بۇل كوپىر – اۋىل تۇرعىندارىن كوپتەن تولعاندىرعان ماسەلە. ونىڭ قاجەتتىلىگى تۋرالى ءتۇرلى دەڭگەيدەگى باسشىلارعا تالاي رەت شاعىم ايتىلدى. ويتكەنى سايدان ءوتۋ اسىرەسە مەكتەپكە, بالاباقشاعا باراتىن 130-دان استام بالاعا قيىندىق تۋدىردى. جاڭبىر, قار جاۋعان كەزدە ولار 1,5 شاقىرىمداي جولدى اينالىپ جۇرۋگە ءماجبۇر بولدى.
ەندى مىنە, شوقپارتوعايلىق تۇرعىندار كوپىر سالۋ ءۇشىن قولداۋدى ءۇمىت ارتقان اكىمدەردەن ەمەس, شەتەلدىك ينۆەستورمەن بىرلەسكەن كاسىپورىننىڭ باسشىلارىنان كورىپ وتىر. «تەڭىزشەۆرويل» جشس كوپىردىڭ قۇرىلىسىنا قاجەتتى ماتەريالداردى الۋعا «قوعامدىق كەڭىستىكتەر» جوباسى اياسىندا ارنايى گرانت ۇسىندى. كوپىردىڭ ۇزىندىعى – 35, ال ەنى – 1,5 مەتر. جاۋىن-شاشىننان قورعاۋ ءۇشىن كوپىردىڭ ۇستىنگى بولىگى شاتىرمەن جابىلعان.
– «قوعامدىق كەڭىستىكتەر» جوباسى كاسىپورىننىڭ الەۋمەتتىك ينۆەستيتسيالار باعدارلاماسى اياسىندا جۇزەگە اسىرىلىپ كەلەدى. جوبانىڭ ماقساتى – ەلدى مەكەندەردىڭ تۇرعىندارىنا قولدانىستاعى دەمالىس ورىندارىن جاقسارتۋعا نەمەسە جاڭاسىن اشۋعا قولداۋ كورسەتۋ. وسى جوبا ارقىلى اتىراۋ وبلىسىنىڭ جىلىوي اۋدانىنا – 54, ال ماڭعىستاۋ وبلىسىنا 35 گرانت بەرىلدى. گرانت كولەمى 2,5-3 ملن تەڭگەنى قۇرايدى. قازىر اتالعان جوبانىڭ جەمىسىن 16 مىڭنان استام تۇرعىن كورىپ وتىر, – دەپ ءمالىم ەتتى كاسىپورىننىڭ ءباسپاسوز قىزمەتى.
