تاراپتار قىلمىستىق قۋدالاۋ جانە ادام قۇقىقتارىن قورعاۋ, زاڭدىلىق پەن سوت تورەلىگىن ىلگەرىلەتۋ ماسەلەلەرىن تالقىلادى. ءىىم باسشىسى ادام قۇقىقتارى سالاسىنداعى حالىقارالىق ستاندارتتاردى ساقتاۋ, جازالاردىڭ ورىندالۋىن ىزگىلەندىرۋ جانە ازاماتتىق باقىلاۋدى كۇشەيتۋ بويىنشا جۇرگىزىلىپ جاتقان جۇمىستار تۋرالى اڭگىمەلەدى.
«ەل پرەزيدەنتى ىشكى ىستەر ورگاندارىنىڭ ادام قۇقىقتارىن قامتاماسىز ەتۋ جانە قۇقىق قورعاۋ قىزمەتىن جەتىلدىرۋ باعىتىنداعى قىزمەتىنە ەرەكشە كوڭىل بولەدى. وسىعان بايلانىستى قىلمىستىق-اتقارۋ جۇيەسىن رەفورمالاۋدىڭ نەگىزگى باسىمدىقتارى, ءبىرىنشى كەزەكتە, ادام قۇقىقتارىن ساقتاۋ, سوتتالعانداردى ۇستاۋ جاعدايلارىن جاقسارتۋ جانە پەنيتەنتسيارلىق ينفراقۇرىلىمدى حالىقارالىق ستاندارتتارعا سايكەس جاڭعىرتۋ بولىپ ايقىندالدى», دەپ مالىمدەدى ەرلان تۇرعىمباەۆ.
ول مينيسترلىكتىڭ ادام قۇقىقتارىن ساقتاۋ ماسەلەلەرى بويىنشا حالىقارالىق ءىس-شارالارعا بەلسەندى قاتىساتىنىن اتاپ ءوتتى.
ء«بىزدىڭ باستامامىز بويىنشا جانە ورتالىق ازياداعى حالىقارالىق تۇرمە رەفورماسى (PRI) وكىلدىگىنىڭ قولداۋىمەن 2019 جىلعى مامىردا ءبىرىنشى پەنيتەنتسيارلىق فورۋم, ال وسى جىلعى شىلدەدە ديپلوماتيالىق ميسسيالار (ەۋرووداق, بۇۇ) باسشىلارىنىڭ, ادام قۇقىقتارى سالاسىنداعى ۇلتتىق جانە حالىقارالىق ساراپشىلاردىڭ جانە باسقا دا رەسمي تۇلعالاردىڭ قاتىسۋىمەن ەكىنشى حالىقارالىق فورۋم («قازىرگى كەزەڭدەگى پەنيتەنتسيارلىق جۇيە») وتكىزىلدى. فورۋمعا قاتىسۋشىلاردىڭ پىكىرلەرى مەن ۇسىنىستارىن تالقىلاعاننان كەيىن سوتتالعان ادامداردىڭ قۇقىقتىق جاعدايىن جاقسارتۋ ءۇشىن قولدانىستاعى زاڭناماعا وزگەرىستەر مەن تولىقتىرۋلار ەنگىزىلەدى», دەپ اتاپ ءوتتى قازاقستاننىڭ ىشكى ىستەر ءمينيسترى.
مەملەكەت باسشىسىنىڭ تاپسىرماسى بويىنشا, قۇقىققا قايشى ارەكەتتەردى بولدىرماۋ ماقساتىندا پوليتسيانىڭ بارلىق قىزمەتتىك ءۇي-جايلارىندا جانە پەنيتەنتسيارلىق مەكەمەلەردە بەينەكامەرالار ورناتۋ جۇمىستارى باستالعانى اتاپ ءوتىلدى.
مينيستر سونداي-اق قازاقستاندىق پوليتسيا قىزمەتىن اۋقىمدى رەفورمالاۋ جانە ىشكى ىستەر ورگاندارىن جاڭعىرتۋ جونىندەگى جول كارتاسىن ىسكە اسىرۋ تۋرالى ايتىپ بەردى.
اتاپ ايتقاندا, حالىقپەن كەرى بايلانىس ورناتا وتىرىپ, پوليتسيا جۇمىسىنىڭ سەرۆيستىك مودەلىنە كوشۋ, «جۇرتقا جاقىن پوليتسيا» قاعيداتىن قامتاماسىز ەتۋ, قاۋىپسىزدىكتىڭ قازىرگى زامانعى جۇيەلەرىن, قولجەتىمدىلىك پەن تۇرعىنداردىڭ سەنىمىنە قاتىستى نەگىزگى كريتەريلەر بويىنشا ىشكى ىستەر ورگاندارىنىڭ قىزمەتىن باعالاۋدىڭ جاڭا جۇيەسىن ەنگىزۋ جايىندا كەڭىنەن اڭگىمەلەدى.
كەزدەسۋ بارىسىندا تاراپتار قۇقىقتىق ءتارتىپتى قامتاماسىز ەتۋ, قىلمىسقا قارسى كۇرەس جانە ادام قۇقىقتارىن ساقتاۋ سالالارىندا مينيسترلىك حالىقارالىق ساراپشىلاردىڭ كومەگىمەن بەلگىلى ءبىر جۇمىس اتقارىلعانىن تىلگە تيەك ەتتى.
