ء«بىز ءۇشىن قازىرگى شەكتەۋلەرگە قاراماستان, IX تەاتر ماۋسىمىن ءوز ۋاقىتىندا اشۋ وتە ماڭىزدى بولدى. كورەرمەندەرمەن قاۋىشۋدى اسىعا كۇتتىك. ارتىستەر ساحنانى, ال كورەرمەن سپەكتاكلدەردى ساعىندى. قازىر ءبىزدىڭ ۇلكەن جوسپارلارىمىز بار. بارشا كورەرمەندى Astana Ballet تەاترىنا شاقىرامىن», دەدى تەاتر ديرەكتورى ا.سوۆوستيانوۆ ءباسپاسوز ءماسليحاتىندا.
ايتا كەتەيىك, توعىزىنشى تەاتر ماۋسىمى 9-10 قىركۇيەك كۇندەرى «بەيبارىس سۇلتان» بالەتىمەن اشىلعان ەدى. ال 17-18 قىركۇيەك كۇندەرى «ماحاببات تۋرالى اڭىز» بالەتى كورسەتىلدى.
«ماحاببات تۋرالى اڭىز» بەن «بەيبارىس سۇلتان» – تەاتر رەپەرتۋارىنداعى ءساتتى شىققان قويىلىمدار, ولاردى كارانتين ۋاقىتىنان كەيىن العاش رەت گاسترولگە – دۋبايداعى ەكسپو-2020 كورمەسىنە اپارامىز. Astana Ballet تەاترىنىڭ ۇجىمى دۋبايدىڭ ۇلكەن, جاڭا, الدىڭعى قاتارلى تەاترلارىنىڭ بىرىندە وسى ەكى تاماشا تۋىندىنى ۇسىنادى», دەدى الەكساندر الەكساندروۆيچ.
سونداي-اق Astana Ballet تەاترى وسى ماۋسىمدا «لەونيد يليچ برەجنەۆكە قارسى جارقانات ادام. كەڭەستىك تريللەر» سپەكتاكلىن قويادى.
«IX تەاتر ماۋسىمىنا كەلسەك, جىل سوڭىنا دەيىن ءۇش ۇلكەن پرەمەرا جوسپارلانعان. قازان ايىندا ءبىزدىڭ ساحنادا كىشى برونناياداعى تەاتردىڭ گاسترولدەرى وتەدى. «لەونيد يليچ برەجنەۆكە قارسى جارقانات ادام. كەڭەستىك تريللەر» سپەكتاكلى قويىلادى. ءبىزدىڭ ويىمىزشا, وتە قىزىق قويىلىم بولادى. بۇل مادەنيەت جانە سپورت مينيسترلىگى نۇر-سۇلتان قالاسىنىڭ اكىمدىگىمەن بىرلەسىپ ۇيىمداستىراتىن تەاتر اپتالىعىندا وتەدى. تەاتر اپتالىعىنىڭ وتەتىن كۇنى جاقىن ارادا حابارلانادى», دەدى ا.سوۆوستيانوۆ.
گاسترولدەر اياقتالعان سوڭ دجوردج ءبالانچيننىڭ فورتەپيانو مەن وركەسترگە ارنالعان «كاپريچيو» بالەتىنىڭ قويىلىمى ءۇشىن بالانچين قورىنان پەداگوگ-رەپەتيتور كەلەدى. ودان بولەك, ونەر ۇجىمى باس بالەتمەيستەر مۋكارام ءاۆاحريدىڭ «تاعدىر بۇلتارىستارى» جاڭا بالەتىن قويۋدى جوسپارلاپ وتىر.
«قاراشا ايىندا چەحيادان پەداگوگ كەلىپ, ارتىستەرىمىزگە ماستەر-كلاسس وتكىزەدى. جەلتوقسان ايىندا كسەنيا زۆەرەۆانىڭ «ونەر سينتەزى» زاماناۋي بالەتىنىڭ جاڭا قويىلىمى كۇتىلۋدە, وندا تەك بالەت قانا ەمەس, مۋزىكا, دراما, ءسان دە بىرىكتىرىلەدى. ءساۋىر ايىنىڭ باسىندا تاعى ءبىر سپەكتاكلدىڭ پرەمەرالىق كورسەتىلىمى جوسپارلانعان. ارينە, كورەرمەن اراسىندا ۇلكەن جەتىستىككە جەتكەن «قوزى كورپەش پەن بايان سۇلۋ» سياقتى قازىرگى رەپەرتۋاردى دا ۇسىنامىز. سونداي-اق جاڭا جىلدىق ءداستۇرلى «ششەلكۋنچيك» شوۋلارى جانە تاعى باسقالارى بولادى», دەدى تەاتردىڭ كوركەمدىك جەتەكشىسى نۇرلان قانەتوۆ.
