جەردىڭ كىشى جاساندى سپۋتنيكتەرىنىڭ يننوۆاتسيالىق كونسترۋكتورلارىن ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى ويلاپ تاپتى. قۇرىلعى وقۋشىلار مەن ستۋدەنتتەردى عارىشتىق اپپاراتتى جوبالاۋ جانە قۇراستىرۋ نەگىزدەرىنە ۇيرەتۋگە ارنالعان. جابدىق مەملەكەتتىك تىلدە باعدارلامالىق قامتاماسىز ەتۋمەن جانە قاجەتتى ادىستەمەلىك ماتەريالدارمەن جاراقتالعان. ەستەرىڭىزگە سالا كەتەيىك, بۇعان دەيىن يلون ماسك كومپانياسى جوو عالىمدارى ازىرلەگەن «Al-Farabi-2» نانوسپۋتنيگىن ىسكە قوسقان بولاتىن.
«كونسترۋكتورمەن جۇمىس ىستەۋ بارىسىندا ءبىلىم الۋشىلاردىڭ تەحنولوگيا سالاسىنداعى داعدىسى داميدى. ولار وسى عارىش اپپاراتىن جوبالاۋدا پراكتيكالىق ءبىلىم الادى. كونسترۋكتوردىڭ كومەگىمەن وقۋشى نەمەسە ستۋدەنت ءوز نانوسپۋتنيگىن جيناپ, ونى گەلي شارىنىڭ كومەگىمەن ستراتوسفەراعا جىبەرە الادى. 2017 جىلى قازۇۋ-دىڭ «Al-Farabi-1» العاشقى نانوسپۋتنيگى عارىشقا ۇشىرىلعانىن اتاپ وتكىم كەلەدى. 2018 جىلى يلون ماسك كومپانياسى ءبىزدىڭ ۋنيۆەرسيتەتتە قۇرىلعان «Al-Farabi-2» ەكىنشى نانوسپۋتنيگىن ىسكە قوستى», دەدى ءال-فارابي اتىنداعى قازۇۋ عىلىمي-تەحنولوگيالىق پاركىنىڭ ديرەكتورى ءامىرحان تەمىرباەۆ.
سونداي-اق قازۇۋ عالىمدارى فيزيكا زاڭدارىن زەرتتەۋ ءۇشىن ءموبيلدى اپپاراتتىق-باعدارلامالىق كەشەن قۇردى. جابدىقتىڭ كومەگىمەن ءارتۇرلى زەرتحانالىق جۇمىس جۇرگىزۋگە بولادى. كەشەن باسقا جابدىقتارمەن سالىستىرعاندا بىرقاتار ارتىقشىلىققا يە. ءموبيلدى اپپاراتتىق-باعدارلامالىق كەشەن ىقشام جانە ءموبيلدى: بۇكىل كەشەن ءپورتاتيۆتى چەمودانعا سالىنىپ, باتارەيامەن جۇمىس ىستەيدى.
د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ عالىمدارى مەديتسينالىق يمپلانتانت ۇلگىلەرىن شىعاراتىن تاجىريبەلىك-ونەركاسىپتىك ۋچاسكى قۇردى. ونىمدەر جەرگىلىكتى شيكىزات — جوعارى ساپالى تيتاننان جاسالعان. جوبا جوعارى تەحنولوگيالىق سالانىڭ يمپورتىن الماستىرۋعا باعىتتالعان. وتاندىق يمپلانتتار وزىندىك قۇنى بويىنشا ايتارلىقتاي تومەن, ياعني ازاماتتاردىڭ الەۋمەتتىك وسال ساناتتارىنا قولجەتىمدى.
«تراۆماتولوگيا جانە ورتوپەديا عىلىمي-زەرتتەۋ ينستيتۋتىنىڭ عالىمدارىمەن بىرلەسە سىنىقتارعا ارنالعان 12-دەن استام سۇرانىسقا يە يمپلانتاتتى انىقتادىق. ءبىز جاساعان يننوۆاتسيالىق تيتان كەيدجدەر ومىرتقا ارالىق ديسكىلەردى اۋىستىرۋ ءۇشىن قولدانىلادى. ولار قۇرىلىمى مەن قاسيەتى بويىنشا ادام سۇيەگىنە بارىنشا ۇقساس. يمپلانتاتتاردى 3D-پرينتەردە باسىپ شىعارامىز, قازىر تاجىريبەلى ۇلگىلەر كلينيكالىق سىناقتاردان ءوتىپ جاتىر. تيتان يمپلانتاتتارىنىڭ ادام اعزاسىنا تەز بەيىمدەلەتىنى بايقالادى», دەدى ورتالىقتىڭ عىلىمي قىزمەتكەرى, PhD دوكتور باعدات ازاماتوۆ.
Dulaty University ستۋدەنتتەرى ينسۋلت العان ناۋقاستاردى وڭالتۋعا ارنالعان يننوۆاتسيالىق ترەناجەر ويلاپ تاپتى. ولار قۇرىلعىنى «Science Slam-قازاقستان» عىلىمي شوۋىندا تانىستىرىپ, جاس عالىمدار اراسىنداعى بايقاۋدىڭ جەڭىمپازى اتاندى.
«الدىمىزعا ينسۋلتپەن اۋىراتىن ناۋقاستاردى وڭالتۋعا ارنالعان ارزان ءارى ءتيىمدى ترەناجەردى ازىرلەۋ مىندەتىن قويدىق. ديزاينى ءارتۇرلى بۇلشىقەت توپتارىنا جاتتىعۋلار جاساۋ ءۇشىن ىڭعايلى ەتىپ جاسالدى. جۇكتەمە دارەجەسىن جانە سەرىپپەلەردىڭ كەرنەۋىن وزگەرتۋگە بولادى. سونداي-اق ترەناجەر كومەگىمەن ينسۋلت العان ناۋقاستاردى وڭالتۋ ءۇردىسىن ايتارلىقتاي تەزدەتەتىن جەكە كۋرس ۇيىمداستىرۋعا بولادى. تاعى ءبىر ارتىقشىلىعى –مەتالدان, اعاشتان جانە بىلعارىدان جاسالعان. سوندىقتان كوپ ۋاقىت پايدالانۋعا جارامدى, توزبايدى», دەدى ازىرلەۋشىلەردىڭ ءبىرى, جاس عالىم الەكساندر سكالكين.
