زاڭ جوباسىندا ەۋروپالىق وداق ايماعىندا ساتىلاتىن بۇكىل سمارتفون «Type C» نەمەسە «USB-C» قۋاتتاعىشىن قولدانۋعا ءتيىس. بىراق ەۋروپالىق كوميسسيانىڭ ۇسىنىسىن كەي كومپانيا قولداپ وتىرعان جوق. اسىرەسە, Apple بۇعان قارسى. كومپانيا وكىلدەرىنىڭ سوزىنە سەنسەك, بارىنە بىردەي قۋاتتاعىش مىندەتتەۋ وسى باعىتتا يننوۆاتسيا جاساۋعا كەدەرگى كەلتىرەدى-ءمىس.
بىرىڭعاي قۋاتتاعىش شىعارۋ ەڭ اۋەلى Apple كومپانياسىنا اسەر ەتپەك. ويتكەنى, Huawei, Samsung سەكىلدى تەلەفون نارىعىنداعى ۇلكەن كومپانيالار USB-C قۋاتتاعىشىن قولدانۋعا الدەقاشان كوشكەن. ال Apple سەكىلدى كەي وندىرۋشىلەر عانا قۇرىلعىلارىن دەربەس قۋاتتاعىش تۇرىنە بەيىمدەگەن. ايتسە دە, Apple كەيىنگى ۋاقىتتا كەيبىر ءونىمىن USB-C ارقىلى قۋاتتاۋعا اۋىستىرا باستادى.
ەۋروپالىق كوميسسيانىڭ دەرەكتەرىنە سۇيەنسەك, 2018 جىلى ەۋروپالىق وداق ايماعىندا ساتىلاتىن ەلەكتروندى قۇرىلعىلاردىڭ جارتىسىنا جۋىعى USB micro-B قۋاتتاعىشىن پايدالانعان. USB C قۋاتتاعىشىنا نارىقتىڭ 29 پايىزى تيەسىلى. Apple-ءدىڭ Lightning قۋاتتاعىشىنا 21 پايىزى تيەسىلى.
قۇجاتتا كورسەتىلگەن Type C قۋاتتاعىشىن قولدانۋ مىندەتتى قۇرىلعىلار سانى بىرنەشە. ولاردىڭ قاتارىندا سمارتفونداردان بولەك, پلانشەتتەر, فوتوكامەرالار, قۇلاققاپتار, داۋىس كۇشەيتكىشتەر, ويىن پريستاۆكالارى بار.
قارت قۇرلىق شەنەۋنىكتەرىنىڭ مۇنداي قادامعا بارۋىنىڭ سەبەبى – ەلەكتروندى قۇرىلعىلاردان قالاتىن قوقىستىڭ كوپتىگىندە. ەۋروپالىق كوميسسيانىڭ كەلتىرگەن مالىمەتىنە سۇيەنسەك, قولدانىلماي, قوقىسقا تاستالعان قۋاتتاعىشتاردىڭ كولەمى جىل سايىن 11 مىڭ تونناعا ارتىپ وتىر. ماسەلەن, 2019 جىلى 53,6 ميلليون توننا ەلەكتروندى قۇرىلعى قوقىسقا كەتكەن. 2030 جىلى بۇل كولەم 75 ميلليون تونناعا دەيىن ارتادى دەگەن بولجام بار.
بىلتىر ەۋروپالىق وداق ەلدەرىندە 420 ميلليون تەلەفون مەن ەلەكتروندى قۇرىلعى ساتىلعان ەكەن. ەۋروپالىق ءار تۇرعىن ورتا ەسەپپەن ءۇش قۋاتتاعىش قولدانادى. دەمەك, جىل سايىن ساتىلاتىن سمارتفونداردىڭ ارتۋى قولدانىلماعان قۋاتتاعىشتاردىڭ سانىن دا ارتتىراتىنى تۇسىنىكتى.
جالپى, ەۋروپالىق وداق بۇل ماسەلەگە نازار اۋدارعانى كەشە عانا ەمەس. ماسەلەن, 2009 جىلى قارت قۇرلىقتا 30 ءتۇرلى قۋاتتاعىش قولدانىستا بولدى. وسىعان بايلانىستى ەۋروپالىق كوميسسيا ەلەكتروندى قۇرىلعى وندىرۋشىلەرمەن كەلىسىپ, بىرىڭعاي قۋاتتاعىش شىعارۋعا كەلىسكەن بولاتىن. ءتىپتى كەز كەلگەن كەلىسىمگە كونە قويمايتىن Apple كومپانياسى دا مۇنداي تالاپقا كونىپ, ەۋروپالىق وداقتا قولدانىلاتىن ارنايى قۋاتتاعىش شىعارعان-تۇعىن. سونىڭ ناتيجەسىندە قازىرگى تاڭدا سونىڭ نەگىزگى ۇشەۋى عانا قالعان.
