ۆيتسە-مينيستر بولات تىلەپوۆ ەڭ الدىمەن قوعامدىق كەڭەستەر وكىلەتتىگىنىڭ كەڭەيۋىنە توقتالىپ ءوتتى. «قوعامدىق كەڭەستەردىڭ وكىلەتتىگى ءبىرشاما كەڭەيتىلدى. قازىر بۇل جونىندە زاڭنامالىق ەرەجەلەر مەن نۇسقاۋلىقتار ازىرلەنىپ, بۇكىل ماسليحاتتارعا, مەملەكەتتىك ورگاندار مەن قوعامدىق كەڭەستەردىڭ وزدەرىنە تاراتىلدى. كەڭەس قۇرۋ ءۇردىسى قايتا قارالدى. ەندىگى جەردە ولاردىڭ قۇرامىنىڭ 70 پايىزى ۇكىمەتتىك ەمەس ۇيىم وكىلدەرى مەن بەلسەندى ازاماتتاردان تۇرۋى ءتيىس», دەدى ول.
قوعامدىق كەڭەستەردىڭ جۇمىسىن رەتتەيتىن ۋاكىلەتتى ورگان – اقپارات جانە قوعامدىق دامۋ مينيسترلىگى ەكەنىن ەسكەرتە كەلە, جىل سوڭىنا دەيىن پرەزيدەنتكە وسى باعىتتا اتقارىلعان جۇمىستاردىڭ ەسەبى ۇلتتىق بايانداما تۇرىندە وتكىزىلەتىنىن حابارلادى. «جىل سايىن ۇلتتىق بايانداما ازىرلەۋ تاجىريبەسى قولعا الىندى. بيىل ەل پرەزيدەنتىنە العاش رەت ۇسىنىلاتىن بۇل قۇجات قازىر اياقتالىپ قالدى», دەدى ب.تىلەپوۆ. «وزدەرىڭىز بىلەسىزدەر, قوعامدىق كەڭەس ينستيتۋتى 5 ينستيتۋتسيونالدىق رەفورما شەڭبەرىندە 2015 جىلى ەنگىزىلگەن. وسى ۋاقىت ىشىندە تاجىريبە كورسەتكەندەي, ولار قوعام مەن بيلىكتىڭ اراسىن جالعاۋشى رەتىندە ءوزىنىڭ تيىمدىلىگىن, جالپى قوعام ومىرىنە قاجەتتىلىگىن دالەلدەي ءبىلدى. مىسالى, وسى 5 جىلدا قوعامدىق كەڭەس تاراپىنان 20 مىڭنان استام نورماتيۆتىك قۇجات وتكەن بولسا, سونىڭ ءاربىر ونىنشىسى نەمەسە 2 مىڭنان استام قۇجات كەڭەستەن وتپەي, جەتىلدىرۋ ءۇشىن كەرى قايتارىلعان. ياعني ازاماتتاردىڭ ومىرىنە تىكەلەي اسەر ەتەتىن بۇل ساپاسىز قۇجاتتاردىڭ كەمشىلىگى دەر كەزىندە انىقتالعان دەپ ايتۋعا بولادى», دەدى ۆيتسە-مينيستر.
مينيسترلىك وكىلىنىڭ ايتۋىنشا, قازىر مەملەكەتتىك ورگاندار باسشىلارى قوعامدىق كەڭەستەر الدىندا ەسەپ بەرە باستاعان. «تاعى ءبىر مىسال, جىل سايىن 1,5 مىڭ مەملەكەتتىك لاۋازىم يەسى قوعامدىق كەڭەس الدىندا ەسەپ بەرەدى. بۇل – تۋىنداعان ماسەلەلەر مەن شەشىمىن تاپپاي جۇرگەن سۇراقتارعا جاۋاپ الۋ مۇمكىندىگى. وسى 5 جىلدا مەملەكەتتىك قىزمەتتىڭ ساپاسىنا قوعامدىق مونيتورينگ اياسىندا مىڭنان استام زەرتتەۋ جاسالىپ, بارشاعا ورتاق وتە وزەكتى سۇراقتاردى اشىق تالقىلاۋ ناتيجەسىندە ۇزىن سانى 2 مىڭنان استام ماسەلە كوتەرىلدى. مىنە, وسىنىڭ ءبارى – كوپشىلىكتىڭ ورتاق ماسەلەسىنە كوز جۇمباي, قاشاندا مىنبەردەن ۇسىنىسىن جەتكىزە بىلەتىن ءبىزدىڭ بەلسەندى ازاماتتارىمىزدىڭ اقىسىز نەگىزدە اتقارعان ۇلكەن ەڭبەگىنىڭ جەمىسى, جالپى ازاماتتىق قوعامنىڭ جەڭىسى. سوندىقتان دا پرەزيدەنتتىڭ باستاماسىمەن «قوعامدىق كەڭەس تۋرالى» زاڭعا ءتيىستى وزگەرىستەر مەن تولىقتىرۋلار ەنگىزىلىپ, وسى جىلدىڭ باسىنان باستاپ قولدانىسقا ەندى», دەدى ۆەدومستۆو وكىلى.
