ايماقتار • 01 قازان، 2021

تەلمان ساۋرانبەكوۆ تۇرعان ۇيگە ەسكەرتكىش تاقتا ورناتىلدى

183 رەت كورسەتىلدى

الماتىدا كورنەكتى مەملەكەت جانە قوعام قايراتكەرى تەلمان ساۋرانبەكوۆ تۇرعان ءۇيدىڭ قابىرعاسىنا ەسكەرتكىش تاقتا ورناتىلدى، دەپ حابارلايدى Egemen.kz.

بەدەرلى جىلدار بەلەسىندە مەملەكەت ومىرىندەگى ماڭىزدى قۇرىلىمداردا جاۋاپتى قىزمەتتەر اتقارعان عيبراتتى عۇمىر يەسىنىڭ قايراتكەرلىك جولى كەيىنگىلەر ءۇشىن ولمەس ونەگە. الماتىداعى قوناەۆ پەن قۇرمانعازى كوشەلەرىنىڭ قيىلىسىندا ورىن تەپكەن بۇل ۇيدە تەلمان ەركىنبەك ۇلىنىڭ عىلىم مەن قوعامدىق قىزمەتتەگى ەڭ ءبىر جەمىستى جىلدارى وتكەن. مەموريالدى تاقتانىڭ اشىلۋ راسىمىنە زيالى قاۋىم وكىلدەرى، مارقۇمنىڭ تۋىستارى مەن جاقىندارى قاتىستى.

«حالىققا ادال قىزمەت ەتىپ، كوپتىڭ العىسىنا بولەنۋ  شىن باقىت. تەلمان ەركىنبەك ۇلى سانالى عۇمىرىن، بار قاجىر-قايراتىن ەل يگىلىگىنە جۇمساعان جان ەدى. ول جۇرتشىلىقتىڭ ەسىندە قاي بيىككە شىقسا دا قاراپايىم قالىبىنان جاڭىلماعان دەگدار ازامات رەتىندە ساقتالىپ قالدى. ازاماتتىقتىڭ ايناسىنا اينالعان اعانىڭ اقجارقىن كوڭىلى، اتقارعان ەڭبەگى كوز الدىمىزدا. ول حالىقشىل ادام بولاتىن. الماتى ونىڭ ءومىرىنىڭ ءبىر بولشەگى بولدى دەسەك قاتەلەسپەيمىز. كەشەگى كەڭەس كەزىندە الماتىنى باسقارىپ، قالانىڭ قارىشتاپ دامۋىنا كوپ ەڭبەك ءسىڭىردى. ءومىرىنىڭ تەڭ جارىمى وتكەن ۇيدە بەينەسى جارقىراپ، ەسىمى قاشالىپ تۇرعانى قانداي جاقسى»، دەيدى قوعام قايراتكەرى ەرجانبەك  نۇربەكوۆ.

ءىس-شاراعا جينالعاندار تەلمان ەركىنبەك ۇلىنىڭ جاستاردى كاسىبي شەبەرلىككە، ادامگەرشىلىك قۇندىلىقتارعا باۋلىعانىن، ءوزى قىزمەت اتقارعان قاي سالادا دا ابىروي بيىگىنەن كورىنىپ، قايراتكەرلىكتىڭ جارقىن ۇلگىسى بولا بىلگەنىن ىلتيپاتپەن ەسكە الدى. مەملەكەتتىك قىزمەتتەن بولەك ۇلت تاريحى، ۇرپاق تاربيەسىنە قاتىستى كەز كەلگەن ماسەلەنىڭ ورتاسىنان تابىلعان حالقىنىڭ ادال پەرزەنتى ەل جادىنان وشپەيتىنىن جەتكىزدى.

تەلمان ساۋرانبەكوۆ  (1941-2020)   جامبىل وبلىسى، جۋالى اۋدانىندا ومىرگە كەلگەن. قازىرگى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ تاريح فاكۋلتەتىن بىتىرگەن (1962). ەڭبەك جولىنداعى قادامىن اۋداندىق پيونەرلەر ءۇيىنىڭ ادىسكەرى، پيونەر لاگەرىنىڭ تاربيەشىسى بولىپ باستادى. 1962 – 65 جىلدارى الماتى قالاسى سوۆەت اۋدانى كومسومول كوميتەتىنىڭ ءبىرىنشى حاتشىسى، 1969 – 72 جىلدارى الماتى قالاسى كومسومول كوميتەتىنىڭ ءبىرىنشى حاتشىسى، 1972–76 جىلدارى بلكجو ورتالىق كوميتەتىنىڭ جاۋاپتى ۇيىمداستىرۋشىسى، 1976–84 جىلدارى قازاقستان لكجو ورتالىق كوميتەتىنىڭ حاتشىسى، 1984 – 86 جىلدارى الماتى قالاسى پارتيا كوميتەتىنىڭ حاتشىسى، 1986 – 90 جىلدارى قازاقستان كومپارتياسى وك-نىڭ شەتەلدەرمەن بايلانىس جونىندەگى ءبولىمىنىڭ مەڭگەرۋشىسى، كسرو مينيسترلەر كەڭەسىنىڭ قازاق كسر-ءى بويىنشا ءدىن ىستەرى جونىندەگى وكىلەتتى وكىلى، 1990 – 95 جىلدارى قر پرەزيدەنت اپپاراتى مەن مينيسترلەر كابينەتىنىڭ حات جانە ازاماتتاردى قابىلداۋ ءبولىمىنىڭ مەڭگەرۋشىسى، 1995 – 97 جىلدارى قر ۇكىمەت جانىنداعى ءدىن ىستەرى جونىندەگى كەڭەس توراعاسىنىڭ ورىنباسارى، 1997 جىلدان قر پارلامەنتىنىڭ سەنات اپپاراتىنىڭ جالپى ءبولىمىنىڭ مەڭگەرۋشىسى قىزمەتتەرىن ابىرويمەن اتقاردى. قازاق كسر جوعارعى كەڭەسىنىڭ (11-شاقىرىلعان) دەپۋتاتى بولىپ سايلاندى. «قۇرمەت بەلگىسى» وردەنىنىڭ يەگەرى.

سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار