پرەزيدەنتكە ۆاكتسينا ءوندىرىسىنىڭ تەحنولوگيالىق جەلىسى, زەرتحانالىق جابدىقتار مەن ءموبيلدى رەاكتورلار كورسەتىلدى.
ينستيتۋتتىڭ باس ديرەكتورى كۇنسۇلۋ زاكاريا بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىن ودان ءارى دامىتۋ جوسپارى تۋرالى باياندادى.
زاۋىت وندىرىستىك تاجىريبە بويىنشا حالىقارالىق ستاندارتتارعا (GMP) ساي كەلەتىن يممۋنوبيولوگيالىق ءدارى-دارمەكتەر, ونىڭ ىشىندە كوروناۆيرۋس ىندەتىنە قارسى ۆاكتسينا, تۇماۋعا, تۋبەركۋلەزگە, برۋتسەللەزگە, نودۋليارلى دەرماتيتكە جانە باسقا دا جۇقپالى اۋرۋلارعا قارسى ۆاكتسينا شىعاراتىن بولادى.
جىلىنا بيوفارماتسەۆتيكا پرەپاراتتارىنىڭ 30-دان 60 ميلليونعا دەيىن دوزاسىن ازىرلەۋ جوسپارلانىپ وتىر. جوبانىڭ جالپى قۇنى – 15,6 ميلليارد تەڭگە.
پرەزيدەنتكە 16 قىركۇيەك كۇنى 100 مىڭ دوزا كولەمىندە ۆاكتسينا قۇيۋ ءوندىرىسى ىسكە قوسىلعانى تۋرالى مالىمەت بەرىلدى.
تمد ەلدەرى اراسىندا قازاقستان مەن رەسەي عانا COVID-19 ىندەتىنە قارسى ۆاكتسينا ءوندىرىسىن جولعا قويعان.
پرەزيدەنت زاۋىت قىزمەتكەرلەرىمەن اڭگىمەلەسۋ بارىسىندا جوبانىڭ ماڭىزدىلىعىن اتاپ ءوتىپ, وتاندىق ۆاكتسينانىڭ كوروناۆيرۋس ىندەتىنە قارسى كۇرەسكە جانە حالىقتىڭ دەنساۋلىعىن كۇشەيتۋگە زور ۇلەس قوساتىنىنا سەنىم ءبىلدىردى.
– بارشاڭىزدى قۇتتىقتايمىن. شىن مانىندە, بۇل ۇلكەن جەتىستىك. ەلىمىز ءۇشىن قاجەتتى ءوندىرىس. نەگىزگى جۇمىس ورىندالدى. ءبارى دۇرىس. كەلەسى جىلى وسى جۇمىستى جالعاستىرامىز. بۇل ۆاكتسينانى بىرىككەن اراب امىرلىكتەرىنە جانە باسقا دا مۇسىلمان ەلدەرىنە جىبەرەمىز. ۆاكتسينامىز دۇنيە جۇزىندە مويىندالىپ جاتىر. سوندىقتان بارشاڭىزدى قۇتتىقتايمىن! ريزاشىلىعىمدى بىلدىرەمىن. بۇل – وتە كۇردەلى پروتسەسس, ءوندىرىس. شىن مانىندە, دۇنيەجۇزىندە, شەتەلدە مۇنداي ءوندىرىس جاساۋ ءۇشىن ءۇش-ءتورت جىل كەتەدى. ءبىز توعىز ايدىڭ ىشىندە جۇمىستى ورىندادىق. سوندىقتان ەڭبەكتەرىڭىز مەملەكەت تاراپىنان جوعارى باعالانادى, – دەدى قاسىم-جومارت توقاەۆ.
