كەزدەسۋ ەلوردا ۋاقىتىمەن 00:50-دە باستالىپ, «Qazaqstan» تەلەارناسىنان تىكەلەي ەفيردە كورسەتىلەدى. اتالعان كەزدەسۋدە انگليالىق ستيۋارت اتۆەلل باس تورەشى قىزمەتىن اتقارادى.
وعان وتانداستارى دەنيەل كۋك پەن گارري لەننارد كومەكشىلىك جاسايدى. قوسالقى تورەشى دە - سول ەلدىڭ وكىلى دەۆيد كۋت. ەسكە سالساق, «قايرات» H توبىندا سىنعا تۇسەدى.
قارسىلاستارى - شۆەيتساريانىڭ «بازەل», ازەربايجاننىڭ «كاراباح» جانە كيپردىڭ «ومونيا» كوماندالارى. العاشقى تۋردا «قايرات» ءوز الاڭىندا كيپردىڭ «ومونيا» كلۋبىمەن 0:0 ەسەبىمەن تەڭ تۇسسە, «بازەل» سىرت الاڭدا ازەربايجاننىڭ «كاراباح» كلۋبىمەن كەزدەسۋىندە ءدال سونداي ەسەپ تىركەلدى.
«قايرات» بيىل ەۋروكۋبوك ويىندارىن چەمپيوندار ليگاسىنىڭ ءبىرىنشى ىرىكتەۋ ساتىسىنان باستادى. الدىمەن ءيزرايلدىڭ «ماككابي حايفا» (1:1, 2:0) جەڭىپ, ودان كەيىن سەربيانىڭ «تسرۆەنا زۆەزدا» كومانداسىنا (2:1, 0:5) جول بەردى. ال ەۋروپا ليگاسى ءۇشىنشى ىرىكتەۋ ساتىسىندا ارمەنيانىڭ «الاشكەرتىنەن» (0:0, 2:3) جەڭىلىپ, كونفەرەنتسيا ليگاسى پلەي-وفف ساتىسىندا ليۋكسەمبۋرگتىڭ «فولا» كلۋبىنىڭ (4:1, 3:1) وسال تۇسىن تاپتى. «بازەل» كلۋبى 1893 جىلى قۇرىلعان. ءوزىنىڭ ەلىندە 20 مارتە چەمپيون اتانعان. ەۋروكۋبوك ويىندارىنا تۇراقتى تۇردە قاتىسىپ كەلەدى.
