بانك قۇرىلعالى بەرى ءبىراز باعدارلاما ىسكە اسىرىلدى. تالاي رەت ءۇيلى بولسام دەپ ارمانداعانداردىڭ قونىس تويىنا ورتاق بولدىق, قۋانىشتارىنا قوسىلدىق. بىراق ارمانداۋ جەتكىلىكسىز. جەكە شاڭىراققا يە بولۋدىڭ جولدارىن, شارتتارىن قاراستىرىپ, بانكتىڭ باعدارلامالارىنان حاباردار بولىپ وتىرعان دا ءجون.
دەگەنمەن, وسى ارادا ايتا كەتۋ كەرەك, جيناعان قورى, ارتىق اقشاسى جوق جاستار بانك ارقىلى ءۇيلى بولۋعا تاۋەكەل ەتە بەرمەيدى, ياكي ءتيىمدى جولدارىنان بەيحابار. ماسەلەن, نۇر-سۇلتان قالاسىنىڭ اكىمدىگى وتباسى بانكىمەن بىرگە ەلوردالىق جاستارعا ءتيىمدى شارتتارمەن تۇرعىن ءۇي ساتىپ الۋعا كومەكتەسەتىندىگى تۋرالى بايانداماس بۇرىن, «الماتى جاستارى» باعدارلاماسى ارقىلى باسپانالى بولعان ارىپتەسىمىز ارايلىمنىڭ ناقتى مىسالىن ايتا كەتۋگە بولادى. اتالعان باعدارلاما ارقىلى ءبىر ارمانى ورىندالعان ارايلىمدى قونىس تويىمەن قۇتتىقتاي وتىرىپ, قۋانىشتى وقيعانىڭ جاي-جاپسارىن سۇراعان ەدىك.
– قازىرگى تاڭدا «31 ارنانىڭ» digital پروديۋسەرىمىن. بيىل مەملەكەت ۇسىنعان «الماتى جاستارى» باعدارلاماسى ارقىلى 26 جاسىمدا باسپانالى بولىپ وتىرمىن. اتا-انام مەن تۋعان-تۋىستارىمنىڭ قۋانىشىن سوزبەن ايتىپ جەتكىزۋ مۇمكىن ەمەس. اكە-شەشەلەرىمىز الماتىدان باسپانا الۋ ءۇشىن كەزىندە قانشاما جىلدار بويى توقتاۋسىز ەڭبەك ەتكەن ەدى. ال بۇل باعدارلاما – قازىرگى جاستار ءۇشىن مەملەكەت ۇسىنعان ۇلكەن دەمەۋ! العاشقى جارنانى جىلدار بويى جيناماي-اق, باسپانالى بولۋعا تاپتىرماس مۇمكىندىك. قازىرگى تاڭدا كوپ جاستار باسپانالى بولۋ ماقساتىندا شەتەلگە قارا جۇمىسقا كەتەتىنى بارىمىزگە ءمالىم. وسىنىڭ سالدارىنان قانشاما قازاق جاستارى ەلگە قايتپادى. «الماتى جاستارى» باعدارلاماسى ارقىلى كوپتەگەن جاس وتانداستارىمىز ءوز ەلىمىزدە ەڭبەك ەتىپ, ءۇيلى بولىپ جاتىر. ونىڭ ءبىرى – مەن. ءوز ءۇيىمنىڭ بولعانى ماعان ۇلكەن قۇلشىنىس بەردى. مەملەكەتتىڭ جاستارعا وسىنداي مۇمكىندىك بەرگەنىن ەسكەرە وتىرا, ەلىمىزگە ادال قىزمەت ەتۋگە تالپىنامىن, – دەيدى ارايلىم قاپاسبەك.
ءدال وسى «الماتى جاستارى» باعدارلاماسىنىڭ Elorda zhastary دەگەن بالامالى ءتۇرى نۇر-سۇلتان قالاسىندا دا اشىلادى. جاستارعا ارنالعان تۇرعىن ءۇي باعدارلاماسى – ەلوردا اكىمدىگى مەن وتباسى بانكىنىڭ («بايتەرەك» حولدينگىنىڭ ەنشىلەس ۇيىمى) بىرلەسكەن جوباسى. جوبا جاس مۇعالىمدەرگە, دارىگەرلەرگە, جۋرناليستەرگە, مادەنيەت سالاسىنىڭ قىزمەتكەرلەرىنە, سپورتشىلارعا, الەۋمەتتىك جانە كوممۋنالدىق قىزمەت قىزمەتكەرلەرىنە, جەتىم بالالارعا جەكە تۇرعىن ءۇي ساتىپ الۋعا جەڭىلدىكپەن نەسيە الۋعا مۇمكىندىك بەرەدى. ەڭ باستىسى, Elorda zhastary باعدارلاماسى بويىنشا قارىز الۋشىلاردىڭ جاسى 35-تەن اسپاۋى ءتيىس.