2018 جىلى ەۋروپالىق پارلامەنت قايتادان باستاما كوتەرىپ, ەلەكتروندى قۇرىلعى نارىعىنا قاتىسى باردىڭ ءبارىن ۇنقوسۋعا شاقىردى. سول كەزدە دە Apple وسىعان بايلانىستى ارنايى مالىمدەمە جاساپ, مۇنداي تالاپ تەلەفون قۋاتتاعىشىن شىعارۋشىلاردىڭ جۇمىسىنا كەدەرگى كەلتىرەتىنىن العا تارتتى. ويتكەنى, ولار ىزدەنىپ, جاڭاشا ءادىس ۇسىنۋدىڭ ورنىنا ءبىر ورىندا تۇراقتاپ قالماق.
الايدا زاڭ جوباسى كۇشىنە ەنۋى ءۇشىن ءالى بىرنەشە جىل قاجەت. ويتكەنى ديرەكتيۆا دەپ اتالاتىن قۇجات ەۋروپالىق پارلامەنتتە تالقىلانادى. سونداي-اق وداققا مۇشە مەملەكەتتەردىڭ زاڭ شىعارۋشى ورگاندارى دا بۇل ماسەلەنى قاراۋعا ءتيىس.
ەۋروپارلامەنت دەپۋتاتتارى مەن ۇيىمعا مۇشە مەملەكەتتەر ەۋروپالىق كوميسسيا ۇسىنعان زاڭ جوباسىنا تۇزەتۋلەر ەنگىزۋگە قۇقىعى بار. ونداي جاعدايدا كوميسسيا تۇزەتۋلەردى قايتا قاراپ, كەلىسكەننەن كەيىن عانا ديرەكتيۆا كۇشىنە ەنەدى.
جوسپار بويىنشا زاڭ جوباسى 2022 جىلى قابىلدانۋعا ءتيىس. سودان كەيىن ەۋروپالىق وداققا مۇشە مەملەكەتتەردىڭ قۇجاتتى راتيفيكاتسيالاۋىنا ەكى جىل مەرزىم بەرىلەدى. بۇل جۇمىس اياقتالعان سوڭ وندىرۋشىلەر ەكى جىل ىشىندە قۋاتتاعىشتارىن وزگەرتۋى قاجەت.
Apple كومپانياسىنىڭ بۇل زاڭ جوباسىنا ازار دا بەزەر بولۋىنىڭ ءوز سەبەبى بار. ويتكەنى ەۋروپالىق وداق الپاۋىت نارىقتىڭ ءبىرى سانالادى. ونىڭ ۇستىنە, ەو-نىڭ شارتاراپتىڭ تۇكپىر-تۇكپىرىنە اسەرى ەرەكشە. ماسەلەن, «بريۋسسەل اسەرى» دەپ اتالاتىن جاھاندىق زاڭنامالارعا ىقپال ەتەتىن فەنومەن بار. ياعني ەو الەمدەگى ەڭ ۇلكەن تۇتىنۋ نارىعىنىڭ ءبىرى بولعاندىقتان, كوپتەگەن ترانسۇلتتىق كورپوراتسيالار وداق قۇرامىندا قىزمەت ەتۋى ءۇشىن ونىڭ ەرەجەلەرىن قابىلداۋعا ءماجبۇر.
ناتيجەسىندە, ءار ەلدە ءتۇرلى زاڭنامالارعا باعىنباس ءۇشىن الپاۋىت كورپوراتسيالار ەۋروپالىق وداقتىڭ قۇقىقتىق ەرەجەسىن جەر-جاھاننىڭ باسقا بولىگىندە دە قولدانادى. ءتىپتى IT سالاسىنداعى ءىرى كومپانيالار دا ەو-نىڭ قاتاڭ تالاپتارىنا قاراماستان, وعان باعىنۋعا ءماجبۇر. الدا-جالدا ەۋروپالىق پارلامەنت ەۋروپالىق كوميسسيانىڭ ۇسىنىسىن قابىلداسا, Apple كومپانياسى قارت قۇرلىقتا ءونىمىن ساتۋ ءۇشىن مىندەتتى تۇردە USB-C قۋاتتاعىشىن قولدانادى. سونىمەن قاتار بۇل قادام Apple-ءدىڭ الەمنىڭ باسقا بولىگىندە ساتاتىن ونىمدەرىنە دە اسەر ەتپەك.
