسكەسىندە تاجىك وپپوزيتسياسىنىڭ ەكى جۇزدەن استام حاكيم باستاعان سودىرلارى ۆيسحوروۆ شاتقالىنداعى 5-ءشى جانە 6-شى شەكارا زاستاۆالارىنىڭ تۇيىسكەن جەرىنەن بۇزىپ وتۋگە تىرىستى.
بۇل ۇرىسقا قازاقستاندىق قۇراما باتالوننىڭ جەكە قۇرامى بەلسەنە قاتىستى. حاكيم سودىرلارى 9 جۇك كولىگى جانە ەكى «ۋازيكپەن» كالاي-حۋمب اۋدانىنىڭ ورتالىعى ارقىلى اۋعانستان يسلام مەملەكەتىنە ءوتۋ نيەتىمەن مەملەكەتتىك شەكارا سىزىعىنىڭ بويىنداعى حوروگ باعىتىنا بەت الدى. لەكتىڭ قوزعالىسىن «قارا قول» لاقاپ اتىمەن بەلگىلى بولعان سودىر باسقاردى ( كەيىننەن «حاتتاب» دەپ تانىلعان حالىقارالىق تەرروريست, 1995 جىلدان 2002 جىلعا دەيىن شەشەنستانداعى رەسەي فەدەرالدى كۇشتەرىنە قارسى سوعىسقا قاتىسقان شەشەن سەپاراتيستەرىنىڭ جەتەكشىسى ).
بۇل ۇرىستا رادجان باتىرقانوۆ قارۋلى سودىرلارمەن بولعان قيان-كەسكى شايقاسقا ءبىرىنشى بولىپ كىردى. ءوز ءومىرىنىڭ قۇنىمەن قارۋلاستارىن قۇتقارىپ قانا قويماي, ۇرىستا جەڭىسكە جەتۋىنە جول اشتى.