ەندىگى جەردە وسىناۋ باستاما العا جىلجىپ, جۋىردا نۇر-سۇلتان قالاسىنىڭ اكىمى التاي كولگىنوۆ پەن وتباسى بانك باسقارما ءتورايىمى ءلاززات يبراگيموۆا ىنتىماقتاستىق تۋرالى ءتيىستى مەموراندۋمعا قول قويدى.
– Elorda zhastary – تابىسى جوعارى ەمەس جاستارعا تۇرعىن ءۇي ماسەلەسىن شەشۋگە ارنالعان. ءبىز ولاردىڭ وتباسى بانكىنىڭ ەسەپشوتتارىندا قۇلشىنىسپەن اقشا جيناپ جاتقاندارىن جانە دە پاتەر الۋعا دايىن ەكەنىن بىلەمىز, بىراق ولاردىڭ قاراجاتى مەن مۇمكىندىكتەرى جەتكىلىكسىز. ال جاڭا تۇرعىن ءۇي باعدارلاماسى ىسكە قوسىلسا, ولار بيىل جاپپاي قونىس تويىن تويلاۋعا مۇمكىندىك الادى. ونىڭ دالەلى رەتىندە الماتى قالاسىن كەلتىرۋگە بولادى. اتالعان قالادا وسىعان ۇقساس باعدارلاما ۇلكەن سۇرانىسقا يە. ونىڭ كومەگىمەن قازىردىڭ وزىندە تۇرعىن ءۇي ماسەلەسىن 2 مىڭ الماتىلىق شەشتى, – دەپ ءتۇسىندىردى «وتباسى بانك» اق باسقارما ءتورايىمى ءلاززات يبراگيموۆا.
Elorda zhastary تۇرعىن ءۇي باعدارلاماسى بويىنشا قارىز الۋشىلاردى نەسيەلەندىرۋدىڭ العاشقى ترانشى –
1 ملرد تەڭگەگە تەڭ. ونىڭ 500 ميلليونى نۇر-سۇلتان ءماسليحاتىنىڭ شەشىمىمەن, تاعى 500 ميلليونى وتباسى بانكىنىڭ جەكە قاراجاتى ەسەبىنەن بولىنگەن. بۇل قاراجات باعدارلامانىڭ 100 قاتىسۋشىسىنا نەسيە بەرۋگە كومەكتەسەدى.
الەۋەتتى قارىز الۋشىلاردىڭ ءتىزىمىن جەرگىلىكتى اتقارۋشى بيلىك قالىپتاستىرادى. باعدارلاماعا قاتىسۋ ءۇشىن qatysu.zhilfond.kz سايتىندا جاقىن ارادا ءوتىنىش بەرۋگە بولادى. اۆتوريزاتسيادان ءوتۋ ءۇشىن ەلەكتروندى تسيفرلى قولتاڭبا قاجەت, ونى ونلاين رەجىمىندە نەمەسە جاقىن ورنالاسقان حالىققا قىزمەت كورسەتۋ ورتالىعىندا الۋعا بولادى.
وتىنىمدەردى قابىلداۋ مەرزىمى اياقتالعان سوڭ قاتىسۋشىلاردى ىرىكتەۋ باستالادى. ۇمىتكەرلەر پۋلى بالدىق جۇيە بويىنشا قالىپتاسادى. ول ەڭبەك ءوتىلىن جانە ءوتىنىش بەرۋشىنىڭ (ەرلى-زايىپتىلاردىڭ بىرەۋىنىڭ نەمەسە ولاردىڭ بالالارىنىڭ) 1, 2, 3 مۇگەدەكتىك توبىنا جاتاتىن-جاتپايتىنىن ەسكەرەدى.
پۋل قۇرىلعاننان كەيىن ونىڭ قاتىسۋشىلارى وتباسى بانكىنەن نەسيە الۋعا جولداما الادى. بانك باعدارلاما قاتىسۋشىسىنىڭ تولەم قابىلەتتىلىگىن تەكسەرىپ, جىلدىق 5 پايىزبەن جەڭىلدەتىلگەن نەسيە بەرەدى. العاشقى جارنا – 10%. ەلوردالىق جاس تۇرعىندارعا بەرىلەتىن نەسيەنىڭ ەڭ جوعارى سوماسى – 13 ملن تەڭگە, الايدا ءوتىنىش بەرۋشى ءوز قاراجاتى ەسەبىنەن ايىرماسىن تولەۋگە دايىن بولسا, ءۇيدىڭ باعاسىنا شەكتەۋ قويىلمايدى. مەرزىمى – 25 جىلعا دەيىن. ونىڭ كومەگىمەن العاشقى نەمەسە قايتالاما نارىقتان, سونداي-اق «قازاقستان تۇرعىن ءۇي كومپانياسى» اق-تىڭ كەپىلدەمەسىمەن ۇلەستىك قاتىسۋ شارتىمەن سالىنىپ جاتقان تۇرعىن ۇيگە قول جەتكىزۋگە بولادى.
