دۇنيەجۇزىلىك رەيتينگتە 109-ورىندا تۇرعان ز.دياس ەكىنشى اينالىمدا الەمنىڭ 86-شى, وسى جارىستىڭ 6-راكەتكاسى, شۆەتسيالىق رەبەككا پەتەرسونمەن كورتقا شىقتى.
ساعات جارىمنان استام ۋاقىتقا سوزىلعان كەزدەسۋ بارىسىندا شۆەتسيالىق تەننيسشىنىڭ باسىمدىلىعى ايقىن بايقالدى. ەكى سەتتە دە العا كەتكەن ول 6:2, 6:2 ەسەبىمەن جەڭىسكە جەتتى. ر.پەتەرسون 1 ەيس جاساپ, 12 برەيك-پوينتتىڭ تەڭ جارتىسىن پايدالاندى. ز.دياس 6 برەيك-پوينتتىڭ ەكەۋىن عانا ءوز ەسەبىنە جازا الدى.
ر.پەتەرسون جارتىلاي فينالعا شىعۋ ءۇشىن الەمنىڭ 80-راكەتكاسى, رەسەيلىك اناستاسيا پوتاپوۆامەن تالاسادى. ول تارتىستى باسەكەدە فرانتسيالىق كريستينا ملادەنوۆيچتى 1:6, 6:4, 6:3 ەسەبىمەن تىزە بۇكتىردى.
وسىلايشا جۇلدە قورى 235 مىڭ اقش دوللارىنان اساتىن استانا دوداسىندا جەكەلەي سىندا قازاقستاننان يۋليا پۋتينتسەۆا عانا قالدى.
