«قازاقستاندىق سپورتشىلاردىڭ توكيو وليمپياداسىندا ءساتسىز ونەر كورسەتۋىنىڭ سەبەبى - كوروناۆيرۋس پاندەمياسىنىڭ سالدارى», دەپ مالىمدەدى ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ.
ونىڭ ايتۋىنشا, جاتتىقتىرۋشىلار شەكتەۋ جاعدايىنا بەيىمدەلۋگە, شەشىمدەر ىزدەۋگە ءماجبۇر بولعان, بىراق, وكىنىشكە قاراي, بۇل سپورتشىلاردىڭ دايىندىعىنا اسەر ەتتى.
«وزدەرىڭىز بىلەتىندەي, سپورتشىلاردى دايىنداۋ جوسپارى ءتورت جىلدىق تسيكلگە ارنالعان, بىراق پاندەميا سالدارىنا بايلانىستى ولار ءۇزىلدى: 160-قا جۋىق ءىرى سپورتتىق جارىس كەيىنگە قالدىرىلدى نەمەسە توقتاتىلدى, كوپتەگەن سپورت تۇرىنەن جاتتىعۋ 6-8 ايعا ءۇزىلدى», دەدى اندرەي كريۋكوۆ.
سونىمەن قاتار ول وليمپيادا قارساڭىندا جارىستاردىڭ بولماۋى سپورتشىلاردىڭ پسيحولوگيالىق جاعدايىنا كەرى اسەر ەتكەنىن ايتتى.
«توكيوداعى جارىستاردىڭ ناتيجەسى كورسەتكەندەي, نەگىزىنەن ۇلتتىق بىرىنشىلىكتە باسەكە جوعارى بولاتىن ەلدەر عانا جاتتىعۋدى ەلىندە جاساي الادى. مىسالى, اقش-تا جەڭىل اتلەتيكا, گيمناستيكا, بوكستان, جاپونيادا دزيۋدودان باسەكەلەستىك جوعارى», دەپ ءتۇسىندىردى كريۋكوۆ.
سپيكەردىڭ ايتۋىنشا, تاعى ءبىر سەبەپ ازيا ەلدەرىنىڭ وقشاۋلانۋى بولعان. ەۋروپا سپورتشىلارىندا باسقا ەلدەرگە شىعۋ, جارىس كۇنتىزبەسىن ساقتاۋ مۇمكىندىگى بولعان. «بۇل ولارعا باسەكەگە قابىلەتتى تاجىريبە كولەمىن ساقتاۋعا مۇمكىندىك بەردى», دەيدى اندرەي كريۋكوۆ.
ول جاتتىعۋدىڭ ادەتتەن تىس جەرلەردە ءوتۋى مەن باسەكەلەستىكتىڭ از بولۋى ناتيجەگە اسەر ەتكەنىن ايتتى. باپكەرلەر شتابىنىڭ ءرولى مەن بولجامى دا ءرول وينادى.
