ونەر ۇجىمى قازاقستان تاۋەلسىزدىگىنىڭ 30 جىلدىعى مەن دۇنيەجۇزى قازاقتارىنىڭ كىشى قۇرىلتايى اياسىنداعى ءىس-شاراعا ارنايى شاقىرىلعان بولاتىن.
كونتسەرتتىك بىرلەستىكتىڭ جەتەكشىسى تالعات ىدىرىسوۆ كىشى قۇرىلتايعا قاتىسىپ, سونىمەن بىرگە الانيا, انتاليا, حاتاي, گازيانتەپ, ىستانبۇل جانە كونيا قالالارىندا كونتسەرت بەرگەندەرىن حاباردار ەتتى.
– وركەستردىڭ كونتسەرتتەرىن تۇركيانىڭ 10 مىڭنان استام كورەرمەنى تاماشالادى. ەكسپو-نىڭ اشىلۋىنا دايىندالىپ جاتقان حاتايدا امفيتەاتر زالىن ءبىرىنشى بولىپ سىناپ كورۋ ءساتى ءتۇستى. بىزگە ەكسپو اشىلۋىندا دا ونەر كورسەتۋ تۋرالى ۇسىنىس ءتۇستى, – دەيدى ت.ىدىرىسوۆ.
ال تاتتىمبەت وركەسترىنىڭ ديريجەرى ەرلان باقتىگەرەي بولسا, تۇرىك كورەرمەندەرىنىڭ ۇلتتىق مۋزىكالىق اسپاپتارىمىزدىڭ ۇنىنە ايرىقشا تاڭعالىپ, ەرەكشە اسەرگە بولەنگەندەرىن اتاپ ءوتتى.
– داۋلەتكەرەي, قۇرمانعازى, تاتتىمبەت, ماحامبەتتىڭ كۇيلەرى مەن نۇرعيسا تىلەنديەۆتىڭ زاماناۋي اندەرىن ورىندادىق. سونىمەن قاتار بەلگىلى تۇرىك كومپوزيتورلارىنىڭ شىعارمالارى, تۇرىك اندەرىنە پوپۋرري ورىندالدى. كورەرمەندەرگە ۇناعانى سونشا, ولار ورىندارىنان تۇرىپ كەتىپ, بي بيلەدى, ءان سالدى, – دەيدى ديريجەر.
الداعى كۇندەرى اتالعان ونەر ۇجىمى جاڭا كونتسەرتتىك ماۋسىمىن اشادى. وركەستر رەپەرتۋارىندا قازاق جانە ورىس كلاسسيكتەرىنىڭ شىعارمالارى, سونداي-اق گاسترولدەر باعدارلاماسىنان اندەر بولادى دەپ جوسپارلانعان.