ودان بولەك جيىن بارىسىندا قوعامدىق كەڭەستەردىڭ جۇمىسىن رەتتەيتىن kazkenes.kz اتتى بىرىڭعاي سايت ازىرلەنگەنى ءمالىم بولدى. «قوعامدىق كەڭەستىڭ كۇندەلىكتى اتقارىپ جۇرگەن جۇمىسىن ەلگە كەڭىنەن جەتكىزۋدىڭ ماڭىزى وتە زور جانە ءداستۇرلى اقپارات كوزدەرىمەن ونىڭ ءبارىن قامتۋ وتە قيىن. ازاماتتار ءوز ماسەلەسىمەن قوعامدىق كەڭەستەرگە جۇگىنۋى ءۇشىن ماسەلە كوتەرىپ, ونىڭ شەشىمىن قاداعالاپ وتىرۋى ماقساتىندا بىرىڭعاي قولدانۋعا وتە ىڭعايلى اقپارات رەسۋرسىنىڭ بولۋى وتە ماڭىزدى. سول سەبەپتى مينيسترلىكتىڭ تاپسىرىسىمەن kazkenes.kz سايتىنىڭ جوباسى جاسالىپ, بۇگىن, مىنە, نازارلارىڭىزعا ۇسىنىلىپ وتىر», دەدى ب.تىلەپوۆ.
TALAP قولدانبالى زەرتتەۋلەر ورتالىعىنىڭ ديرەكتورى ر.وشاقباەۆ قوعامدىق كەڭەستەردىڭ قۇرامى مەن بەلسەندىلىگى تۋرالى پىكىرىن ءبىلدىردى. «قوعامدىق كەڭەس قىزمەتىنە بايلانىستى بىرقاتار پروبلەما بار. ءبىرىنشى كەزەكتە, بۇل قوعامدىق كەڭەستەردىڭ قۇرامىنا بايلانىستى. باسشىلاردىڭ قوعامدىق كەڭەس قۇرامىن وزىنە بارىنشا قولايلى ەتىپ جاساقتاۋعا تىرىساتىنى تۋرالى شاعىمدار كوپ بولدى. شاعىمدانۋشىلاردىڭ ايتۋىنشا, قولايسىز سۇراق قوياتىن ادامداردى كەڭەسكە كىرگىزبەۋگە تىرىساتىن كورىنەدى», دەدى ساراپشى.
ونىڭ سوزىنە قاراعاندا, بۇل ماسەلە رەسپۋبليكالىق دەڭگەيدە كوپ تالقىلانىپ, ناقتى شەشىم قابىلدانعان. «ناتيجەسىندە, اقپارات جانە قوعامدىق دامۋ مينيسترلىگى ءتيىستى زاڭعا تولىقتىرۋلار ەنگىزۋ جونىندە باستاما كوتەرىپ, قۇجات جوباسىن جاسادى. بۇل قوعامدىق كەڭەس قۇرامىن سايلاۋ پروتسەسىن ءبىرىنشى باسشىلاردىڭ قالاۋى مەن ىقپالىنان ەداۋىر تاۋەلسىز ەتۋگە مۇمكىندىك بەرەدى», دەدى ول.
سونداي-اق ول kazkenes.kz پورتالىنىڭ قوعامدىق كەڭەس ينستيتۋتىن دامىتۋداعى رولىنە توقتالدى. ء«بىر جاعىنان, بۇل قوعامدىق كەڭەس مۇشەلەرىنىڭ بەلسەندى ەمەستىگىنە بايلانىستى بولۋى, ەكىنشى جاعىنان ولاردىڭ قىزمەتى تۋرالى اقپارات جەتىسپەۋى مۇمكىن. وسىنىڭ اياسىندا ءبىز اقپارات جانە قوعامدىق دامۋ مينيسترلىگىنىڭ بىرىڭعاي پورتال اشۋ باستاماسىن قۇپتايمىز. Kazkenes.kz پورتالى سياقتى بارشا قوعامدىق كەڭەستەردىڭ قىزمەتى تۋرالى اقپارات بەرەتىن بىرىڭعاي الاڭ قۇرۋ ءبىزدىڭ زاڭنامادا كوزدەلگەن», دەدى ر.وشاقباەۆ.
