«ماڭعىستاۋ مەديا» قۇرامىنا 5 اۋدان, 2 وبلىستىق, 1 قالالىق گازەتتەر مەن 1 وبلىستىق سايت ەنگەن ءىرى ورتالىق. ال ونىڭ قىزمەتكەرلەرى ءبىر جەردە شوعىرلانعان. مۇندا جۋرناليستەر وبلىستاعى جاڭالىقتار مەن وقيعالاردى ايماق تۇرعىندارىنان بولەك, رەسپۋبليكا كولەمىندە دە تاراتىپ وتىر.
كۇنى كەشە اتالعان ورتالىق ورنالاسقان عيماراتقا ماڭعىستاۋ وبلىسى اكىمىنىڭ ورىنباسارلارى – ابزال مەڭدىباەۆ پەن بەكبول ورىنباساروۆ جانە قارجى باسقارماسىنىڭ باسشىلارى باستاعان ءبىر توپ شەنەۋنىكتەر كەلگەن.
تىلشىلەر ولاردى ورتالىقپەن تانىسىپ, قىزمەتكەرلەرمەن جولىعار دەپ جورامالداعاندارىن ايتادى. الايدا اقجاعالى ازاماتتار عيماراتقا كوز سالا كەلگەن كورىنەدى. سەبەبى تىلشىلەر وتىرعان عيمارات مەملەكەتتىڭ مەنشىگى.
سوندىقتان بۇل عيماراتتا تۋريستەر ءۇشىن قولونەر بۇيىمدارى قويىلاتىن كورمەلەر ورنالاستىرۋ جوسپارلانعان. مۇنداي يدەيا ورتالىق قىزمەتكەرلەرىنە ۇناماي قالعان سىنايلى. بۇدان بولەك حالىق قالاۋلىلارىنىڭ تۇرپايىلىعىنا اشىنعان تىلشىلەر سايتتارىنا شاعىن ماقالا ۇسىنىپتى.
«3-شاعىن اۋداندا وتىرعاندا (بۇعان دەيىن تىلشىلەر ينتەرنەت جەلىسى ءالسىز, شالعايداعى عيماراتتا جۇمىس ىستەپ كەلگەن) جۇمىسىمىزعا ءبىر باس سۇعىپ, جاعدايىمىزدى بىلگىسى كەلمەگەن بەلسەندى شەنەۋنىكتەر ەندى جاڭا عيماراتقا كوز الارتۋدا ما؟! قوعامنىڭ وسال تۇسىن جوندەۋگە تىرىسىپ, حالىقتىڭ مۇڭىن جەتكىزۋگە تىرىسقان جۋرناليستەرگە وسى عيماراتتى دا كوپ كورگەنى مە؟! جوق, ايماقتىڭ جۋرناليستەرىندە الا الماي جۇرگەن وشتەرى بار ما؟!» دەيدى ورتالىق جۋرناليستەرى.
تىلشىلەر اتالعان ماسەلەگە وبلىس اكىمىنىڭ نازار اۋدارۋىن سۇراپ وتىر.
«قۇرمەتتى ماڭعىستاۋ وبلىسىنىڭ اكىمى نۇرلان اسقار ۇلى! قوعامنىڭ, حالىقتىڭ ءسوزىن سويلەپ جۇرگەن جۋرناليستەرگە ءسىزدى اراشا تۇسەدى دەگەن ويدامىز. وسى كەلەڭسىز جايتتىڭ دۇرىس شەشىمىن تاۋىپ بەرۋىڭىزدى سۇرايمىز», دەيدى ولار.
