سقو بويىنشا قىلمىستىق اتقارۋ جۇيەسى دەپارتامەنتى ءباسپاسوز قىزمەتىنىڭ مالىمەتىنشە, قىزىلجار اۋدانىنىڭ پروباتسيا قىزمەتى ۆولونتەرلەرمەن جانە قىزىلجار اۋدانىنىڭ كوشى-قون قىزمەتىمەن بىرگە 44 جاستاعى سوتتالعانعا جەكە كۋالىكتى رەسىمدەۋگە كومەكتەستى.
ەر ادام رەسەيدە تۋعان. ءجاسوسپىرىم شاعىندا اناسىمەن بىرگە قازاقستانعا قونىس اۋدارعان, الايدا كەيىن شەشەسى ونى تاستاپ كەتكەن. قامقورشىسىنىڭ بولماۋىنا بايلانىستى قۇجات الا الماعان.
«سوت ونى تۋ تۋرالى كۋالىك نەگىزىندە سوتتاعان. ودان باسقا قولىندا ەشقانداي قۇجاتى جوق. بىزگە پروباتسيا قىزمەتىنە تىركەلىسىمەن, وعان الەۋمەتتىك-قۇقىقتىق كومەك كورسەتتىك. كوشى-قون قىزمەتىنە ءتيىستى قۇجاتتاردى تاپسىردىق, ولار رەسەيگە سۇراۋ سالدى. راستايتىن قۇجاتتار كەلىسىمەن حالىققا قىزمەت كورسەتۋ ورتالىعى ارقىلى جەكە كۋالىگىن الدىق», دەيدى سقو بويىنشا قاجد قىزىلجار اۋدانىنىڭ پروباتسيا قىزمەتى ءبولىمىنىڭ ينسپەكتورى تالعات سەرىك ۇلى.
ماماننىڭ ايتۋىنشا, مۇنداي جاعدايدا قۇجاتتى رەسىمدەۋ ءۇشىن ازاماتتى 15 جىلدان ارتىق بىلەتىن ادامدار كۋالىك ەتۋى كەرەك.
«ونى 15 جىلدان بەرى بىلەتىن ادامداردى ىزدەدىك, بۇرىنعى تۇرعىلىقتى جەرىنە بارىپ, تۇرعىندارمەن سويلەستىك. ولاردان تۇسىنىكتەمە الدىق. كەيىن بارلىق راستايتىن قۇجاتتاردى كوشى-قون قىزمەتىنە تاپسىردىق», دەيدى تالعات سەرىك ۇلى.
جەكە كۋالىك العان ەر ادام ەندى جۇمىسقا ورنالاسپاق نيەتتە. «بۇگىن ەرەكشە كۇن. جەكە كۋالىك الىپ جاتىرمىن. قۇجاتسىز قيىن, ەشقانداي كومەك الا المايسىڭ. ەندى رەسمي تۇردە جۇمىسقا تۇرماقپىن», دەيدى سوتتالۋشى.
جىل باسىنان سقو پروباتسيا قىزمەتىنىڭ قالالىق جانە اۋداندىق بولىمدەرى ينسپەكتورلارى 5 ادامعا العاش رەت جەكە كۋالىگىن الۋعا, 9 سوتتالعان ادامنىڭ جەكە كۋالىگىن قايتا قالپىنا كەلتىرۋگە كومەكتەستى.
