حالىق ءۇشىن ءاردايىم ايتارى بار ايبارلى اقىننىڭ تەكتەن-تەك دابىل قاقپاعانىن ۇعىنىپ, مەجەلى جەرگە قۇستاي ۇشتىق... ول كەزدە بۇگىنگىدەي الدىن الا حابار تاراتا قوياتىن ءباسپاسوز حاتشىسى نەمەسە مەكەمەلەردە بۇقارامەن بايلانىس جاسايتىن PR بولىمدەرى جوق. ء«باسپاسوز ءماسليحاتى» دەگەن اتاۋدىڭ ءوزى تاڭسىق.
وتە كوڭىلدى ەكەنىنىڭ ءوزى ءتۇر-كەلبەتىنەن وپ-وڭاي بايقالا قويمايتىن اقىن اعامىز تىلشىلەر ءۇشىن شىن مانىندە توسىنسىي جاسايدى دەپ كىم ويلاعان؟!
– «لەنينشىل جاس», قازاق راديوسى, «قازاق ادبيەتى», «جەتىسۋ»... «حالىق كەڭەسى», «الماتى اقشامى»... دەپ ارقايسىمىزدىڭ ايتقانىمىزدى قايتالاي, قولىمىزدى قىسىپ امانداسقان مۇحتار شاحانوۆ «رەداكتورلارىڭا جەكە ءوزىم تەلەفون شالىپ, سەندەردى شۇعىل شاقىرتۋىمنىڭ سەبەبى, ساناۋلى مينۋتتاردان سوڭ وسىندا قازاقتىڭ تۇڭعىش عارىشكەرى توقتار اۋباكىروۆ كەلەدى», – دەپ سىر اشتى.
توبەمىز كوككە جەتكەندەي قۋاندىق. ويتكەنى ول كەزدە عارىشتان ورالعان توقتار اۋباكىروۆپەن جۇزدەسۋ ءاربىر ءتىلشىنىڭ ارمانى بولاتىن, امال قانشا, كەڭەس وداعىنىڭ ەڭ سوڭعى №72 عارىشكەرى, كەڭەس وداعىنىڭ باتىرى, كسرو-نىڭ ەڭبەك سىڭىرگەن سىناقشى-ۇشقىشى الىس تا اۋىر ساپاردان كەيىنگى وتەتىن وڭالتۋ ەم-دومىنا سايكەس ماسكەۋدە جۇرگەن. ءبىر سوزبەن ايتقاندا, كۇللى ءومىرى ونسىز دا «قۇپيالىقتان» قۇرالعان باتىردىڭ جولى الماتىعا قاشان تۇسەتىنى تۋرالى اقپارات جوقتىڭ قاسى-تىن...
اقىن بارىمىزگە «قوش كەلدىڭدەر-ءدى...» ايتىپ ۇلگەرگەنشە, ىشكى ەسىكتى ايقارا اشىپ, باتىردىڭ ءوزى دە كىرىپ كەلدى. بۇگىنگى پىكىرلەر مەن تالاپتار ولشەمىمەن بەزبەندەسەك, بۇل شىن مانىندە «جالىن» الماناعىندا تۇڭعىش عارىشكەرمەن وتكەن قازاقستانداعى تۇڭعىش ءباسپاسوز ءماسليحاتى دەر ەدىم. كينوداعىلارداي كوزىمىز ۇيرەنە باستاعان كادىمگى ناعىز «گولليۆۋدتىڭ جۇلدىزىنداي» جايدارى اۋباكىروۆ تىلشىلەردىڭ ءار ساۋالىنا اسىقپاي, تالماي ءارى قازاق تىلىندە تاماشا جاۋاپ بەردى-اي. مەكتەپتى ورىسشا بىتىرگەننەن كۇللى وقۋ-قىزمەتى تۋعان جەردەن تىس وتكەن جاس جىگىتتىڭ قويىلعان سۇراقتارعا انا تىلىندە ويلانىپ, اسىقپاي, ۇعىنىقتى سويلەپ, جاۋاپ بەرۋى بارشامىزدى تاڭعالدىردى.
سودان... ارالدان ۇشقان تۇز بوراننىڭ توڭىرەكتى تۇمشالاپ قانا قويماي, پامير تاۋىنىڭ ۇشار باسىنا قاراي جوڭكىلىپ جاتقانى, ەكىباستۇز گرەس-ءىنىڭ ءتۇتىنى شۋدالانىپ ءتۇۋ ءنوۆوسىبىر اسقانى... جەردىڭ عارىشتان دومالاق ء«تىرى» ورگانيزم سەكىلدى «تىنىستاۋى», سۋىنىڭ قاي جىلى تاۋسىلعانى بەيمالىم ءامۋداريانىڭ گەوگرافيادا كورسەتىلگەندەي ارالعا كەلىپ قۇيمايتىنى... كاسپي مەن ارال تەڭىزدەرىنىڭ جەراستى بايلانىسى تۋرالى عالىمدار بولجامى... عارىش كەڭىستىگىنە ەنگەندە جانە شىققاندا ادام دەنەسىنىڭ قانداي كۇي كەشەتىنى سياقتى... باسقا دا قىزىقتى اڭگىمەلەر شەكتەۋسىز شەرتىلدى. عارىشكەر قانداي ساۋال قويىلسا دا, توسىلماي جاۋاپ بەردى.
قازاقستان رەسپۋبليكاسى جاستار ىستەرى جونىندەگى كوميتەتتىڭ توراعاسى يمانعالي تاسماعامبەتوۆتىڭ: «جىگىتتەر, توقتار وڭعارباي ۇلىمەن ماڭىزدى مەكەمەدە وتەتىن ماڭىزدى كەزدەسۋگە بارا جاتىرمىز», دەگەن يشاراسىنان كەيىن عانا تۇڭعىش قازاق عارىشكەرمەن شاحانوۆ وفيسىندەگى وتكەن جۋرناليستەردىڭ مازمۇندى ءماسليحاتى مارەسىنە جەتتى.
تۇرەگەپ تۇرىپ, تىزەرلەپ وتىرىپ, جۇرەلەي جۇگىرىپ, بايىز تاپپاي, ءاربىر قاس-قاعىم ءساتتى تاسپاعا ءمۇلت جىبەرمەي تۇسىرگەن اتاقتى فوتوجۋرناليست نۇرمانبەت قيزات ۇلى اعامىزدىڭ بۇل سۋرەتىنىڭ وسىنداي ءبىر تاريحى بار!
سودان بەرى دە وتىز جىلعا تاياۋ ۋاقىت زىرعىپ ءوتىپتى...