سونىمەن Elorda zhastary قاتىسۋشىلارىنا قويىلاتىن تالاپتار تومەندەگىدەي:
ءوتىنىش بەرگەن ۋاقىتتا قاتىسۋشىنىڭ جاسى 35-تەن (قوسا العاندا) اسپاۋعا ءتيىس.
قاتىسۋشىنىڭ جانە ونىمەن بىرگە تۇراتىن وتباسى مۇشەلەرىنىڭ سوڭعى 1 جىل ىشىندە نۇر-سۇلتان قالاسىندا ۇزدىكسىز تۇراقتى تىركەۋى بولۋى قاجەت; قاتىسۋشىنىڭ وتباسى بانكىندە ساتىپ الاتىن باسپانا قۇنىنىڭ 10% مولشەرىندەگى العاشقى جارناسى بار دەپوزيتى بولۋعا ءتيىس (سالىمنىڭ بار ەكەندىگى تۋرالى انىقتاما نەمەسە شوت بويىنشا ءۇزىندى كوشىرمە).
سوڭعى 5 جىل ىشىندە باعدارلاماعا قاتىسۋشى مەن ونىڭ وتباسى مۇشەلەرىنىڭ قر اۋماعىندا ساتىپ الۋ قۇقىعىمەن جالدامالى تۇرعىن ءۇيى نەمەسە مەنشىك قۇقىعىندا تۇرعىن ءۇيى بولماۋى قاجەت.
قاتىسۋشىنىڭ ءوتىنىش بەرگەن كەزدە كەمىندە سوڭعى ءبىر جىل ىشىندە نۇر-سۇلتان قالاسىندا تاڭدالعان سالاسىندا رەسمي جۇمىس تاجىريبەسى بولۋعا ءتيىس. ول زەينەتاقى شوتىنىڭ ءۇزىندى كوشىرمەسىمەن راستالادى.
وتباسىنىڭ 1 مۇشەسىنە شاققانداعى سوڭعى 6 ايداعى تابىس 3,9 ەڭ تومەنگى كۇنكورىس دەڭگەيىنەن نەمەسە 133 778 تەڭگەدەن اسپاۋعا ءتيىس (زەينەتاقى جارنالارى, جەكە تابىس سالىعى جانە باسقا دا مىندەتتى جارنالاردى قوسپاعاندا).
باعدارلاماعا ەرلى-زايىپتىلاردىڭ بىرەۋى عانا قاتىسا الادى.
ەسەپتەۋگە وڭاي بولۋ ءۇشىن, بىلاي دا تۇسىندىرە كەتۋگە بولادى. ەگەر نەسيەگە 13 ملن تەڭگە (ەڭ جوعارى سوما) تۇراتىن ءۇي نەمەسە پاتەر الاتىن بولساڭىز, بانك تالاپتارىنا سايكەس, ەكى ادامنىڭ ايلىق تابىسى 210 مىڭ تەڭگەدەن كەم بولماۋعا ءتيىس. نەسيە شارتتارىنا سايكەس, العاشقى 8 جىلدا 101 000 تولەپ وتىرۋ كەرەك بولسا, تۇرعىن ءۇي قۇرىلىس جيناقتاۋ جۇيەسىنىڭ يكەمدى ارتىقشىلىقتارىنىڭ ارقاسىندا, نەسيە مولشەرلەمەسى 5 پايىزدان 3,7 پايىزعا دەيىن تومەندەپ, كەيىنگى جىلدارداعى تولەم ەكى ەسەگە, ياعني 52 720 تەڭگەگە ازايادى.
رەتى كەلىپ تۇرعاندا, وتباسى بانك پايدا بولعالى بەرى نۇر-سۇلتان قالاسىندا جاسى 18-35 ارالىعىنداعى سالىمشىلار سانى – 112 433, ادام باسىنا شاققاندا جيناقتالعان سوما – 771 779 تەڭگە بولعانىن ايتا كەتۋگە بولادى. 2016 جىلدان بەرى ەلوردادا 18-35 جاستاعى سالىمشىلار سانى – 20 637 ادامعا جەتتى.
