وتكەن بەيسەنبىدە ۇلتتىق وليمپيادا كوميتەتىنىڭ القالى جيىنىنا قاتىسۋشىلار وسىنداي ۇيعارىمعا توقتالدى. توكيو وليمپياداسىنداعى ۇلتتىق قۇرامانىڭ كورسەتكىشتەرى سارالانىپ, وعان تالداۋ جاسالدى (بۇل ءبىزدىڭ پىكىر, وسىلاي بولسا دەگەن... بىراق تالداۋ جاسالعان جوق). جيىندا نەگىزگى باياندامانى جاساعان ۇلتتىق وليمپيادالىق كوميتەتتىڭ حاتشىسى اندرەي كريۋكوۆتىڭ پىكىرىنە سۇيەنسەك, وتاندىق سپورتشىلاردىڭ جەڭىس تۇعىرىنا كوتەرىلە الماۋىنىڭ وزىندىك سەبەبى بار. بارىنە كىنالى – ەكى جىلدان بەرى ەلدىڭ ەڭسەسىن كوتەرتپەگەن پاندەميا؟!.
اتىڭ وشكىر كوروناۆيرۋستىڭ كەسىرىنەن سپورتشىلاردىڭ جىگەرىن شىڭدايتىن, كورسەتكىشتەرىن جاقسارتاتىن 160 جارىس وتپەي قالىپتى. تاعى دا سول ىندەتكە بولا كوپتەگەن سپورت تۇرىنەن دايارلىقتى التى-سەگىز ايعا توقتاتۋعا تۋرا كەلگەن. وليمپيادا الدىنداعى دايارلىقتى شەتەلدە وتكىزۋگە مۇمكىندىك بولماي, ساڭلاقتارىمىز بابىن جوعالتىپ, جەڭىسكە دەگەن جىگەرى مۇقالعان. وليمپيادالىق تسيكلدىڭ شەشۋشى كەزەڭىندە ءدۇبىرلى جارىستاردىڭ بولماۋى سپورتشىلاردىڭ دا مورالدىق-پسيحولوگيالىق جاعدايىنا قاتتى اسەر ەتىپتى. قىتايدان شىققان كوروناۆيرۋس بولماعاندا, قازاقستاندىق سپورتشىلار قىتايلىقتاردىڭ ءوزىن شاڭ قاپتىرىپ, ەلدىڭ گيمنىن سان مارتە شىرقاتاتىنداي جاعدايدا ەكەن. اتتەڭ, كوروناۆيرۋس...
وتاندىق سپورتشىلاردىڭ وليمپيادادا ءساتسىز ونەر كورسەتۋىنە ەكىنشى سەبەپ – بولىنگەن قارجىنىڭ ازدىعى. 2018-2021 جىلدارى سپورت سالاسىن قارجىلاندىرۋ 90 پايىزعا قىسقارعان. بۇل ءوز كەزەگىندە رەكوردتىق كورسەتكىشتەردىڭ تومەندەۋىنە, سپورتشىلار مەن باپكەرلەر ىنتا-ىقىلاسىنىڭ باسەڭدەۋىنە اكەلگەن (وليمپيادا التىنى ءۇشىن 250 مىڭ دوللار از قارجى بولعانى ما؟). جەرگىلىكتى بيۋدجەت ارقىلى قارجىلاندىرۋدى قوسقاندا, ۇلتتىق كوماندالاردى مەملەكەتتىك قازىنادان قارجىلاندىرۋ بار بولعانى التى پايىز شاماسىندا ەكەن. ال بۇرىنعى مادەنيەت جانە سپورت ۆيتسە-ءمينيسترى ەرلان قوجاعاپانوۆتىڭ ايتۋىنشا, قازاقستان جىل سايىن سپورتقا 10 ميلليارد تەڭگە قاراستىرادى, ال توكيو مەن قىتايداعى وليمپيادالارعا 15 ميلليارد تەڭگە قارجى بولىنگەن. سپورت سالاسىنا قارجى ءبولۋ دە پاندەميانىڭ كەسىرىنەن قىسقارىپ كەتكەن شىعار بالكىم؟!
توكيوداعى ساتسىزدىكتىڭ ءۇشىنشى سەبەبى – رەزەرۆتىڭ جوقتىعى. ونى قالاي دايارلايدى, پاندەميا القىمنان الىپ, قارجىسى بار بولعىر باسىنان تارتسا اياعىنا جەتپەي جاتسا... ونىڭ ۇستىنە ۇلتتىق وليمپيادالىق كوميتەتتىڭ تۇجىرىمىنشا, وليمپيادالىق قۇراما «قارتايىپ» بارا جاتقان كورىنەدى. پاندەميا باستالعالى بەرى (تاعى دا پاندەميا) وليمپيادالىق دايارلاۋ ورتالىقتارى جۇمىسىن توقتاتقان. ءتىپتى ەكى جىل ىشىندەگى پاندەميالىق شەكتەۋدەن وليمپيادالىق رەزەرۆتىڭ ەكى بۋىنىنان ايىرىلىپ قالۋىمىز عاجاپ ەمەس ەكەن. بۇل دەگەنىڭىز كەلەسى وليمپيادالارعا دا كەسىرىن تيگىزەدى دەگەن ءسوز...
پاندەميا, پاندەميا. قىزىق, پاندەميا دەگەن ناۋبەت جالعىز قازاقستاننىڭ باسىنا عانا تونگەن سياقتى. قۇددى الەمنىڭ توعىزىنشى تەرريتورياسى باسقا ەلدەرمەن بايلانىس جاسامايتىن, كەزىندە روبينزو كرۋزو مەكەندەگەن ارالدا ءومىر ءسۇرىپ جاتقانداي. سوناۋ وتكەن عاسىردىڭ وتىزىنشى جىلدارى قازاق دالاسىندا قاساقانا اشارشىلىق جاساپ, باس كوتەرەر تۇلعالارىن قۋعىن-سۇرگىنگە ۇشىراتىپ, اتۋ جازاسىنا كەسكەن كەزى بولسا ءبىر باسقا. ال ەندى «مىڭ ءولىپ, مىڭ تىرىلگەن» قازاققا كارىن توگەتىندەي, كوروناۆيرۋستى قازاققا جىبەرەتىندەي جاراتۋشىعا نە جازىپ ەدىك؟ تۇتاس الەمگە تونگەن كوروناۆيرۋستىڭ كەسىرىنەن قازاق سپورتى عانا زارداپ شەكتى دەگەندى قالاي تۇسىنۋگە بولادى؟
سوندا دەيمىز-اۋ, باسقا ەلدەردىڭ سپورتشىلارىنا پاندەميا اسەر ەتپەگەن بە؟ كوروناۆيرۋس شىققان قىتاي نەگە وليمپيادادا كەرەمەت ونەر كورسەتتى, تۇسىنىكسىز. الدە كوروناۆيرۋس اتاۋلىنى مويىنداماعان تۇرىكمەنستاننىڭ ۇستانىمى دۇرىس پا؟ ويتكەنى تاريحىندا تۇڭعىش رەت وليمپيادانىڭ كۇمىس مەدالىن يەلەندى عوي تۇرىكمەن سپورتشىسى اۋىر اتلەتيكادان. قازاقستاندىق سپورتشىلاردىڭ باعى مەن بابى قاتار كەلمەۋىنە شىنىندا دا پاندەميا كىنالى شىعار-داعى؟!
...تەزىرەك قۇتىلساق ەكەن پاندەميادان...
