قازاقستاندا تاۋارلاردى تاڭبالاپ, قاداعالاۋ ءۇشىن ەكى ولشەمدى Data Matrix كودى تاڭدالدى. قازان ايىنان باستاپ ەلىمىزدە تەمەكى ونىمدەرىنە مىندەتتى تسيفرلى تاڭبالاۋ قولدانىلادى. قازىردىڭ وزىندە Naqty Onim ءموبيلدى قوسىمشاسى ارقىلى كەز كەلگەن ءونىم تۋرالى بارلىق قاجەتتى اقپاراتتى الۋعا جانە ونىڭ زاڭدىلىعىنا كوز جەتكىزە الاسىز.
Data Matrix كودىنىڭ ارتىقشىلىعى قانداي دەگەنگە كەلسەك, QR كود, RFID بەلگىلەر جانە شتريح-كود نۇسقالارىمەن سالىستىرعاندا ونى قولدان جاساۋ مۇمكىن ەمەس. بۇعان شيفرلاۋدىڭ كريپتوگرافيالىق تاسىلدەرى مۇمكىندىك بەرىپ وتىر. دەمەك, اتالعان تسيفرلى تاڭبانىڭ قورعانىش جۇيەسى جان-جاقتى قاراستىرىلعانىن بايقاۋعا بولادى.
باسقا انالوگتارمەن سالىستىرعاندا Data Matrix كولەمدى اقپاراتتى قامتۋعا قاۋقارلى. ماسەلەن, ەسەپتەۋگە ارنالعان اقپارات 2 كيلوبايتقا دەيىن جەتۋى مۇمكىن.
تەحنيكالىق رەتتەۋ جانە مەترولوگيا كوميتەتىنىڭ وكىلدەرى ايتقانداي, تاۋارلاردى سايكەستەندىرۋدىڭ وسى ءتۇرى اسا قىمباتقا شىقپايدى, ياعني ونى قولدانۋ تاڭبالانعان تاۋارلاردىڭ قۇنىنا ايتارلىقتاي اسەر ەتپەيدى. Data Matrix كودىنىڭ باستى ارتىقشىلىعى – ونىڭ كولەمىندە. بۇل تاڭبانى كىشكەنتاي قاپتامالار مەن زاتتاڭبالارعا ەنگىزگەن ىڭعايلى. وسى ەكى ولشەمدى كود ءتۇرى قازىر ەۋروپادا, اقش-تا, رەسەيدە, بەلارۋستە جانە باسقا دا مەملەكەتتەردە قولدانىلىپ ءجۇر.
